වී කිලෝ 100කින් නිපදවිය හැකි හාල් ප්‍රමාණය සම්බන්ධයෙන් විවිධ පාර්ශව විවිධ මත පළ කළද,
ලංකාවේ හාල් හිඟයක් නොමැති බව එක්සත් ජනරජ පෙරමුණේ නායක, හිටපු අමාත්‍ය පාඨලී චම්පික රණවක කියයි.
ඔහු මේ බව පැවසුවේ අද (11) සහල්, පොල් ඇතුළු අත්‍යවශ්‍ය ආහාර සුරක්ෂිතතාව පිළිබඳ එක්සත් ජනරජ පෙරමුණ පැවැත්වූ මාධ්‍ය හමුවකදී ය.
ඔහු එහිදී පෙන්වා දුන්නේ ආණ්ඩුව බලයට පත්වීමට පෙර හාල් මෝල් හිමියන්ට එරෙහිව දැඩි ප්‍රකාශ කළ නමුත්, බලයට පත්වීමෙන් පසු ඔවුන් සමඟ එකඟතාවකට පැමිණ හාල් මිල ඉහළ දැමීමට කටයුතු කළ බවයි.
එසේම වැඩිදුරටත් අදහස් දැක්වූ ඔහු හාල් සහ පොල් මිල ඉහළ යාම සම්බන්ධයෙන් ආණ්ඩුව ජනතාවට ජනකාන්තවාදී බොරු ප්‍රකාශ කරන බවට වත්මන් ආණ්ඩුවට චෝදනා කළේය.
"මහ මෝල් හිමියන් කියනවා වී කිලෝ සීයකින් හාල් කිලෝ හැට දෙකයි දශම පහයි හදන්න පුළුවන් කියලා. කෘෂිකර්ම අමාත්‍යාංශය කියනවා වී කිලෝ සීයකින් හාල් කිලෝ හැට අටක් හදන්න පුළුවන් කියලා. පේරාදෙණිය විශ්ව විද්‍යාලයේ පර්යේෂණාගාරයේ ඉන්න මාරඹේ මැතිතුමා ඇතුළු අය කියනවා නෑ හැත්ත දෙකක් පුළුවන් කියලා. කුඩා මෝල් හිමියෝ කියනවා පනස් දෙකයි පුළුවන් කියලා. ඇත්තටම මේ පවරගත්ත, පනස් දෙක ගත්තත්, හැට දෙක ගත්තත්, හැට අට ගත්තත්, හැත්තෑ දෙක ගත්තත් ලංකාවේ හාල් හිඟයක් නැහැ. මේ සංඛ්‍යා ලේඛන දිහා බැලුවහම. එහෙනම් මොකක්ද මේ වෙලා තියෙන්නේ? ඉතාම පැහැදිලියි මේ බෙදා හැරීම සහ සහල් තොග පවත්වා ගැනීම පිළිබඳව විධිමත් දැනුමක් වෙළඳ ඇමතිට හෝ කෘෂිකර්ම ඇමතිට හෝ ජනාධිපතිට හෝ ඒ අදාළ ආයතන වලට නෑ."
ගැසට් එක අනුව ආහාර සාධාරණ මිලට ලබා දීමේ වගකීම පැවරෙන්නෙ වසන්ත සමරසිංහට..
"වසන්ත සමරසිංහ මැතිතුමා වාණිජ ඇමති හැටියට දිවුරුම් දෙද්දී එතුමාගේ ගැසට් නිවේදනයේ, එතුමා බලයට පත් කරපු ගැසට් නිවේදනයේ, බොහොම පැහැදිලිව තියෙනවා. එතකොට මේ මේ ගැසට් නිවේදනයට අනුව තමයි, මේ නිල ලියවිල්ලට අනුව තමයි එතුමාට මේ බලය ලැබිලා තියෙන්නේ. අලි ගම් වැදිලා මේ විනාශ වෙනවා. මාෆියාකාරයෝ හාල් හංගං ඉන්නවා වගේ උත්තර දෙන්න බෑ. මේක තමයි ඔහුගේ වගකීම. ඒ නිසා ඒ වගකීම ඔහු ඉටු කරනවා ඇතියි කියලා අපි බලාපොරොත්තු වෙනවා."
