ජාතික ආරක්ෂාව ඉන්දියාවට ලියන ඊ-හැඳුනුම්පත් ගිවිසුම: එදා කළ හෙළිදරව්ව අද පාරාවළල්ලක් වෙයිද?

ශ්‍රී ලංකාවේ සමස්ත පුරවැසියන්ගේ අතිශය පෞද්ගලික ජීවදත්ත, විදේශීය සමාගමකට විශේෂයෙන්ම අසාදු ලේඛනගත කළ

ඉන්දියානු සමාගමකට පවරා දීමේ දැවැන්ත කුමන්ත්‍රණයක් පිළිබඳව ජන අරගල ව්‍යාපාරයේ වසන්ත මුදලිගේ විසින් අප්‍රේල් 30 වනදා ධීවර අමාත්‍යාංශය ඉදිරිපිටදී බරපතළ හෙළිදරව්වක් සිදු කරන ලදී. දත්ත ස්වෛරීභාවය (Data Sovereignty) පිළිබඳ බලවත් ප්‍රශ්නාර්ථයක් මතුකරන මෙම ක්‍රියාවලිය පිටුපස ඇති තාක්ෂණික, මූල්‍යමය සහ දේශපාලනික සත්‍යය විමර්ශනය කිරීමේදී පෙනී යන්නේ, මෙය හුදෙක් දේශපාලන චෝදනාවකට එහා ගිය ජාතික ආරක්ෂාව බිලිදෙන බරපතළ පාවාදීමක් බවයි.

1. 100%ක් නිමකළ දේශීය ව්‍යාපෘතියක් ඉන්දියාවට බිලිදීම

2012 වසරේ සිට ක්‍රියාත්මක වූ විද්‍යුත් හැඳුනුම්පත් (e-NIC) ව්‍යාපෘතිය වෙනුවෙන් ශ්‍රී ලංකා රජය මේ වන විටත් රුපියල් බිලියන 5.6ක් වැය කර ඇත. වසන්ත මුදලිගේ පෙන්වා දෙන්නේ තවත් රුපියල් මිලියන 600ක් පමණක් වැය කිරීමෙන් මෙය සම්පූර්ණයෙන්ම අවසන් කළ හැකිව තිබූ බවයි.

මෙම කාරණය රජයේ නිල ප්‍රගති වාර්තා සහ විගණන වාර්තා මගින්ද මනාව තහවුරු වේ.

• ව්‍යාපෘතියේ නවතම ප්‍රගති වාර්තාවට අනුව e-NIC ප්‍රධාන මෘදුකාංගය සංවර්ධනය කිරීම (e-NIC software development) 100%ක් ම අවසන් කර ඇත.

• මීට අමතරව, දත්ත මධ්‍යස්ථාන (DC සහ DRDC) සඳහා අවශ්‍ය දෘඩාංග මිලදී ගැනීමද 100%ක් අවසන්ය.

• ජෛවමිතික හඳුනාගැනීමේ පද්ධතිය (Automated Biometric Identification System - ABIS) මිලදී ගැනීමද 100%ක් සම්පූර්ණ කර තිබේ.

• දත්ත ලබාගැනීම සඳහා අවශ්‍ය ඇඟිලි සලකුණු යන්ත්‍ර, ඩිජිටල් අත්සන් ලබාගන්නා යන්ත්‍ර (Signature pads), USB කැමරා සහ ස්පර්ශ තිර (Touch Displays) යන්ත්‍ර 752ක් බැගින් ඒකක ස්ථාපිත කිරීමේ කාර්යයද 100%ක් ම අවසන් කර ඇත.

• ඊට අමතරව තොරතුරු තාක්ෂණ යටිතල පහසුකම් සහ හැඳුනුම්පත් මුද්‍රණය සඳහා වූ InfoID මෘදුකාංගය දේශීය වශයෙන් නිර්මාණය කර එහි සම්පූර්ණ අයිතිය (Source Code) 2014 වසරේ සිටම පුද්ගලයන් ලියාපදිංචි කිරීමේ දෙපාර්තමේන්තුව සතුව පවතින බව කෝප් කමිටු පිළිතුරු වාර්තා සහ විගණන වාර්තා පෙන්වා දෙයි.

මෙතරම් දුරට, එනම් සියයට සියයක්ම දේශීයව මෘදුකාංග හා දෘඩාංග ස්ථාපිත කර අවසන් කර ඇති ව්‍යාපෘතියක්, හදිසියේම පසෙකට දමා ටෙන්ඩර් කැඳවීමේ බලය පවා ඉන්දියාවට ලබාදෙන්නේ ඇයිද යන්න දැඩි සැකයකට තුඩු දෙන්නක් බව ජන අරගල සන්දානය පවසයි.

2. අසාදු ලේඛනගත ‘මැඩ්‍රාස් සෙකියුරිටි ප්‍රින්ටර්ස්’ සහ අනුරගේ එදා මෙදා වෙනස

වසන්ත මුදලිගේ පෙන්වා දෙන මෙම පාවාදීමේ වඩාත්ම ආන්දෝලනාත්මක සහ ඛේදනීය කාරණය වන්නේ, ටෙන්ඩරය ලබා දීමට යෝජිත සමාගමේ ස්වභාවය සහ ඒ සම්බන්ධයෙන් වත්මන් ජනාධිපති අනුර කුමාර දිසානායක ගේ ක්‍රියාකලාපයයි.

