The Limits of Love කෘතියේ නවතම මුද්‍රණය දොරට වැඩීමේ උත්සවය
2025 මාර්තු මස 31 වන දින මහාචාර්ය රජීව විජේසිංහ වෙසෙන කොළඹ ඇල්ෆ්‍රඩ් හවුස් මාවතේ Lakmahal Community Library හිදී ආරාධිත සාහිත්‍ය ලෝලීන් රැසකගේ සහභාගීත්වයෙන් පැවැත්වුනා.
The Limits of Love (ආදරයේ සීමා) ශ්‍රී ලංකා දේශපාලනයේ යුග තුනක් පිළිබඳව ඉංග්‍රීසි බසින් ලියැවුණු තුන්ඈඳුතු නවකතාවක තුන් වන කෘතියයි. Acts of Faith (ඇදහිල්ලේ ක්‍රියා) වෙන්වෙන්වද රසවිඳිය හැකි මෙම කෘති තුනේ පළමු කෘතිය වන අතර, Days of Despair (හිත බිඳුණු දවස්) එහි දෙවන කෘතියයි.
ඉංග්‍රීසි සාහිත්‍ය පිළිබඳ මහාචාර්යවරයෙකු වන රජීව විජේසිංහ ශ්‍රී ලංකාවේ අධ්‍යාපන සහ උසස් අධ්‍යාපන ක්ෂේත්‍රය තුළ ඉංග්‍රීසි භාෂා අධ්‍යාපනය ප්‍රචලිත කිරීම සඳහා පුරෝගාමී මෙහෙවරක් ඉටු කර තිබෙනවා. ශ්‍රී ලංකාවේ මෙන්ම විදේශ විශ්වවිද්‍යාල ගණනාවක සේවය කර ඇති රජීව විජේසිංහ සාහිත්‍ය සහ විවිධ විෂයන් පිළිබඳ කෘති ගණනාවක් මෙන්ම ශාස්ත්‍රීය පර්යේෂණ විශාල සංඛ්‍යාවක් පල කර ඇති අතර, ඇතැම් විදේශීය විශ්වවිද්‍යාල සහ ජාත්‍යන්තර ආයතන ඔහුගේ ඇතැම් කාති පල කර තිබෙනවා. ඔහු ජාත්‍යන්තර ශාස්ත්‍රී සඟරා ගණනාවකම සාමාජිකයෙකු ලෙසද කටයුතු කර තිබෙනවා.
පළමු වරට යුරෝපීය බසකට පරිවර්තනය වූ ශ්‍රී ලාංකික සාහිත්‍ය කෘතිය වන්නේ Servi නමින් ඉතාලි බසට පරිවර්තනය වූ රජීව විජේසිංහ විසින් රචිත Servants නමැති කෘතියයි. එය 1995 වසරේ දී සාහිත්‍ය සඳහා වන ග්‍රේෂන් සම්මානයෙන් (Gratiaen Award) ද පිදුම් ලැබුවා.
පළමුව පේරාදෙනිය විශ්වවිද්‍යාලයේ කෙටි කළක් සේවය කළ ඔහු ජේ.ආර් ජයවර්ධන රජයේ ඒකාධිපතිත්වයට විරුද්ධව සිදු කළ විරෝධතාවයකින් පසු විශ්වවිද්‍යාල සේවයෙන් ඉල්ලා අස් වී තිබෙනවා. ශ්‍රී ලංකා ලිබරල් පක්ෂයේ සභාපතිවරයෙකු ලෙසද කටයුතු කර ඇති ඔහු, 2007 වසරේ මෙරට සාම මහලේකම් කාර්යාලයේ අධ්‍යක්ෂ ජෙනරාල් ධූරය දැරූ අතර, 2008 වසරේ දී එවකට පැවති ආපදා කළමනාකරණ සහ මානව හිමිකම් අමාත්‍යංශයේ ලේකම්වරයා ලෙස ද කටයුතු කර තිබෙනවා. 2010 වසරේ දී විශ්වවිද්‍යාලයෙන් මෙන්ම අමාත්‍යංශ ලේකම් ධූරයෙන්ද ඉල්ලා අස් වූ ඔහු, ජාතික ලැයිස්තු පාර්ලිමේන්තු මන්ත්‍රීවරයෙකු ලෙස කටයුතු කළ අතර, කෙටි කළක් ශ්‍රී ලංකාවේ උසස් අධ්‍යාපන රාජ්‍ය අමාත්‍යවරයා ලෙසද සේවය කර තිබෙනවා.
ලොව පුරා රටවල් ගණනාවකම සංචාරය කර ඇති රජීව විජේසිංහ තම සංචාරයන් පිළිබඳවද කෘති කිහිපයක්ම පල කර තිබෙනවා.
මහාචාර්ය රජීව විජේසිංහ සබරගමුව විශ්වවිද්‍යාලයේ සමාජීය විද්‍යා හා භාෂා පීඨයේ පීඨාධිපතිවරයා ලෙස කටයුතු කළ සමයේ මම එහි දේශපාලන විද්‍යාව පිළිබඳ කථිකාචාර්යවරයෙකු ලෙස සේවය කළා. ඒ යුගයේ දී මෙන්ම ඉන් පසුවත් මගේ ශාස්ත්‍රීය ජීවිතය වර්ධනය කරගැනීම සඳහා ඔහු මට විශාල දායකත්වයක් ලබා දී තිබෙනවා. මම ඔහුගෙන් බොහෝ දේ ඉගෙනගෙන තිබෙනවා.
ඉංග්‍රීසි බසින් නිර්මාණකරණයේ යෙදෙන ජාත්‍යන්තර කීර්තියට පත් ශ්‍රී ලාංකික ලේඛකයෙකු, අධ්‍යාපනඥයෙකු සහ රාජ්‍ය තාන්ත්‍රිකයෙකු වන මහාචාර්ය රජීව විජේසිංහ විසින් රචිත Acts of Faith (ඇදහිල්ලේ ක්‍රියා), Days of Despair (හිත බිඳුණු දවස්) සහ The Limits of Love (ආදරයේ සීමා) යන තුන් ඈඳුතු නවකතාව සිංහල බසට පරිවර්තනය කිරීමේ භාරදූර වගකීම ද ඔහු විසින් මට පවරා තිබීම මට මහත් ගෞරවයක්.
මෑතකාලීන ලංකා දේශපාලන ඉතිහාසයේ වැදගත් කාල පරිඡේද තුනක වැදගත් සිදුවීම් ගැබ් වුන මේ අපූරු තුන්ඈඳුතු නවකතාව ඉතා ඉක්මනින් සිංහල පාඨක සමාජයට තිළිණ කිරීමට මම අපේක්ෂා කරනවා.
@ශ්‍යාමන් හේමකොඩි
