එල්.ටී.ටී.ඊ සංවිධානයට එරෙහිව පැවති යුද්ධයේ අවසන් අදියරේදී සිදුවූ බව කියන වැරදි සහ
චෝදනා තරයේ ප්රතික්ෂේප කරන හිටපු යුද හමුදාපති සහ වත්මන් ආරක්ෂක මාණ්ඩලික ප්රධානී ජෙනරාල් ශවේන්ද්ර සිල්වා, තමාට එරෙහිව එල්ල වන ඕනෑම නිශ්චිත චෝදනාවකට පිළිතුරු දීමට තමා සූදානම් බව ප්රකාශ කර සිටියි. එමෙන්ම, ජාත්යන්තරය විසින් තමාට සම්බාධක පැනවූ පදනම කුමක්දැයි ඔහු එහිදී ප්රශ්න කළේය.
ඉන්දියාව පදනම් කරගත් “Impact Stories” (ඉම්පැක්ට් ස්ටෝරීස්) නාලිකාව සමග පැවති සම්මුඛ සාකච්ඡාවකට එක්වෙමින් විශ්රාමික ජෙනරාල් සිල්වා කියා සිටියේ, ශ්රී ලංකා යුද හමුදාව දෙමළ ඊළාම් විමුක්ති කොටි (LTTE) සංවිධානයට එරෙහිව ඉතා වෘත්තීය මට්ටමින් සටන් කළ බවත්, අවසන් හමුදා මෙහෙයුමේදී සිවිල් වැසියන්ගේ ජීවිත හානි අවම කිරීමට උපරිමයෙන් කටයුතු කළ බවත්ය.
2009 වසරේ යුද්ධයේ අවසන් සමයේදී යුද හමුදාවේ 58 වැනි සේනාංකයට අණ දුන් ඒ මහතා ප්රකාශ කළේ, තමාට පනවා ඇති සම්බාධක සම්බන්ධයෙන් තමා කිහිප වතාවක්ම පැහැදිලි කිරීම් ඉල්ලා ඇති බවයි.
"ඇමරිකා එක්සත් ජනපදය මට සම්බාධක පැනෙව්වා, ඒ වගේම මෑතකදී එක්සත් රාජධානියත් මට සම්බාධක පැනෙව්වා. ඒ කුමකටද? මම කළ වැරැද්ද කුමක්ද කියා මට කියන්නැයි මම දිගින් දිගටම ඔවුන්ගෙන් අසනවා,"
යනුවෙන් ඔහු ප්රශ්න කළේය.
"මම යුද අපරාධකරුවෙක් නෙවෙයි. මම සටන් කළේ මගේ රට වෙනුවෙන්,"
යැයි පැවසූ ඔහු, තමා හමුදා නීතිය උල්ලංඝනය කර ඇත්නම්, ඒ සඳහා සුදුසු යාන්ත්රණයන් යටතේ විමර්ශනය කර දඬුවම් කළ යුතුව තිබූ බවද අවධාරණය කළේය.
යුද්ධයේ අවසන් අදියරේදී අණදීමේ වගකීම හරහා බරපතල මානව හිමිකම් උල්ලංඝනය කිරීම්වලට ඔහු සම්බන්ධ බවට විශ්වාසදායක තොරතුරු ඇති බව පවසමින්, ඇමරිකා එක්සත් ජනපදය 2020 වසරේදී ඔහුට සහ ඔහුගේ පවුලේ සාමාජිකයින්ට සංචාරක තහනමක් පැනවීය. පසුව, එක්සත් රාජධානිය ද ගැටුම් පැවති සමයේ මානව හිමිකම් උල්ලංඝනය කළ බවට චෝදනා කරමින් 2025 දී ඔහුට සම්බාධක පැනවීය.