රටට කිසිදු ආදායමක් නොඑන හොර කවුලුවක් මේ ආණ්ඩුවෙනුත් විවෘත කරලා..
"ලංකාවට අදටත් ගෙන්නන ප්‍රධාන ආහාර ද්‍රව්‍ය වල ඒ රේගු දෙපාර්තමේන්තුවේ සහ දේශීය ආදායම් දෙපාර්තමේන්තුවේ බලපත්‍රවල විශේෂයෙන්ම අර තාවකාලික බලපත්‍ර වලින් තමයි සීයට හැට පහක් වෙන්නේ. ඒකෙන් රටට කිසිම ආදායමක් දෙන්නෑ. අන්න ඒ හොර කවුළුව මේ රජය විවෘත කරලා තියෙනවා නැවතත්. මේ රජය හොර කවුළුව විවෘත කරලා තියෙනවා."
මෙම තත්ත්වය පාලනය කිරීම සඳහා විධිමත් ක්‍රියාමාර්ගයක් ගන්නා ලෙසත්, ජනතාව ගැන සිතා කටයුතු කරන ලෙසත් හිටපු අමාත්‍යවරයා ආණ්ඩුවෙන් ඉල්ලා සිටියි.
පොල් මිල ඉහළ යාම සම්බන්ධයෙන් ද අදහස් දැක්වූ පාඨලී, ඉඩම් කට්ටි කිරීම, රිලවුන් සහ දඬු ලේන්නුන් වැනි සාධකවලට අමතරව, පොල් තෙල් නිෂ්පාදනයේදී සිදුවන අධික හානිය පිළිබඳව ද අවධානය යොමු කළ යුතු බව පැවසීය.
"රිලව්ගේ ප්‍රශ්නයක් නැහැ කියලා අපි කියන්නේ නැහැ. රිලව්ගේ ප්‍රශ්නයක් තියෙනවා පැහැදිලිව. දඬු ලේන්නුන්ගේ ප්‍රශ්නයක් තියෙනවා පැහැදිලිව. හැබැයි මේ දින පනහ ඇතුලේ ඇතිවෙච්ච ප්‍රශ්නයක් නෙවෙයි ඒක,"
සමහරු මේවා මේ ආණ්ඩුව බලයට පත්වීමෙන් පසු ඇති වූ ගැටලු ලෙස පෙන්වා දීමට උත්සාහ කරන බවට ද චෝදනා කළේය.
එසේම හාල් සහ පොල් යන දෙඅංශයේම ගැටලු විද්‍යාත්මකව විසඳීමට ආණ්ඩුව කටයුතු කළ යුතු බවත්, ජනතාවට ඇත්ත තත්ත්වය පැහැදිලි කළ යුතු බවත් ජනරජ නායකයා අවධාරණය කළේය.
"අතීතයේ ඔබ අනික් අයට මඩ ගැසීම සඳහා, ඇමතිවරුන්ට මඩ ගැසීම සඳහා, ඔවුන් අවඥාවට ලක් කිරීම සඳහා, නොයෙක් ආකාරයේ ප්‍රකාශ කළාට, දැන් ඔබ බලයේ ඉන්නේ. ඒ නිසා, ඒ ආකාරයට ක්‍රියා කරන්න,"
මෙහිදී මාධ්‍යවේදීන් විසින් අසන ලද ප්‍රශ්නවලට පාඨලී චම්පික රණවක මහතා ලබා දුන් පිළිතුරු මෙසේ ය.
