ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම යාමේ වයස සංශෝධනය කිරීම
ඇතුළු ප්රතිපාදන කිහිපයක් අන්තර්ගත ආණ්ඩුක්රම ව්යවස්ථාවේ 22 වැනි සංශෝධන පනත් කෙටුම්පත ඊයේ(07) රජයේ නිල ගැසට් පත්රයේ පළ කෙරිණි. බැලූ බැල්මට මෙය හුදෙක් නෛතික ලියවිල්ලක එක් වගන්තියක් වෙනස් කිරීමක් ලෙස පෙනුණද, පුළුල් දේශපාලන විද්යාත්මක කියවීමකට අනුව මෙය ප්රජාතන්ත්රවාදී සමාජයක් කාලීන අවශ්යතාවයන්ට අනුගත වෙමින් වඩාත් පරිණත වීමක් ලෙස මෙන්ම එය සිදුකළ ක්රියාවලිය අනුව මාලිමා ආණ්ඩුවේ පරිණවීමක්ද දැකිය හැකිය.
ව්යවස්ථාවක් යනු ගල් ගැසුණු ලියවිල්ලක් නොවේ
මේ සම්බන්ධයෙන් අදහස් දක්වන ආචාර්ය ලුම්බිණි ප්රියන්ත දේවසිරි පවසන්නේ, ව්යවස්ථාවක් වෙනස් විය යුත්තේ කවදාද යන ගැටලුව සෑම ප්රජාතන්ත්රවාදී රටක්ම කවදා හෝ මුහුණ දිය යුතුම තත්ත්වයක් බවයි.
ඇමරිකානු ආණ්ඩුක්රම ව්යවස්ථාවේ ප්රධාන නිර්මාතෘවරයෙකු වන තෝමස් ජෙෆර්සන් සඳහන් කළේ "පෘථිවිය අයිති ජීවත්ව සිටින්නන්ට" (the earth belongs to the living) බවයි. ඒ අනුව, කිසිදු පරම්පරාවකට අනාගත පරම්පරාවන් සදාකාලිකවම එක් රාමුවකට කොටු කළ නොහැක. සෑම පරම්පරාවකටම තම කාලයේ අවශ්යතා සහ අපේක්ෂාවන්ට සරිලන පරිදි සිය ආයතනික ව්යුහයන් නැවත හැඩගස්වා ගැනීමට පූර්ණ අයිතියක් ඇත.
විනිසුරුවරුන්ගේ විශ්රාම වයස වැනි කාරණා වර්තමාන සමාජයේ ඉහළ ගොස් ඇති ආයු අපේක්ෂාව, සෞඛ්ය තත්ත්වයන් සහ වෘත්තීය පරිණතභාවය මත අනිවාර්යයෙන්ම යාවත්කාලීන විය යුත්තකි. දශක ගණනාවක නෛතික අත්දැකීම් සහ ප්රායෝගික ඥානයෙන් පරිපූර්ණ විනිසුරුවරුන්ගේ සේවය තවදුරටත් රටට ලබා ගැනීම සමස්ත සමාජයටම කරන අගනා ආයෝජනයකි.
නම්යශීලීභාවය සහ ව්යවස්ථාපිත සදාචාරය
අනෙක් අතට, ජෙම්ස් මැඩිසන් අවධාරණය කළ පරිදිම ව්යවස්ථාවක් තුළ නම්යශීලීභාවයක් තිබිය යුතු අතරම, එය හුදු දේශපාලන පහසුවක් වෙනුවට පුළුල් ව්යවස්ථාපිත එකඟතාවයක් (Constitutional consensus) මත සිදුවීම අත්යවශ්ය වේ. ව්යවස්ථාවක සැබෑ ශක්තිය රඳා පවතින්නේ එය වෙනස් කළ නොහැකි තරමට දැඩි වීම මත නොව, සැබෑ ප්රතිසංස්කරණ සඳහා ඉඩ සලසන ප්රමාණවත් නම්යශීලීභාවයක් එයට තිබීම මතය.
දේශපාලන විද්යාත්මක හරය අනුව ගත් කල, ආණ්ඩුක්රම ව්යවස්ථාපිත සදාචාරය (Constitutional morality) යනු හුදෙක් නීතියට අනුකූල වීම පමණක් නොවේ.
බ්රිතාන්යයේ හිටපු අගවිනිසුරු විස්කවුන්ට් ගෝඩන් හෙවාර්ට් (Viscount Gordon Hewart) ප්රකාශ කළ සුප්රකට කියමනක් වන, "යුක්තිය ඉටුවීම පමණක් ප්රමාණවත් නොවන අතර, එය ඉටුවන බව පැහැදිලිව සහ නිසැකව පෙනෙන්නට තිබිය යුතුය" යන්න මෙහිදී ද අදාළ කරගත හැකිය.
විනිසුරුවරුන්ගේ විශ්රාම වයස යාවත්කාලීන කිරීම වැනි පියවරක් නිසි පාරදෘශ්යභාවයකින් සහ පුළුල් මහජන සුබසිද්ධිය වෙනුවෙන් යොදා ගන්නේ නම්, එයින් සමස්ත අධිකරණ පද්ධතිය කෙරෙහි ඇති මහජන විශ්වාසය තවදුරටත් තහවුරු වනු ඇත.
අනාගතය වෙනුවෙන් තබන පියවරක්
ප්රජාතන්ත්රවාදී පාලන ක්රමයක ගැඹුරුතම අරමුණ වන්නේ හුදෙක් බහුතරයකට පාලනය කිරීමට ඉඩ දීම පමණක් නොවේ. එම බලය සමස්ත සමාජයම සහ අනාගත පරම්පරාවන්ද ආරක්ෂා කරන මූලධර්මයන්ට යටත්ව ක්රියාත්මක වන බව සහතික කිරීමයි.
ප්රජාතන්ත්රවාදයක් නොනැසී පවතින්නේ, එය වෙනස් කිරීමට බලය ඇති පාර්ශ්වයන් එම ව්යවස්ථාපිත අධිකාරිය ඉතා විනයකින්, නිහතමානීව සහ මතු පරම්පරාවන් පිළිබඳ දැඩි අවබෝධයකින් යුතුව භාවිතා කරන බැවිනි. එබැවින්, 22 වැනි සංශෝධනය හරහා යෝජිත මෙම වෙනස දෙස බැලිය යුත්තේ හුදෙක් ආසන්න දේශපාලන ඇසකින් පමණක් නොව, එය ශ්රී ලංකාවේ ව්යවස්ථාපිත අනුපිළිවෙල මතු පරම්පරා ගණනාවකට ශක්තිමත් කරන, වඩාත් සාධාරණ සහ පරිණත සමාජයක් කරා ගෙන යන සාධනීය පියවරක් යන දාර්ශනික දෘෂ්ටිකෝණයෙනි.
# සමාරා