සිවිල් ජීවිත හානි සහ මානුෂීය මෙහෙයුම්
හමුදාව විසින් හිතාමතාම සිවිල් වැසියන් ඉලක්ක කළ බවට එල්ල වන චෝදනා තරයේ ප්රතික්ෂේප කළ සිල්වා මහතා, සටන් අතරතුර සිවිල් වැසියන්ගේ මරණ සිදුවිය හැකි බව පිළිගත්තේය. "සිවිල් වැසියන්ගේ මරණ සිදුවන්නට ඇති, නමුත් ඒවා කිසිවක් හිතාමතා කළ දේවල් නෙවෙයි," යැයි ඔහු පැවසීය. හමුදා සැලසුම් සෑම විටම සිවිල් ජීවිත හානි අවම කිරීමට උත්සාහ කළ බවත්, අසල සිවිල් වැසියන් සිටින බව දුටු විට එම ඉලක්ක වෙත ප්රහාර එල්ල කිරීමෙන් වැළකී සිටි බවත් ඔහු තවදුරටත් පැහැදිලි කළේය.
අවසන් මෙහෙයුම් සමය සිහිපත් කළ හිටපු හමුදාපතිවරයා, සිය සේනාංකය විසින් සිවිල් වැසියන් 123,000 කට වැඩි පිරිසක් මුදාගත් බවත්, යුද්ධය අවසානයේ යටත් වූ 12,000 ක් පමණ වූ එල්.ටී.ටී.ඊ සාමාජිකයන්ගෙන් 75% කට වැඩි පිරිසක් තම සේනාංකයට යටත් වූ බවත් සඳහන් කළේය. යටත් වූ එල්.ටී.ටී.ඊ සාමාජිකයන් පසුව පුනරුත්ථාපනය කර සමාජගත කළ බව පැවසූ ඔහු, අවි බිම තැබූවන් කෙරෙහි හමුදාව අනුගමනය කළ මානුෂීය ප්රවේශය ඉන් මනාව පෙන්නුම් කරන බව ද පෙන්වා දුන්නේය.
විශාල එල්.ටී.ටී.ඊ සිරුරු ප්රමාණයක් සොයාගත් "වටලෑමේ මෙහෙයුමක්" ද ශවේන්ද්ර සිල්වා මෙහිදී සිහිපත් කළේය. මියගොස් සිටි පිරිස අතර එල්.ටී.ටී.ඊ සංවිධානයේ උතුරු පළාතේ ජ්යෙෂ්ඨ අණදෙන නිලධාරියෙකු ද වූ බවත්, ඔහු සිවිල් ඇඳුමින් සැරසී ආයුධයක් රැගෙන සිටි බවත් ඔහු පැවසීය.
"යමෙකුට කියන්න පුළුවන් මේ ඝාතනය කරලා තියෙන්නේ සිවිල් වැසියෙක් කියලා. නැහැ, ඔහු එල්.ටී.ටී.ඊ යේ උතුරේ අණදෙන නිලධාරියා,"
යැයි පැවසූ සිල්වා මහතා, සිවිල් ඇඳුමින් සැරසී සිටි සටන්කාමීන් පසුව සිවිල් වැසියන්ගේ ගිණුමට බැරවිය හැකි බවට තර්ක කළේය.
එල්.ටී.ටී.ඊ යට චෝදනා සහ ජාත්යන්තරයට අභියෝගයක්
යුද්ධයේ අවසන් අදියරේදී එල්.ටී.ටී.ඊ ය විසින් සිවිල් වැසියන් මිනිස් පළිහක් ලෙස යොදාගත් බවටත්, ඔවුන්ගේ පාලන ප්රදේශවලින් පිටවීමට ජනතාවට ඉඩ නොදුන් බවටත්, සිවිල් වැසියන් ගැවසෙන ස්ථාන ආසන්නයේ හමුදා උපකරණ ස්ථානගත කළ බවටත් ඔහු චෝදනා කළේය.