ප්‍රශ්නය: දැන් අපිට පේන දෙයක් තමයි මේ වෙළඳපොලේ භාණ්ඩ මිල ඉහළ යනකොට ඒක පිටිපස්සෙන් තමයි මේ ගණන් උස්සගෙන එන්නේ. එතකොට රජයක් පාරිභෝගිකයා ගිහිල්ලා රජය එක්ක කතා කරලා තමන්ගේ දුක් ගැනවිල්ල කිව්වට අන්තිම ප්‍රතිඵලය තමයි පාරිභෝගිකයාට කීයක් හරි වැඩි වෙලා එන එක. ඒ කියන්නේ මේ මිල එන්නේ හිඟය සමග තමයි. එතකොට මේ හිඟය ඇති වුණහම මේකේ පහසුව වෙන්නේ හැමදාම පාරිභෝගිකයාට නෙමෙයි. ව්‍යාපාරිකයාට කියන එකනේ කියන්නේ.
පිළිතුර:
ඔව්, දැන් ඇත්තටම මේ ප්‍රශ්න සම්බන්ධයෙන් නිසි දත්ත තියෙනවා නම් කොහේද මේ වී තොග, පොල් තොග තියෙන්නේ කියන එක පිළිබඳව හා අස්වැන්න, දත්ත තියෙනවා නම් ඒක සොයාගෙන ඒකට පිළියම් යෙදීම තමයි රජයක් කළ යුත්තේ. ලොකු ළූණු ප්‍රශ්නය මතු වෙච්ච වෙලාවේ මේ ලොකු ලූණු වලින් අසීමාන්තික ලාභයක් ලබනවා. අනෙකුත් ආහාර ද්‍රව්‍යවල අසීමාන්තික ලාභයක් දරනවා කියලා.
අපි කොහොමද ඒ ප්‍රශ්නේ විසඳුවේ? වරායට ගියා කීයද කියලා බැලුවොත්, තොග වෙළෙන්දන්ගේ කීයද කියලා බැලුවොත්, සිල්ලර වෙළෙන්දගේ කීයටද කියලා බැලුවොත්, අතරමැදියාගේ කීයක්ද කියලා බැලුවා. ඒක ජනතාවට හෙළිදරව් කළා. ඒ කාලේ හැම සතියකම මගේ ෆේස්බුක් පිටුවේ අත්‍යවශ්‍ය ආහාර ද්‍රව්‍යවල මිල සටහන් කළා. ඒකෙන් විශාල වශයෙන් පාලනයක් ඇති වුණා. ඒ අපි ආණ්ඩුවේ ඉඳලා නෙමෙයි. ඒ අපි විපක්ෂයේ ඉඳන් කළේ.
එතකොට මේ සම්බන්ධයෙන් ව්‍යාජ හේතු ඉදිරිපත් කරන්නැතුව ප්‍රශ්න අවබෝධ කරගැනීමේ දැනුම් මට්ටමක ඉන්නවා නම් මේ පාරිභෝගිකයාට මේක දාන එක වැරදියි. මොකද පාරිභෝගිකයාගේ ආදායම් පසුගිය අවුරුදු තුනේම වැඩි වෙලා නැහැ. එකම ආදායම. හැබැයි සෑම දේකම මිල ගණන් දැන් උද්ධමනයක් නැහැ. අවධමනයක් තියෙනවයි කිව්වට මහ බැංකුව සෑම දේකම මිල ගණන් තුන් ගුණයකින් වැඩිවෙලා තියෙනවා. මේ අද දෙසිය තිහට යන හාල් රුපියල් අසූවයි මීට අවුරුදු තුනකට කලින්. එතකොට ඒ නිසා අපි මහජනයා විඳින දුක ගැන අවබෝධයකින් යුතුව කටයුතු කරනවා මිසක් ජනකාන්තවාදී දේවල් කිරීමෙන් මේක වෙන්නෑ. අර ගෝඨාභය මහත්තයත් කරන්න ගිය ටික ඔය ටිකම තමයි හමුදාව දාගෙන ඒ ටික දැන් මේ නිලධාරීන් දාගෙන කරන්න ගියහමත් ඔය ප්‍රතිඵලයම තමයි එන්නේ.