මෙම ව්‍යාපෘතියට අත පෙවීමට උත්සාහ කරන ඉන්දියානු "මැඩ්‍රාස් සෙකියුරිටි ප්‍රින්ටර්ස්" (Madras Security Printers) සමාගම යනු මෙරට සුරාබදු ස්ටිකර් වංචාවක් සම්බන්ධයෙන් අසාදු ලේඛනගත (Blacklisted) කරන ලද සමාගමකි. මීට පෙර ගෝඨාභය රාජපක්ෂ රජය (2021දී) සහ රනිල් වික්‍රමසිංහ රජය (2023දී) මෙම සමාගමට ව්‍යාපෘතිය ලබා දීමට උත්සාහ කළද, දැඩි සමාජ විරෝධය සහ සුදුසුකම් නොමැතිකම හේතුවෙන් එය වැළකී ගියේය. එහෙත් වසන්ත මුදලිගේ පෙන්වා දෙන්නේ අනුර දිසානායක රජය 2025 ජනවාරි මාසයේදී ඉන්දියාව සමග අත්සන් කළ නව ගිවිසුමකට අනුව ටෙන්ඩර් බලය ඉන්දියාවට ලබා දී ඇති බවත්, ඒ හරහා අසාදු ලේඛනගත මෙම සමාගම 2026 මාර්තු වන විට නැවතත් ටෙන්ඩරයට ඇතුළත් වී ඇති බවත්ය.

මෙම තත්ත්වය අතිශය උත්ප්‍රාසාත්මකය. මන්දයත්, විපක්ෂයේ මන්ත්‍රීවරයෙකුව සිටි සමයේ අනුර කුමාර දිසානායක මහතා පාර්ලිමේන්තුවේදී කෝටි 4100ක ටෙන්ඩරයක් අසාදු ලේඛනගත කළ සමාගමකට ලබාදීම සම්බන්ධයෙන් ඉතා දැඩිව හඬනගමින් ආණ්ඩුව ප්‍රශ්න කළ බැවිනි. එදා පාර්ලිමේන්තුව දෙවනත් කරමින් අසාදු ලේඛනගත සමාගම්වලට ටෙන්ඩර් දීමට එරෙහිව කතා කළ ඔහු, අද ජනාධිපති පුටුවේ හිඳගෙන ඉන්දියාවට බලය පවරා දෙමින්, ලංකාවේ අසාදු ලේඛනගත කළ සමාගමකටම රිංගා ඒමට පාර කපා දී ඇත්තේ කෙසේද යන්න බරපතළ ඛේදවාචකයකි.

3. දත්ත ස්වෛරීභාවය සහ ජාතික ආරක්ෂාව අවදානමේ

රටක පුරවැසියන්ගේ ජෛවමිතික දත්ත (ඇඟිලි සලකුණු, මුහුණේ ස්කෑන් දත්ත සහ ඇස්වල දත්ත) යනු ඒ රටේ ජාතික ආරක්ෂාවේ හදවතයි. මෙම දත්ත ගබඩාවේ පාලනය යම් විදේශීය රජයක් හෝ සමාගමක් සතු වීම යනු, සමස්ත ජාතියම ඔවුන්ගේ ඩිජිටල් යටත්විජිතයක් බවට පත්වීමයි. දත්ත පාලනය කරන පාර්ශ්වයට ජනතාවගේ සියලු හැසිරීම් නිරීක්ෂණය සහ පාලනය කිරීමේ හැකියාව හිමිවේ. වසන්ත මුදලිගේ ප්‍රකාශ කළ පරිදිම "ලංකාව ඉන්දියාවේ රූකඩ රාජ්‍යයක් හෝ ප්‍රාන්තයක් නොවේ." එසේ තිබියදී මෙරට ස්වාධිපත්‍යය විදේශ රටකට පවරන්නේ කාගේ වුවමනාවකටද?

රජය වහාම පිළිතුරු දිය යුතු ප්‍රශ්න:

• මෘදුකාංග සංවර්ධනය සහ දෘඩාංග ලබාගැනීම 100%ක් සම්පූර්ණ කර ඇති ව්‍යාපෘතියකට අලුතින් ඉන්දියානු මැදිහත්වීමක් ගෙන එන්නේ කාගේ කොමිස් කුට්ටියක් වෙනුවෙන්ද?

• ශ්‍රී ලංකාව තුළ කළු ලැයිස්තුගත කළ සමාගමක් නැවත සුදුසුකම් ලැබුවේ කෙසේද? ඔවුන් කළු ලැයිස්තුවෙන් ඉවත් කළේ කුමන පදනමක් මතද?

• එදා කෝටි 4100ක සැක සහිත ගනුදෙනුවක් ගැන කළු ලැයිස්තුගත සමාගම්වලට එරෙහිව පාර්ලිමේන්තුවේ ගිගිරූ වත්මන් ජනාධිපතිවරයා, අද මෙම පාවාදීමට ඉඩ දී නිහඬව සිටින්නේ ඇයි?

ඔබේ ඇඟිලි සලකුණු, ඔබේ අනන්‍යතාවය සහ ජෛවමිතික දත්ත කිසිදු වගවීමක් නැති, වංචාවලට සම්බන්ධ යැයි චෝදනා ලැබූ විදේශීය සමාගමකට ලබා දීම ගැන ඔබ එකඟද? තමන්ගේම රටේ බිලියන ගණනක බදු මුදල් යොදවා 100%ක් හදා නිමකළ පද්ධතියක් කුණු කූඩයට දමා, අපේ අනන්‍යතාවය ඉන්දියාවට පාවා දීමට එරෙහිව පුරවැසියන් ලෙස වහාම හඬක් නැගිය යුතුව ඇත. 

# විශේෂ ලියුම්කරුවකු විසිනි.