යුද්ධය සම්බන්ධයෙන් හමුදාවේ පාර්ශ්වය ජාත්යන්තරයට ඵලදායී ලෙස ඉදිරිපත් කිරීමට ශ්රී ලංකාවේ බලයට පත් වූ රජයන් අසමත් වූ බවට ඔහු විවේචනය කළ අතර, ශ්රී ලංකා හමුදාවට එරෙහි චෝදනාවලට විදේශයන්හිදී වැඩි අවධානයක් දිනා ගැනීමට එම තත්ත්වය හේතු වී ඇති බව පැවසීය.
ශ්රී ලංකා ආරක්ෂක අංශවලට එරෙහිව චෝදනා නගන රජයන්ගෙන් සහ ජාත්යන්තර සංවිධානවලින් ඔහු ඉල්ලා සිටියේ, චෝදනාවලට ලක්වූවන් සමඟ සෘජුවම සාකච්ඡා කර, කරුණු පැහැදිලි කිරීම සඳහා නිශ්චිත සිදුවීම් ඉදිරිපත් කරන ලෙසයි.
"සාකච්ඡාවකට එන්න," ඔහු කීවේය. "ඔබලා අහවල් දවසේ, අහවල් වෙලාවේ මේ දේ කළා කියලා අපට කියන්න, එවිට අපට එය පැහැදිලි කරන්න පුළුවන්. අපි යමක් කරලා තියෙනවා නම්, අපි එය භාරගන්නවා," ඔහු වැඩිදුරටත් පැවසීය.
එල්.ටී.ටී.ඊ සංවිධානය සමස්ත දෙමළ ප්රජාවම නියෝජනය කළ බවට වන ප්රකාශයන්ද ප්රතික්ෂේප කළ ශවේන්ද්ර, ජනතාවගේ දුක්ගැනවිලි සන්නද්ධ ප්රචණ්ඩත්වයෙන් නොව දේශපාලනිකව විසඳිය යුතු බව ප්රකාශ කළේය. එල්.ටී.ටී.ඊ යේ ඝාතන, මරාගෙන මැරෙන ප්රහාර සහ බලහත්කාරයෙන් බඳවා ගැනීම් උපුටා දැක්වූ ඔහු, එම සංවිධානයේ හෝ එහි ආධාරකරුවන්ගේ ක්රියාවන් සම්බන්ධයෙන් සමස්ත ජාතියකට හෝ ආගමික ප්රජාවකට දොස් නොපැවරිය යුතු බවට තර්ක කළේය.
හිටපු යුද හමුදාපතිවරයා වැඩිදුරටත් පවසා සිටියේ, හමුදාවේ අරමුණ වූයේ එල්.ටී.ටී.ඊ ය පරාජය කර සිවිල් වැසියන් ඔවුන්ගේ ග්රහණයෙන් මුදා ගැනීම බවත්, ශ්රී ලංකා ආරක්ෂක අංශ කිසිවිටෙකත් හිතාමතාම සිවිල් වැසියන්ට හිරිහැර නොකළ බවත්ය.
පසුබිම් සටහන:
ශ්රී ලංකාවේ අවසන් හමුදා මෙහෙයුම අඛණ්ඩව ජාත්යන්තරයේ දැඩි විමසිල්ලට ලක්ව තිබේ. එක්සත් ජාතීන්ගේ විමර්ශන සහ ජාත්යන්තර මානව හිමිකම් සංවිධාන චෝදනා කර ඇත්තේ ගැටුමේ අවසන් අදියරේදී රජයේ හමුදා සහ එල්.ටී.ටී.ඊ. සංවිධානය යන දෙපාර්ශ්වයම ජාත්යන්තර මානුෂීය සහ මානව හිමිකම් නීති බරපතළ ලෙස උල්ලංඝනය කර ඇති බවයි. කෙසේ වෙතත්, රජයේ හමුදා හිතාමතාම සිවිල් වැසියන් ඉලක්ක කළ බවට එල්ල වන මෙම චෝදනා ශවේන්ද්ර සිල්වා ඇතුළු ශ්රී ලංකාවේ හමුදා නායකයින් විසින් දිගින් දිගටම ප්රතික්ෂේප කරනු ලැබ ඇත.
මූලාශ්ර - The Island
