යුක්තිය පසිඳලීමේ සැබෑ අරමුණ ද? පාස්කු ප්‍රහාරය දඩමීමා කරගත් පෞද්ගලික එදිරිවාදිකමක් ද?

දැනට රෝහල්ගතව ප්‍රතිකාර ලබමින් සිටින විශ්‍රාමික මේජර් ජෙනරාල් සුරේෂ් සලේ ගේ

නීතිමය කටයුතුවලට අදාළව ලබන ජූලි 10 වනදා වැඩිදුර විභාගයට නියමිත රිට් ආඥා පෙත්සම (Writ Application), මෙරට නීති ක්ෂේත්‍රයේ මෙන්ම දේශපාලන හා සමාජීය තලයේ ද දැඩි කතාබහකට ලක්වෙමින් තිබේ. ඊළඟ නඩු විභාගයට පෙර මෙම නීතිමය ක්‍රියාවලිය තවදුරටත් වේගවත් වී ඇති අතර, එය හුදු නීතිමය කටයුත්තකට එහා ගිය සත්‍යය සහ සැඟවුණු න්‍යායපත්‍ර අතර ගැටුමක් බවට පත්ව ඇති බව නෛතික හා මාධ්‍ය විචාරකයන්ගේ මතයයි.

පිටු 600ක සාක්ෂි සහ CIDයේ බරපතළ පැහැර හැරීම්

මේජර් ජෙනරාල් සලෙයි මහතා වෙනුවෙන් පෙනී සිටින නීතිඥවරයා විසින් මෙම රිට් පෙත්සමට සහය දැක්වීම සඳහා පිටු 600කට අධික අතිරේක ලේඛන තොගයක් මේ වන විටත් අධිකරණයට ගොනු කර තිබේ. විනිසුරු ජනක් ද සිල්වා ගේ සභාපතිත්වයෙන් යුත් පාස්කු ඉරිදා ප්‍රහාරය පිළිබඳ විමර්ශනය කළ ජනාධිපති පරීක්ෂණ කොමිෂන් සභාව (PCoI) හමුවේ විමර්ශකයන් සහ අනෙකුත් ප්‍රධාන සාක්ෂිකරුවන් විසින් ඉදිරිපත් කරන ලද දිවුරුම් ප්‍රකාශ සහ ලේඛනමය සාක්ෂි මෙම ලේඛනවලට ඇතුළත් වේ.

පෙත්සම්කරු අවධාරණය කරන පරිදි, මෙම සාක්ෂි මගින් පාස්කු ඉරිදා ප්‍රහාරයට තුඩු දුන් පසුබිම සහ සිදුවීමට පෙර පැවැති විමර්ශන පිළිබඳව සවිස්තරාත්මක වාර්තාවක් සපයයි. වඩාත් වැදගත්ම කරුණ වන්නේ, අදාළ කාලවකවානුව තුළ අපරාධ විමර්ශන දෙපාර්තමේන්තුවේ (CID) ජ්‍යෙෂ්ඨ නිලධාරීන්ගේ ක්‍රියාකලාපයන් සහ ඔවුන් අතින් සිදුවූ බරපතළ විමර්ශන දෝෂ මෙන්ම රාජකාරි පැහැර හැරීම් මෙම සාක්ෂි මගින් මනාව ඉස්මතු කිරීමයි. එමෙන්ම ප්‍රහාරයට සැබවින්ම වගකිවයුතු යැයි කියනු ලබන පිරිස් පිළිබඳව ද මෙමගින් පැහැදිලි ආලෝකයක් සපයයි.

වෙනස්වන ප්‍රකාශ සහ මගහැරිය නොහැකි දිවුරුම් ප්‍රකාශ අතර ගැටුම

මෙම අතිරේක ලේඛන අතරට අතිඋතුම් මැල්කම් රංජිත් කාදිනල් හිමිපාණන් කොමිසම හමුවේ ලබාදුන් දිවුරුම් සාක්ෂි ද ඇතුළත් කර තිබීම විශේෂත්වයකි. එහිදී උන්වහන්සේ දැඩිව අවධාරණය කර ඇත්තේ පාස්කු ඉරිදා ප්‍රහාරය පිළිබඳ විමර්ශන දේශපාලන මැදිහත්වීම්වලින් තොරව, පූර්ණ ස්වාධීනව සිදු කිරීමේ වැදගත්කමයි. එහෙත්, පෙත්සම්කරු තර්ක කරන්නේ වත්මන් තත්ත්වය හමුවේ එම ස්වාධීනත්වයේ මූලධර්මය කිසිසේත්ම ආරක්ෂා වී නොමැති බවයි.

මෙහිදී විචාරයට ලක්විය යුතු ප්‍රධානතම කාරණයක් මතුවේ. එනම්, කාලෙන් කාලයට වෙනස්වන ඇතැම් පාර්ශ්වයන්ගේ ප්‍රකාශයන් සහ ඊට හාත්පසින්ම වෙනස් වූ, නීතිය හමුවේ මගහැරිය නොහැකි දිවුරුම් ප්‍රකාශයන් අතර පවතින බලවත් පරස්පරතාවයයි. මාධ්‍ය ඉදිරියේ සහ සමාජ වේදිකාවල ගොඩනඟන ආඛ්‍යානයන්, ජනාධිපති කොමිසම හමුවේ දිවුරුම් දී ලබාදුන් සාක්ෂි සමඟ සැසඳීමේදී බරපතළ ප්‍රතිවිරෝධතා නිර්මාණය කරයි.

