කාලයක ඉදන් ලියන්න හිතාගෙන හිටියෙ Ayyappanum Koshiyum (2019) මලයාලම් නිර්මානය සහ එහි රීමේක් එක වන Bheemla Nayak (2022) තෙලිගු නිර්මායන් දෙක අතර පොඩි සංසදනාත්මක විචාරයක්.
පෞද්ගලිකව මම මේ සිනමාපට දෙකටම කැමතියි සහ නිර්මාණ දෙකෙහිම ධනාත්මක සහ ඍණාත්මක අංගයන්ගේ සංකලනයක් ඇතිබව තමයි මම මේ ලිපියෙන් කියන්න උත්සහ කරන්නෙ.
Ayyappanum Koshiyum (2019) සහ Bheemla Nayak (2022) යනු දැඩි අධිෂ්ඨාන ශක්තිය ඇති පුද්ගලයන් දෙදෙනෙකු වරදවා වටහාගැනීමක් සහ අවස්ථානුකූලව හැසිරීමට අපොහොසත් වීම නිසාවෙන් විහින් නිර්මානය කරගන්නා බල ඝට්ටනයක් ඉතාමත් හොදින් සිනමාපටයකට නැගූ අවස්ථාවන් පෙන්නුම් කරන චිත්‍රපට දෙකකි.
Ayyappanum Koshiyum යනු Sachy විසින් අධ්‍යක්ෂණය කරන ලද මුල් නිර්මාණය වන මලයාලම් චිත්‍රපටයයි, එහි ප්‍රධාන චරිත නිරූපණය කරන්නේ Prithviraj Sukumaran සහ Biju Menon වේ. චිත්‍රපටයේ ප්‍රබලත්වය පවතින්නේ මෙහි Prithviraj සහ Biju Menon යන දෙදෙනාගේම ප්‍රබල රංගනයන් මගින් ප්‍රේක්ෂකයන්ට චරිත දෙකටම සංවේදනය වීමට ඉඩ සලසන සූක්ෂම සහ යථාර්ථවාදී චරිත නිරූපණයන් සමගින් කතාවට ප්‍රබල විභේදනයක් සපයන ආතතිය හා චිත්තවේගීයව තෘප්තිමත් කිරීම නිසාය. චිත්‍රපටය පුරාවටම ප්‍රේක්ෂකයින්ව ඇද බැඳ තබා ගැන්මටම මනාව සැකසූ තිර රචනය හේතු වී ඇති අතර අධ්‍යක්ෂක චිත්‍රපටයේ සමස්ත වායුගෝලය ප්‍රකෘතිමත් කිරීම සඳහා ස්වභාවික භූ දර්ශන සහ සැකසුම් විශිෂ්ට ලෙස භාවිතා කිරීම මෙහි ධනාත්මක පැතිකඩ ලෙසත්, ප්‍රේක්ෂකයන්ට එම ප්‍රභේදයේම අනෙකුත් චිත්‍රපට හා සසඳන විට චිත්‍රපටය මන්දගාමී හෝ ක්‍රියාකාරීත්වයෙන් අඩු බවක් දැකිය හැකි අතර ඇතැම් සිද්ධීන් පුරෝකථනය කළ හැකි වීම ඍණාත්මක පැතිකඩවල් ලෙස සැලකිය හැක.
විටෙක අපි සිනමාපටයේ සතුරාගෙ චරිතයට දෙදෙනාගෙන් කෙනෙක් තෝරාගත්තත් ටිකක් දුර යනවිට ප්‍රේක්ශක අපිම ඔහුට අනුකම්පා කිරීමට සහ ඔහුව සිනමාපටයේ වීරයා ලෙස පිලිගැනීමට උත්සුක වන අයුරින්ද පෙර වීරයා ලෙස පිලිගත් පුද්ගලයාව එවිට සතුරා බවට පෙරලීමටද මෙම සිනමාපටය මගින් ප්‍රේක්ශකයාට සියුම් ලෙස බලපෑම් කිරීම ඉතාමත් විශ්මය ජනක කරුනකි. මෙම සිනමාපටයන්හි නැවත නැවතත් වීරයා සහ සතුරාව මේ පුද්ගල චරිත දෙක අතර දෝලනය කරමින් ප්‍රේක්ශකයාට ඒත්තු ගන්වන්නෙ මෙහි වීරයෙක් හෝ සතුරෙක් නොමැති බවත් ඔවුන් දෙදෙනාම බලවත් පුද්ගල චරිතවලින් හෙබි සාමාන්‍ය ජීවිතයේදී දක්නට ලැබෙන පුද්ගලයන් වැනි බවත් අවස්ථාව විසින් ඇති කෙරූ බල ඝට්ටනයක ප්‍රතිපලයක් බවත්ය.
ඔවුන් අතර ඇති මේ ආතතිය චිත්‍රපටය පුරාවටම පෙන්වමින් ප්‍රේක්ශකයාගේ රේඛීය දෘෂ්ටිකෝණය විනාස කර දමන ආකාරය නම් ඉතා විශිෂ්ට ලෙස මා දකිනවා.