ප්‍රශ්නය: දැන් ඔබතුමා කිව්වා ජනාධිපතිවරණයට ඉස්සෙල්ලා නාඩු හාල් තිබ්බා එකසිය අනූවට කියලා. නමුත් මේක උස්සලා දුන්නට පස්සේ ආයි බහින්නේ නැහැ.
පිළිතුර:
නැහැ ඒක තමයි ඉතින් ඒකට හේතුව මේ මම පෙන්නලා දුන්නනේ. රටේ හාල් හිඟයක් නැහැ ලබන පෙබරවාරි වෙනකන්. එහෙම ප්‍රශ්නයක් නැහැ. අස්වැන්න ලබන පෙබරවාරි වලින් පස්සේ එකක් එන්න පුළුවන්. මොකද මහ කන්නයේ අස්වැන්න අඩුවීම නිසා. මහ කන්නයේ අස්වැන්න නිසා වෙන්න පුළුවන්. එහෙම ප්‍රශ්නයක් නැහැ. මෙතන වෙන ප්‍රශ්නයක් තියෙන්නේ. මේ සැපයුම් ජාලයේ වෙන ගැටලුවක් තියෙන්නේ. ඒකට අපි උත්තර දෙන්න ඕනේ. ඒක නැතුව ගොවියට තුවක්කු දෙනවා, රිලව් මරන්න, දඬු ලේන්නු මරන්න, අලි මරන්න, ඉත්තෑවෝ මරන්න කියලා නිකන් මිනිස්සු චූන් කරලා වැඩක් නැහැ.
ඇත්ත. මේ සත්තු විසින් විශාල විනාශයක් කරනවා. ලාල්කාන්ත මහත්තයා මතක තියාගන්න ඕනේ. ඔහු කෘෂිකර්ම ඇමති වෙලා ඉන්නේ, රටේ නීතියට අනුව. රටේ වෘක්ෂලතා වනජීවී පනත තියෙනවා. ඒ පනතට අනුව ආරක්ෂිත සතුන් කියලා ජාතියක් ඉන්නවා. ඒ වගේම අනාරක්ෂිත කට්ටියක් ඉන්නවා. එතකොට ඒ පනතට අනුකූලව මේ ඔහුට බැහැ පාර්ලිමේන්තුවේ කතාවක් පවත්වලා අපි මේ අයිතිය දෙනවයි කියලා කියන්න. එහෙනම් අර පනතට අනුව ඔහු කටයුතු කරන්න ඕනේ. මම ඔහුට කියනවා පුළුවන් නම් පාර්ලිමේන්තුවෙන් එළියේ කියන්න ඔය කටයුත්ත කියලා.
ඔහු එතකොට නීතිය කඩ කළා වෙනවා. එතකොට ඔහුට වෙනවා ඒ අනුව වනජීවී පනත අනුව නඩු භාරයකට මුහුණ දෙන්න. ඒ නිසා තමයි මේ පාර්ලිමේන්තුව ඇතුළට ගිහිල්ලා මේ වාගාඩම්බර ප්‍රකාශ කරන්නේ. ඉතින් දැන් ඔහු කළ යුත්තේ මොකක්ද? ඇත්තටම දඬු ලේන්නු, එහෙම නැත්නම් ඉත්තෑවෝ, එහෙම නැත්නම් රිලව් වැඩිවෙලා තියෙනවා නම් ඔහු කළ යුත්තේ මොකක්ද? වනජීවී නියම පිරිස ගෙන්නලා, පරිසරවේදිනුත් ගෙන්නලා, ගොවියොත් ගෙන්නලා, මේ ආරක්ෂිතයි කියන සත්තු ඕනෑවට වඩා වැඩිලා තියෙනවද? දැන් ඒගොල්ලෝ ආක්‍රමණශීලී වෙලා තියෙනවද කියලා. යම් දත්ත පද්ධතියක් අරගෙන, ඒ දත්ත පද්ධතියට අනුව ක්‍රියා කරන්න. දැන් උදාහරණයක් හැටියට ඔබට මතක ඇති, මම පරිසර ඇමති කාලේ හුඟක් දෙනෙක් කිව්වා, අලි වඳ වෙන්න යන්නේ කියලා. අපි කළා සමීක්ෂණයක්. සමීක්ෂණයක් කළහම පේනවා අලි වඳ වෙලා නැහැ කියලා. 1993 ඉඳන් 2008 වෙනකොට අලි ජනගහනය දෙගුණ වෙලා කියලා. එතකොට ඔය වගේ කතා ඕන තරම් කියන්න පුළුවන්. විද්‍යාත්මක ක්‍රියාදාමයකට එළඹෙන්න. එහෙම නැතුව මේ අර ඡන්දෙට කලින් කළා වගේ ජනකාන්තවාදී පම්පෝරි ගහන එක කරුණාකරලා නවත්තලා එන්න. නැත්නම් නීතිය කඩ කළා වෙනවා.