පාස්කු ඛේදවාචකය පෞද්ගලික එදිරිවාදිකම් පිරිමසාගැනීමේ ආයුධයක් ද?

මෙම නෛතික සටන හරහා සමාජයට බරපතළ ප්‍රශ්නයක් මතුකර තිබේ. මේජර් ජෙනරාල් සලෙයි පාර්ශ්වය විසින් ඉදිරිපත් කරන ලද පුළුල් සාක්ෂි විශ්ලේෂණය කිරීමේදී, සැබෑ අපරාධකරුවන් සහ CIDයේ ජ්‍යෙෂ්ඨ නිලධාරීන්ගේ අතපසුවීම් යටපත් කර ඇති බවක් පෙනෙන්නට තිබේ.

එසේනම්, කාදිනල් හිමියන් ඇතුළු පැමිණිලි පාර්ශ්වයේ ඇතැම් ක්‍රියාකලාපයන් හරහා සැබවින්ම සිදුවන්නේ යුක්තිය සෙවීමක් ද? නැතහොත්, සමස්ත ජාතියක් කම්පනයට පත් කළ ‘පාස්කු ප්‍රහාරය’ දඩමීමා කරගනිමින්, යම් යම් පාර්ශ්වයන් සිය පෞද්ගලික එදිරිවාදිකම් සපුරා ගැනීමටත්, එක් නිශ්චිත පුද්ගලයෙකු ඉලක්ක කරගෙන නීතිය අවභාවිත කිරීමටත් දරන උත්සාහයක් ද? යන්න මෙම ලිඛිත සාක්ෂි සහ දිවුරුම් ප්‍රකාශ හරහා මනාව වටහාගත හැකිවනු ඇත.

මහජන අවධානය සහ අතරමැදි පෙත්සම් (Intervenient Petitions)

මෙම නඩු නිමිත්තේ ඇති සංකීර්ණභාවය සහ එහි සැඟවුණු අරමුණු පිළිබඳව සමාජය තුළ ද පුළුල් අවධියක් නිර්මාණය වී ඇති බව තහවුරු වන්නේ, අතිරේක ලේඛන ගොනු කිරීමෙන් අනතුරුව පාර්ශව කිහිපයක්ම මෙම රිට් පෙත්සමට අතරමැදියන් ලෙස සම්බන්ධ වීමට අවසර ඉල්ලා අධිකරණයට පෙත්සම් ගොනු කර තිබීමෙනි. එම අතරමැදි පෙත්සම්කරුවන් වන්නේ,

• සමස්ත ලංකා බෞද්ධ මහා සම්මේලනය;

• දිඹුලාගල මහා විහාරයේ පූජ්‍ය දිඹුලාගල රාහුලාලංකාර හිමි සහ නුගේගොඩ, ගංගොඩවිල ශ්‍රී බෝධිමළු විහාරයේ පූජ්‍ය දාපනේ සුමනවංශ හිමියන්.

• ගෝලීය ශ්‍රී ලංකා සංසදය (Global Sri Lanka Forum);

• දේශප්‍රේමී ජාතික පෙරමුණ, සහ

• කැළණිය, දුම්රිය ස්ථාන පාරේ ශ්‍රී ප්‍රඥානන්ද ධර්මායතනයේ පූජ්‍ය බෙංගමුවේ නාලක හිමි සහ මාලබේ, ඉසුරුපුර ශ්‍රී විමලාරාමයේ පූජ්‍ය අඟුළුගල්ලේ සිරි ජිනන්ද යන හිමිවරුන්ය.

මෙම සිවිල් සහ ආගමික පාර්ශ්වයන්ගේ මැදිහත්වීම මගින්, මෙම නඩු කටයුත්ත කෙරෙහි පවතින පුළුල් මහජන උනන්දුව සහ අධිකරණය හමුවේ ඇති කරුණුවල ජාතික වැදගත්කම මැනවින් පැහැදිලි වේ.

ලබන ජූලි 10 වනදා අධිකරණය හමුවේ මෙම රිට් පෙත්සම වැඩිදුර විභාගය සඳහා කැඳවීමට නියමිත අතර, එහිදී ප්‍රධාන පෙත්සමේ මතු කර ඇති මූලික කරුණුවලට අමතරව ඉහත කී අතරමැදි පෙත්සම් ද අධිකරණයේ සලකා බැලීමට නියමිතය.

එදිනට දිගහැරෙනු ඇත්තේ හුදු පෙත්සම් විභාගයක් පමණක් නොවේ. එය, වෙනස්වන වාචික ප්‍රකාශ සහ වෙනස් කළ නොහැකි ලිඛිත දිවුරුම් ප්‍රකාශ අතර ගැටුමේ තීරණාත්මක සන්ධිස්ථානයක් වනු ඇත. පාස්කු ඛේදවාචකය වැනි අතිශය සංවේදී සිදුවීමක්, පෞද්ගලික පලිගැනීම් සහ එදිරිවාදිකම් පිරිමසා ගැනීමේ තිරයක් බවට පත්කර ගෙන තිබේද යන සාධාරණ සැකය නිරාකරණය කර ගැනීමට මෙම නඩු විභාගය ජාතියටම මංපෙත් විවර කරනු ඇත.