ශ්‍රී ලංකාවේ ත්‍රස්තවාදය වැළැක්වීමේ පනත (PTA) අහෝසි කර ඒ වෙනුවට
හඳුන්වා දීමට යෝජිත ‘රාජ්‍ය ත්‍රස්තවාදයෙන් සුරැකීමේ පනත් කෙටුම්පත’ (PSTB) සම්බන්ධයෙන් නීති ක්ෂේත්‍රයේ දැඩි කතාබහක් නිර්මාණය වී තිබේ. මීට ප්‍රධාන වශයෙන් හේතු වී ඇත්තේ ජ්‍යෙෂ්ඨ ජනාධිපති නීතීඥ රියෙන්සි අර්සකුලරත්න ගේ ප්‍රධානත්වයෙන් යුත් 17 දෙනෙකුගෙන් සමන්විත විශේෂඥ කමිටුවේ එකඟතාවන් සහ පාර්ලිමේන්තුවට ඉදිරිපත් කර ඇති අවසන් පනත් කෙටුම්පත අතර පවතින දැඩි පරස්පරතාවයයි.
කමිටු සාමාජිකයෙකු වූ ශ්‍රී ලංකා නීතීඥ සංගමයේ හිටපු සභාපති සාලිය පීරිස් පෙන්වා දෙන්නේ, ත්‍රස්තවාදය පුළුල් ලෙස නිර්වචනය කිරීම, අමාත්‍යාංශ ලේකම්වරයාට පැවරෙන පරිපාලනමය රඳවාගැනීම් සහ සංවිධාන තහනම් කිරීමේ බලය යන කරුණු සම්බන්ධයෙන් තමා ආරම්භයේදීම එකඟ නොවූ බවයි.
එසේම, රැඳවුම් කාලය සීමා කිරීම සහ ප්‍රමාණවත් සාක්ෂි නොමැති විට මහේස්ත්‍රාත්වරයාට ඇප ලබා දීමට ඇති බලය සම්බන්ධයෙන් කමිටුව එකඟතාවකට පැමිණ තිබුණද, අවසන් කෙටුම්පතෙන් එම ප්‍රතිපාදනද කමිටුව දැනුවත් කිරීමකින් තොරවම සම්පූර්ණයෙන්ම වෙනස් කර ඇති බව ඔහු අවධාරණය කරයි.
මෙම පනත දැනට පවතින ආකාරයටම සම්මත වුවහොත්, සාක්ෂි නොමැතිව වුවද සැකකරුවන් රිමාන්ඩ් කිරීමට මහේස්ත්‍රාත්වරුන්ට සිදුවන අතර, පැරණි PTA පනත මෙන්ම මෙයද දේශපාලනඥයින් සහ ආරක්ෂක අංශ විසින් අනිසි ලෙස භාවිතා කිරීමේ දැඩි අවදානමක් පවතී. ජාතික ආරක්ෂාවට ශක්තිමත් නීති අවශ්‍ය වුවද, විද්වත් කමිටු නිර්දේශ මෙලෙස වෙනස් කළේ ඇයිද යන්න රජය විසින් මහජනතාවට පැහැදිලි කළ යුතුව ඇත.