Bheemla Nayak යනු Sagar K. Chandra විසින් අධ්‍යක්ෂණය කරන ලද මෙහි තෙළිඟු ප්‍රතිනිර්මානයයි. පවන් කල්‍යාන් සහ රානා ඩග්ගුබති ප්‍රධාන චරිත නිරූපණය කරන අතර මෙම චිත්‍රපටයත් මෙහි මුල් නිර්මාණය වන Ayyappanum Koshiyum මුත් අතර සැලකිය යුතු වෙනස්කම් කිහිපයක් කර ඇත. මූලික කතා පදනම එලෙසම පවතින අතරෙහිම, චිත්‍රපටය වඩාත් ක්‍රියාදාමයට නැඹුරු ප්‍රවේශයක් එක්කර සටන් ජවනිකා සහ ප්‍රයෝග කෙරෙහි වැඩි අවධානයක් යොමු කර ඇති අතර පවන් කල්‍යාන්ගේ භීම්ලා නායක් චරිතය larger than life hero ලෙසත්, රානා ඩග්ගුබතිගේ ඩැනී ශේකර් චරිතය වඩාත් සෘජු සහ ඉතා ප්‍රබල විරුද්ධවාදි‍යෙකු ලෙසත් පෙන්වීම මගින් චරිත නිරූපණයන් සාමාන්‍ය ජීවිතයෙන් මදක් ඔබ්බට ගොස් උලුප්පා දක්වන්නටද, ගමෙහි සිදුවන සිදුවීමද, චිත්‍රපටයේ උච්චතම අවස්ථාවද මුල් චිත්‍රපටයට වඩා ප්‍රචණ්ඩකාරී ලෙස නිරූපණය කිරීමට මෙම අධ්‍යක්ශකවරයා උත්සහ ගෙන ඇත. මෙහි Bheemla Nayak හි අවසානයේ ගෙනෙන Twist එකට මම පෞද්ගලිකව ඉතාමත් කැමති වූ අතර ප්‍රතිනිර්මානයක් වශයෙන් Bheemla Nayak හි චරිත තෝරාගැනීම නම් අනර්ඝ ලෙස කර ඇති බව තමයි මට හැගෙන්නේ. පවන් කල්‍යාන්ටත් වඩා රානාගේ රංගනය ඉතාමත් ඉහල මට්ටමක තිබීම මීට ප්‍රධාන හේතුවයි. රානා මෙම චරිතයට ඉතාමත් සියුම් අයුරින් කිදාබැස ඇතිබව ඔබටත් නරඹන විට වැටහෙනු ඇති බව නම් නිශ්චිතයි.
Bheemla Nayak, මුල් පිටපත තරම් සූක්ෂ්ම නොවන නමුත්, සිත් ඇදගන්නාසුළු කොටස් සහ එහි ප්‍රධාන නලුවන්ගේ ඒත්තු ගන්වනසුලු රංගනයන් සහිත ක්‍රියාදාම ඝනයට වැටෙන චිත්‍රපටයක් ලෙස දැකිය හැකිය.
චිත්‍රපටය සඳහා දෘශ්‍යමය වශයෙන් විස්මිත ලෝකයක් නිර්මාණය කරමින් දීප්තිමත් වර්ණ භාවිතය නිසා හොඳින් සැලසුම් කළ නිෂ්පාදනයක් බව පෙනෙන්නට ඇති අතර චිත්‍රපටය පුරාවටම ප්‍රේක්ෂකයින් නිරතුරුව බැදතබා ගන්නා වේගවත් හා උද්වේගකර ජවනිකා මෙහි ධනාත්මක පැතිකඩ ලෙස නම්කල හැකි අතර ඍණාත්මක පැතිකඩවල් ලෙස මුල් චිත්‍රපටයේ චිත්තවේගීය ගැඹුර සහ සූක්ෂමතාවය නොමැති බව, චරිත සඳහා සම්පූර්ණයෙන්ම ප්‍රේක්ශක ආකර්ශනය ලබාගැනීමට පහසුවන මුල් සිනමාපටයේ දක්නට ලැබෙන සරල බව ඉවත්කර තිබීමද, ක්‍රියාදාම දර්ශන මත අධික ලෙස රඳා පැවතීම නිසා ප්‍රචණ්ඩත්වය අධික ලෙස හුවාදැක්වීමක් කරතිබීමද ගත හැක.
සමස්තයක් වශයෙන්, මෙම සිනමාපට දෙකෙහිම ඔවුන්ගේම ශක්තීන් සහ දුර්වලතා ඇත. Ayyappanum Koshiyum එහි ප්‍රධාන නළුවන්ගේ ප්‍රබල රංගනයන් සමඟ වඩාත් සියුම් සහ චිත්තවේගීය තෘප්තිමත් කතාවක් ඉදිරිපත් කරන අතර, Bheemla Nayak යන ප්‍රතිනිර්මානය මගින් රසිකයන්ට නැරඹිය හැකි විනෝදාත්මක සහ දෘශ්‍යමය වශයෙන් විශ්මය ජනක ක්‍රියාදාම චිත්‍රපටයක් සපයා දී ඇත. කෙසේ වෙතත් මුල් පිටපත බලපු අයට නම් ප්‍රතිනිර්මාණය මුල් පිටපතේ ඇති සියුම් බව සහ හැඟීම්බර ගැඹුර නැති වතුර දැමූ පිටපතක් සේ දැනෙන්නට පුළුවන. නමුත් මාස් මසාල වැනි සිනමාපට රසවිඳින්න කැමති අයට Bheemla Nayak සුපිරියක් වන අතර ඉතාමත් තාත්වික සහ සියුම් ඩ්‍රාම ගනයේ සිනමාපට රසවිදින අයට Ayyappanum Koshiyum සිනමාපටය සුපිරියක් වෙන එක නම් නිසැකයි.
සටහන: Poorna Prabatha
උපුටාගැනීම - සිනමාවේදීන් - The Cinema People