ප්‍රශ්නය: දැන් ඔය පහුගිය කාලේ නම් කතාවක් ආවා ජනප්‍රිය කතාවක් . පළපුරුද්ද තියෙන්න ඕනේ යමක් කරන්න කියලා. පහුගිය කාලේ පළපුරුදු අය ඕනෙ නෑ කිව්වා. ඔය පළපුරුදු අය අවුරුදු හැත්තෑ හයක් ඉඳලා කරපු දෙයක් නෑ කියලා. දැන් ඒ කියන්නේ ආයිත් පළපුරුදු කට්ටිය අවශ්‍ය වෙලා ද?
පිළිතුර:
පළපුරුදු කියන්නේ මේකයි. ඔය පළපුරුදු කියන එකේ ඉන්න හැම මිනිහම හොරු කියලනේ කිව්වේ. හැම මිනිහම බොරුකාරයෝ කියලනේ කිව්වේ.
හැම මිනිහම අශිෂ්ටයි කියලනේ කිව්වේ. එහෙම කියලනේ මේ බලයට ආවේ ශිෂ්ට සම්පන්න රජයක් ආණ්ඩුවක් හදනවා කියලා. අද කතානායකගේ ප්‍රශ්නෙන් මොකක්ද පෙන්නලා තියෙන්නේ? මොකක්ද කිව්වේ? කතානායකතුමා කිව්වේ ඔහුට ආචාර්ය උපාධියක් තියෙනවා කියලා වසේඩා කියලා විශ්ව විද්‍යාලයක ජපානයේ. දැන් පෙන්නලා තියෙනවා එහෙම උපාධියක් තියා ඔහු කවදාක්වත් ඒකෙ ශිෂ්‍යයෙක්වත් වෙලා ඉඳලා නැහැ කියලා. දැන් කවුද ඔහු එතකොට? ඔහු මේක කියලා නේද ගම්පහ දිස්ත්‍රික්කයේ ඡන්දේ ඉල්ලුවේ? ඊළඟට ඔහු මොරටු විශ්ව විද්‍යාලයේ රසායන ඉංජිනේරු විද්‍යා උපාධිධාරියෙක් කියලා කිව්වා. මම දන්නවා ඔහුව. මම තෙල් සංස්ථාව පාලනය කළා. මම දන්නවා ඔහු කාර්මික නිලධාරියෙක්. ඔහු මේ ආධුනිකත්ව මණ්ඩලයෙන් ආපු කෙනෙක්. ඉතින් මොකක්ද මේ?
