ශ්‍රී ලංකා පොලිස්පති (IGP) තනතුර පුරප්පාඩු වී ඇති අතර, නිල පත්වීමක් සිදු කරන තෙක් පොලිස්පතිවරයාගේ රාජකාරි කටයුතු පරිපාලනය භාර ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන විසින් අධීක්ෂණය කරනු ලබන බව පොලිසිය පවසා ඇත..
පොලිස්පති සී.ඩී. වික්‍රමරත්න සේවා දිගු කිහිපයකින් පසු පසුගිය සෙනසුරාදා විශ්‍රාම ගියේය.
සී.ඩී. වික්‍රමරත්න 2019 වසරේ දී පොලිස්පතිවරයා ලෙස පත් කරන ලදී. පසුව ආණ්ඩුක්‍රම ව්‍යවස්ථා සභාවේ විරෝධතා නොතකා ඔහුට සේවා දිගු කිහිපයක් ලබා දෙන ලදී. ඔහුගේ විශ්‍රාම ගැනීම සිදුවන්නේ ශ්‍රී ලංකාව අපරාධ අනුපාත වැඩිවීමකට මුහුණ දී සිටින මොහොතක වීම විශේෂත්වයකි.
මේ අතර, බස්නාහිර පළාත් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් එම තනතුරට පත් කර ඇති බවට පළ වූ වාර්තාවලට ප්‍රතිචාර දක්වමින් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව කියා සිටියේ එවැනි පත්කිරීමක් මෙතෙක් සිදු කර නොමැති බවයි.
නව පොලිස්පතිවරයෙකු පත් කිරීම සම්බන්ධයෙන් ඉදිරියේදී ජනාධිපති ලේකම් කාර්යාලයෙන් නිවේදනයක් නිකුත් කිරීමට නියමිත බවත් මාධ්‍ය ප්‍රකාශකවරයා වැඩිදුරටත් පවසා ඇත.
මේ අතර, සියලුම පළාත් භාර ජ්‍යෙෂ්ඨ නියෝජ්‍ය පොලිස්පතිවරුන් විසින් ඔවුන්ගේ රාජකාරි කටයුතු අධීක්ෂණය කරනු ඇති බවද ඔහු පැවසීය.
නව පොලිස්පතිවරයෙකු පත්කිරීමේ ප්‍රමාදය විපක්ෂය, නීති විශාරදයින්, සිවිල් සමාජ කණ්ඩායම් ඇතුළු විවිධ පාර්ශ්වවල විවේචනයට ලක්ව ඇත. ඔවුන් තර්ක කරන්නේ මෙම ප්‍රමාදය පොලිසිය කෙරෙහි මහජන විශ්වාසය පළුදු කරන බවත්, වැඩිවන අපරාධ සම්බන්ධයෙන් ආමන්ත්‍රණය කිරීමට රජය දරන ප්‍රයත්නයන්ට බාධාවක් බවත්ය.
එ‌මෙන්ම පසුගිය කාලය පුරා වැඩිවූ අපරාධ රැල්ල පොලිස්පතිවරයෙකු තම ආගමනයට අවශ්‍ය ලෙස පසුබිම සකස් කිරීමක් ද යන්න පිළිබඳවත් සමාජ මාධ්‍යයේ කතිකාවට ලක්ව ඇත.
කෙසේ වෙතත්, ඉදිරි දිනවලදී නව පොලිස්පතිවරයෙකු පත් කිරීමට ජනාධිපතිවරයා බලාපොරොත්තු වන බවට ආරංචි සැපයුවද නව පොලිස්පතිවරයා කවුරුන්ද යන්න පිළිබඳ මේ වනතෙක් කිසිදු තොරතුරක් නොමැත.
වත්මන් ජ්‍යෙෂ්ඨතා ලැයිස්තුවට අනුව ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන, එල්. පතිනායක, දේශබන්දු තෙන්නකෝන් සහ අජිත් රෝහණ ප්‍රමුඛ තනතුරු සඳහා තරග වදින අය අතර වේ. නව පොලිස්පතිවරයෙකු පත් කිරීම ශ්‍රී ලංකා පොලිසියට සහ රටේ ආරක්ෂක තත්ත්වයට සැලකිය යුතු බලපෑමක් ඇති කරන තීරණාත්මක තීරණයකි.
රටේ අපරාධ අභියෝගවලට මුහුණ දීම සඳහා මහජන විශ්වාසය යළි ඇති කිරීමට සහ පොලිසියට නායකත්වය දිය හැකි දක්ෂ හා ගෞරවනීය පුද්ගලයකු ජනාධිපතිවරයා විසින් පත් කිරීම වැදගත් වේ.
@ඩේලි මිරර් පුවත ඇසුරිනි
