නව සුනඛ නියාමන පනත පිළිබඳ විචාරයක්
සුරතල් සතුන්, විශේෂයෙන්ම සුනඛයන් සහ බළලුන් ඇති කිරීම ශ්රී ලාංකීය සමාජය තුළ
අතිශය ජනප්රිය මෙන්ම සංවේදී කාරණයකි. එහෙත්, මෙම "සංවේදී" මිනිස් හැසිරීම් පිටුපස සැඟවුණු අතිශය අසංවේදී සමාජ යථාර්ථයක් පවතින බව රහසක් නොවේ. මෑතකදී රජය විසින් ගැසට් කරන ලද “ජලභීතිකා තුරන් කිරීම හා සුනඛ ලියාපදිංචි කිරීමේ පනත් කෙටුම්පත” යනු හුදෙක් සෞඛ්යමය පියවරක් පමණක් නොව, මෙතෙක් කල් වගකීම් විරහිතව හැසිරුණු සමාජයකට කදිම ශික්ෂණයක් ලබාදෙන සමාජීය මැදිහත්වීමකි.
පහත දැක්වෙන්නේ එම පනත සහ ඊට අදාළ සමාජ පසුබිම පිළිබඳ විචාරයකි.
ව්යාජ සත්ව කරුණාව සහ අසල්වැසියාට වන පීඩාව
බොහෝ නිවාසවල සුරතලුන් ඇති කරන්නේ හුදෙක් තමන්ගේ මානසික තෘප්තියට හෝ ආරක්ෂාවටය. සමාජය ඉදිරියේ තමන් අතිශය සත්ව කරුණාවෙන් පිරි "සංවේදී" පිරිසක් ලෙස පෙනී සිටීමට මොවුන් උත්සාහ කළද, ප්රායෝගිකව ඔවුන්ගේ ක්රියාකලාපය ඊට හාත්පසින්ම වෙනස්ය. (තමන්ගේ බල්ලා වෙන්කරගෙන අනුන්ගේ බල්ලා හෝ දඩාවතේ යන බල්ලාට පොලු පහර දෙන්නෝ මෙම ඊනියා සංවේදී ජනතාවමය)
තම නිවස සහ මිදුල පිරිසිදුව තබාගන්නා අතරතුර, තම සුනඛයාගේ මළමුත්රා සහ කැත කුණු ටික අල්ලපු වත්තට, මහ පාරට හෝ පොදු ස්ථානයකට අතහැරීමට තරම් මෙම හිමිකරුවන් බොහෝදෙනෙකු සංවේදී වී ඇත. එපමණක් නොව, සතා වයසට ගිය විට, අංශභාගය වැනි රෝගී තත්ත්වයකට පත් වූ විට හෝ නඩත්තුව අපහසු වූ විට රහසේම ගෙන ගොස් පන්සලකට හෝ මහ පාරට මුදා හැරීම අද සාමාන්යකරණය වී ඇති අමානුෂික ක්රියාවකි.
මෙවැනි නීති රාමුවක් අවශ්ය වන්නේ මෙන්න මේ කියන "ඊනියා සංවේදී ප්රජාවට" වගකීම කුමක්දැයි බලහත්කාරයෙන් හෝ ඉගැන්වීමටය.
නව පනත මගින් ගෙන එන ප්රායෝගික විසඳුම්
ඉහත කී සමාජීය ගැටලුවලට සහ සෞඛ්යමය තර්ජනයන්ට නව පනත් කෙටුම්පත හරහා සෘජු සහ ප්රායෝගික විසඳුම් රැසක් යෝජනා කර ඇත.
- අනිවාර්ය ලියාපදිංචිය සහ වගකීම පැවරීම:
සති 06කට වැඩි සුනඛයන් වාර්ෂිකව ලියාපදිංචි කිරීම සහ එන්නත් කිරීම අනිවාර්ය කිරීම තුළින්, සුනඛයාගේ නීත්යානුකූල අයිතිය සහ වගකීම හිමිකරුට පැවරේ. මෙය සතුන් මහමග දමා යාම (Abandonment) පාලනය කිරීමට ගත හැකි හොඳම පියවරයි. රු. 2000ක දඩ මුදල මෙම නීතිය බලාත්මක කිරීමට මනා පිටිවහලකි.
- අයාලේ යන සුනඛයන් මානුෂිකව කළමනාකරණය:
දඩාවතේ යන සුනඛයන් ඝාතනය කිරීම වෙනුවට, ඔවුන් වන්ධ්යාකරණයට (CNVR ක්රමය) ලක්කර, සලකුණු කොට නැවත මුදාහැරීමටත්, ඒ දක්වා රැකබලා ගැනීමටත් පළාත් පාලන ආයතන වෙත වගකීම පැවරීම රජයේ සහ අදාළ ආයතනවල අතිශය ප්රශංසනීය, සංවේදී තීරණයකි.
- වාණිජ අභිජනනය (Dog Breeding) නියාමනය කිරීම:
මුදල් ඉපැයීමේ පරමාර්ථයෙන් පමණක් සතුන් සූරාකන, අවම පහසුකම් හෝ නොදී සුනඛයන් අභිජනනය කරන "පපි මිල්ස්" (Puppy Mills) නියාමනයට බලපත්ර ක්රමයක් හඳුන්වා දීම සත්ව හිමිකම් වෙනුවෙන් තැබූ දැවැන්ත ඉදිරි පියවරකි.
- ආනයන නියාමනය:
ආනයනික සුනඛයන් දින 30ක නිරෝධායනයකට ලක් කිරීම මගින් ජලභීතිකා වැනි මාරාන්තික රෝග රට තුළට පැමිණීම වැළැක්වීමට ගෙන ඇති පියවර සෞඛ්ය ආරක්ෂාව අතින් අතිශය වැදගත් වේ.
රජයට ස්තූතියි
සුරතලුන් ඇති කිරීම යනු හුදෙක් සතෙකුට කෑම බීම දීම පමණක් නොවේ. එය වසර 10-15ක් පුරාවට දිවෙන, සමාජයට ද බරක් නොවන පරිදි ඉටුකළ යුතු දැවැන්ත වගකීමකි. නීතියේ බලපෑමක් නොමැතිව ස්වයං-ශික්ෂණයකින් යුතුව මේවා ඉටුකිරීමට තරම් අපේ සමාජයේ බහුතරයක් තවමත් පරිණත වී නොමැත.
එබැවින්, සුරතලුන්ගේ නාමයෙන් අල්ලපු වත්තට කැත කුණු ටික අතහරින, සතා ලෙඩ වූ විට මහ පාරට පන්නන වගකීම් විරහිත සහ ඊනියා සංවේදී ප්රජාවට නිසි ශික්ෂණයක් ලබා දීම සඳහා අවශ්ය නීතිමය අඩිතාලම සකස් කර දීම සම්බන්ධයෙන් වත්මන් ආණ්ඩුවටත්, අදාළ බලධාරීන්ටත් සමස්ත පුරවැසියන්ගේ ගෞරවය සහ ස්තූතිය අනිවාර්යයෙන්ම හිමිවිය යුතුය. මෙම පනත හුදෙක් කඩදාසියකට සීමා නොකර, පළාත් පාලන ආයතන හරහා දැඩිව ක්රියාත්මක කිරීම තුළින් ශ්රී ලංකාව ජලභීතිකාවෙන් තොර, සතුන්ට මෙන්ම මිනිසුන්ටද නිදහසේ ජීවත් විය හැකි යහපත් සමාජයක් බවට පත් කරගත හැකි වනු ඇත.