නාමල් රාජපක්ෂගේ උපාධියට හිනා වෙච්ච ජනතා විමුක්ති පෙරමුණ, මර්වින් සිල්වාගේ ආචාර්ය උපාධියට හිනා වෙච්ච ජනතා විමුක්ති පෙරමුණ, චාමර සම්පත්ගේ බදුල්ලේ දෙකේ පන්තියට ගියා කියලා හිනා වෙච්ච අය, චාමර සම්පත් පාර්ලිමේන්තුවේදී කිව්වා අඩුගානේ මට උගත්කමක් නැහැ. මට ඉංග්‍රීසි බැහැ. මම සාමාන්‍ය වඩේ විකුණපු මිනිහෙක් කියලා කිව්වා. ඒ අවංකකම තියෙනවද මේ රන්වලට? චාමර සම්පත් ඒ ටික කියලා තමයි බදුල්ලෙන් ඡන්දේ ආවේ. මෙයා මොකක්ද ඇවිල්ලා තියෙන්නේ?
මේ චාමර සම්පත්ලට බැන්නට චාමර සම්පත්ලා දෙකේ පන්තියට චාමරයා ගියේ කිව්වට චාමර සම්පත් වලටත් වඩා තක්කඩි පහත් පිරිසක් නේද? මතක තියාගන්න, මේ ජනතා විමුක්ති පෙරමුණට ඡන්දේ දීපු මිනිස්සු බහුතරයක් නාගරික, උගත් මිනිස්සු ඡන්දේ දුන්නේ ඔය හාල් පොල් ප්‍රශ්න විසඳනවා කියලා හිතලම නෙමෙයි. ශිෂ්ට සම්පන්න රටක් ඇති කරයි. බොරු නොකියයි කියලා.
දැනටමත් පරක්කු වැඩියි. රන්වල ක්‍රියාවලියෙන් පෙන්නලා තියෙනවා පරණ තක්කඩිකම් ඒ විදිහටම සිද්ධ වේගෙන යන බව. මොකද හේතුව, මේ අය ඇතිවෙන්න හිනාවෙලා තියෙනවා අනිත් අයගේ දේවල් වලට.
ප්‍රශ්නය: ඔබතුමා ඉන්න කාලේ, ඛනිජ තෙල් සංස්ථා ඔහු සම්බන්ධයෙන් වෙනත් නඩුවක් තියෙනවයි කියලා කිව්වද?
පිළිතුර:
නැහැ. මම දන්නෑ. ඔහු ගැන ඔහු වෘත්තීය සමිති නායකයෙක් හැටියට තමයි මම ඔහුව හඳුනන්නේ. නමුත් දැන් ඔහුට කාලයක් දුන්නනේ දැන් සති ගානක් ඔහුගේ ආචාර්ය උපාධිය ඔප්පු කරන්න. මොරටු විශ්ව විද්‍යාලයේ ඔහු උපාධිධාරියෙක්ද නැද්ද කියන එක වෙබ් අඩවියේ බලන්න පුළුවන්නේ. එහෙම වෙබ් අඩවියේ ඔහුගේ නමක් නැහැ. ඉතින් ඒ නිසා මේවා මේ අතේ පැලවෙන ඒවා. ප්‍රශ්නේ මේකයි. අපගේ පරිපාලන රෙගුලාසි අනුව රාජ්‍ය සේවකයා කරනවා. මන්ත්‍රීවරයා රාජ්‍ය සේවකයෙක්. රාජ්‍ය සේවකයෙක් තමන්ගේ වැරදි සහතික පෙන්නලා ආවනම් අනුව මේ වෙලාවේ වැඩ තහනම් කරලා එළියට දාලා. ව්‍යාජ සහතික ඉදිරිපත් කිරීම පිළිබඳ අපරාධ නඩු පැනෙව්වට පස්සේ කීයද ගාන? අවුරුදු හතයි හිර දඬුවම.
මෙම මාධ්‍ය හමුවට එක් වූ එක්සත් ජනරජ පෙරමුණේ ප්‍රධාන ලේකම් බන්දුල චන්ද්‍රසේකර සඳහන් කළේ රට තුළ අත්‍යවශ්‍ය ආහාරවල හිඟයක් සහ මිල ඉහළ යාමක් පවතින අතර, ආහාර සුරක්ෂිතතාවය පිළිබඳව ජනතාව තුළ කනස්සල්ලක් ඇති ව තිබෙන බව ය.
