අසත්‍ය චෝදනා මත තමන්ව අත් අඩංගුවට ගෙන අධිකරණ ක්‍රියාවලිය අනිසි ලෙස භාවිතා කර රක්ෂිත බන්ධනාගාරගත කිරීම තුළින් තම ආත්ම ගෞරවයට කළ හානිය වෙනුවෙන්
පොලිස්පතිවරයා ඇතුළු ඉහළ පොලිස් නිලධාරීන් පිරිසකගෙන් රුපියල් කෝටි 100ක වන්දියක් අයකර දෙන ලෙස ඉල්ලමින් අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර මහතා කොළඹ දිසා අධිකරණය හමුවේ නඩුවක් ගොනුකර තිබේ.
පොලිස්පති සී.ඩී. වික්‍රමරත්න, බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන්, කොළඹ අපරාධ කොට්ඨාශයේ සහකාර පොලිස් අධිකාරී නෙවිල් සිල්වා, එහි පොලිස් පරීක්ෂක ජගත් නිශාන්ත සහ නීතිපතිවරයා මෙම නඩුවේ වග උත්තරකරුවන් වශයෙන් නම්කර ඇත.
කෝටිපති ව්‍යාපාරික මොහොමඩ් ෂියාම් ඝාතන සිද්ධියට අදාළව කළ විමර්ශන වලදී සොයා ගත් ගිනි අවි සම්බන්ධයෙන් පසු අවස්ථාවක කොළඹ අපරාධ කොට්ඨාශයේ නිළධාරීන් වෙනම විමර්ශනයක් කළ බවත් පොලිස්පතිවරයා සහ බස්නාහිර පළාත භාර ජ්‍යෙෂ්ඨ පොලිස්පතිවරයාගේ තීරණයක් අනුව මෙම විමර්ශනය පැවැත්වුණු බවත් CCD නිලධාරීන් එහිදී තමන්ට එරෙහිව ද්වේශ සහගත ලෙස පළිගැනීමේ චේතනාවෙන් කටයුතු කළ අතර පොලිස් අධිකාරී නෙවිල් සිල්වා සහ පොලිස් පරීක්ෂක ජගත් නිශාන්ත යන අය තමන්ට එරෙහිව අසත්‍ය ප්‍රකාශ සිදුකරන ලෙස විවිධ පුද්ගලයින්ට බලපෑම් කර තිබූ බවත් ශානි අබේසේකර මහතා සිය පෙත්සමෙන් කරුණු දක්වා ඇති බව සඳහන්.
@LNW
