කොළඹ 05, තුම්මුල්ල ප්රදේශයේ ක්රියාත්මක වන "පෙන්ටාරා" (Pentara) නිවාස සංකීර්ණ ව්යාපෘතිය සම්බන්ධයෙන්
පසුගියදා පළවූ ඇතැම් මාධ්ය වාර්තා මගින් මහජනතාවට වැරදි සහගත චිත්රයක් මවා පෑමට උත්සාහ කර ඇති බව නිරීක්ෂණය වේ.
විශේෂයෙන්ම, සිවිල් අභියාචනා මහාධිකරණය ලබාදුන් තීන්දුවක් වැරදි ලෙස අර්ථකථනය කරමින්, පෙත්සම්කරුවන් නඩුවෙන් පරාජය වී ඇති බවට පළවන වාර්තා අසත්ය බවත්, ප්රධාන නඩුකරයන් තවදුරටත් සාර්ථකව ඉදිරියට යන බවත් අවධාරණය කළ යුතුය.
නාගරික සංවර්ධන අධිකාරිය (UDA) විසින් නීති විරෝධී ලෙස ලබා දී ඇති අනුමැතියට එරෙහිව දැනට අධිකරණ තුනක නඩු විභාග වෙමින් පවතී:
1. අභියාචනාධිකරණයේ රිට් (Writ) පෙත්සම (CA/Writ/1097/25):
නාගරික සංවර්ධන අධිකාරිය විසින් සිය රෙගුලාසි උල්ලංඝනය කරමින් මෙම ව්යාපෘතියට අවසර ලබා දී ඇති බවට මෙහිදී චෝදනා කෙරේ. මීටර් 120කට වඩා උස ගොඩනැගිල්ලක් සඳහා තිබිය යුතු මීටර් 40ක අවම ඉදිරිපස මාර්ග මුහුණත (Site Frontage) වෙනුවට ඇත්තේ මීටර් 28ක් පමණි. මෙය වසන් කිරීමට UDA ආයතනය විසින් පිවිසුම් මාර්ගයක් ලෙස භාවිත කළ නොහැකි පටු පසුපස මාර්ගයක් (ක්ලේසන් පෙදෙස) නීති විරෝධී ලෙස ගණනය කර ඇත. මීට අදාළව ලබන 2026 ජනවාරි 21, 27 සහ පෙබරවාරි 11, 12 යන දිනවලදී වැඩිදුර කරුණු දැක්වීමට නියමිතය.
2. ශ්රේෂ්ඨාධිකරණයේ මූලික අයිතිවාසිකම් (FR) පෙත්සම:
ආණ්ඩුක්රම ව්යවස්ථාවේ 12(1), 14(1)(c) සහ 14(1)(h) වගන්ති යටතේ තමන්ට හිමි මූලික අයිතිවාසිකම් උල්ලංඝනය වන බව පවසමින් ප්රදේශවාසීන් විසින් ගොනු කර ඇති මෙම නඩුව 2026 පෙබරවාරි මාසයේදී විභාගයට ගැනීමට නියමිතය.
3. දිස්ත්රික් අධිකරණයේ පොදු පීඩා නඩුව:
ඉදිකිරීම් හේතුවෙන් සිදුවන අධික ශබ්දය, කම්පනය සහ අනාරක්ෂිත බව හේතුවෙන් ගොනු කළ මෙම නඩුවේදී, වාරණ නියෝගයක් නිකුත් කිරීමට පෙර විත්ති පාර්ශවයේ විරෝධතා කැඳවීමට අධිකරණය තීරණය කළේය. සිවිල් අභියාචනාධිකරණය විසින් තහවුරු කළේ ද එම ක්රියා පටිපාටිය මිස නඩුවේ හරය නොවේ. ඒ අනුව විත්තිකරුවන්ට විරෝධතා ගොනු කිරීමට 2026 පෙබරවාරි 6 දක්වා කල් ලබා දී ඇත.
නාගරික සංවර්ධන අධිකාරිය විසින් ලබා දී ඇති අනුමැතිය සම්පූර්ණයෙන්ම නීති විරෝධී (Ultra Vires) සහ දූෂිත ක්රියාවලියක ප්රතිඵලයක් බව පෙත්සම්කරුවන්ගේ ස්ථාවරයයි. ප්රදේශවාසීන්ගේ ආරක්ෂාව සහ නීතියේ ආධිපත්යය උදෙසා ගෙනයන මෙම නීතිමය අරගලය කිසිසේත් නතර වී නොමැති බවත්, සත්ය කරුණු වසන් කිරීමට ගන්නා උත්සාහයන් පිළිබඳව මහජනතාව අවබෝධයෙන් සිටිය යුතු බවත් දන්වා සිටිමු.