“ජනතාව බලාපොරොත්තු වුණේ බලයට පැමිණි මේ ජාතික ජනබලවේගයේ අලුත් ආණ්ඩුව, ඔවුන් පහුගිය කාලය පුරාම ප්‍රකාශයට පත් කළ විදිහට ජනතාවට යම් සහනයක් ලබා දීලා, විශේෂයෙන් කාලයක් පුරා අපේ රටේ තුළ මේ ආහාර සම්බන්ධයෙන්, තිබෙන වෙළඳ මාෆියාව යටපත් කරලා, ආණ්ඩුව ජනතාවට සහනයක් ලබා දෙන විදිහට, තමන්ගේ සැලසුම් ඉදිරිපත් කරලා, ඒ කටයුතු කරයි කියලා.”
ජාතික ජනබලවේගය බලයට පත්වීමට පෙර ආහාර මිල පාලනය කර ජනතාවට සහන සැලසීමට පොරොන්දු වුවද, එම පොරොන්දු ඉටු කිරීමට අපොහොසත් වී ඇත. ආහාර ආනයනය සම්බන්ධයෙන් ආණ්ඩුවේ විවිධ පාර්ශ්ව විසින් පරස්පර ප්‍රකාශ නිකුත් කර ඇති අතර, එමඟින් ජනතාව තුළ ව්‍යාකූලත්වයක් ඇති වී තිබේ. ආහාර හිඟය සහ මිල ඉහළ යාම පිටුපස වෙළඳ මාෆියාවක් ක්‍රියාත්මක වන බවට සැකයක් පවතින අතර, ආණ්ඩුව එය මැඩලීමට අපොහොසත් වී ඇත. මේ අතර, ආහාර ආනයනය සම්බන්ධයෙන් ආණ්ඩුවේ විවිධ පාර්ශ්ව විසින් පරස්පර ප්‍රකාශ නිකුත් කර ඇති අතර, එමඟින් ජනතාව තුළ ව්‍යාකූලත්වයක් ඇති වී තිබේ.
“විදේශයෙන් හාල් ආනයනය කරන හාල් මෝල්, හාල් වෙළෙන්දෝ, තොග වෙළෙන්දෝ කියනවා එකසිය පනහ වෙනකොට අපි ගෙනාපු හාල් තියෙනවා. අවශ්‍ය නම් දෙන්න පුළුවන්. නමුත් දැන් දෙසිය තිහට. එතකොට මෙතන අනවශ්‍ය ලාභයක් ඒ වෙළෙඳුන් ලබනවද කියලා පිළිබඳ බලවත් සැකයකුත් මතු වෙමින් තියෙනවා. පහුගිය දවසේ වෙළඳ අමාත්‍යතුමාම කිව්වා අපි පිටරටින් හාල් ගේන්න බලපත්‍ර... නැතුව හාල් ගේන්නත් ප්‍රකාශයක් තිබ්බා. ඉතින් මේක එකිනෙකට පරස්පර ප්‍රකාශ අද මතු වෙලා තියෙනවා. ඒ නිසා මේ පිළිබඳ සත්‍ය දැන ගන්න, සත්‍ය ජනතාවට හෙළිදරව් කළ යුතුයි.”
වර්ෂාපතනය, ගංවතුර සහ වන සතුන්ගෙන් වගා බිම්වලට සිදුවන හානි හේතුවෙන් ආහාර නිෂ්පාදනය අඩාල වී ඇත. ආහාර සුරක්ෂිතතාවය සම්බන්ධ ගැටළු විසඳීම සඳහා ආණ්ඩුව විද්‍යාත්මක ප්‍රවේශයක් අනුගමනය කරන බවක් නොපෙනෙන බව ද ජනරජ ප්‍රධාන ලේකම්වරයා අවධාරණය කළේ ය.
@මාධ්‍ය ඒකකය
