ලංකා හොස්පිටල්ස් සහ ශ්‍රී ලංකා ටෙලිකොම් යන සමාගම්වල රජය සතු කොටස් හිමිකාරීත්වය විකුණා දැමීමට අමාත්‍ය මණ්ඩල අනුමැතිය හිමිව ඇති අතර
භාණ්ඩාගාර ලේකම් මහින්ද සිරිවර්ධන විසින් අදාළ ආයතනවල අධ්‍යක්ෂ මණ්ඩලවලට මේ සම්බන්ධයෙන් දැනුම් දී තිබේ.
මේ සම්බන්දයෙන් කොළඹ කොටස් වෙළෙඳපොළ වෙත දැනුම්දෙමින් ශ්‍රී ලංකා ටෙලිකොම් ආයතනය පවසන්නේ මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය යටතේ ස්ථාපිත රාජ්‍ය ව්‍යවසාය ප්‍රතිසංස්කරණ ඒකකය විසින් හඳුන්වා දී ඇති පරිදි අදාළ කොටස් විකිණීම ඉදිරියේදී සිදුවනු ඇති බවය.
මේ අතර ලංකා හොස්පිටල්ස් සමාගමද මේ බව සඳහන් කරමින් නිවේදනයක් නිකුත් කර ඇත.
ශ්‍රී ලංකා ටෙලිකොම් හි ප්‍රකාශිත කොටස් ප්‍රාග්ධනයෙන් 49.50%ක කොටස් අයිතිය මහා භාණ්ඩාගාරය සතුව පවතී.
එමෙන්ම ලංකා හොස්පිටල්ස් හි කොටස් ප්‍රාග්ධනයෙන් 51.34%ක හිමිකාරීත්වය පවතින්නේ රජය වෙනුවෙන් ශ්‍රී ලංකා රක්ෂණ සංස්ථාව සතුවය.
මේ අතර හිටපු මුදල් අමාත්‍යවරයෙකු වූ රවී කරුණානයක අද කියා සිටියේ අයිඑම්එෆ් කොන්දේසිවලට අනුකූලව රාජ්‍ය ආයතන වාණිජ්‍යකරණය කළ යුතුම බවයි.
දූෂණය පිරි අවපාලනයෙන් යුත් රාජ්‍ය ආයතන වානිජකරණය කළ යුතුමයි – රවී කරුණානායක
පවතින ආර්ථික හා දේශපාලන අර්බුද මධ්‍යයේ වුවද බාහිර ණය ගෙවීම් සහ සාර්ව ආර්ථික ගැලපීම් හා ව්‍යුහාත්මක ප්‍රතිසංස්කරණ වැඩසටහන් මුදුන්පත් කරගැනීම වෙනුවෙන් විදෙස් සංචිත ඉහළ නැංවීම අරභයා ජාත්‍යන්තර මූල්‍ය අරමුදලෙන් ලැබෙන ඩොලර් බිලියන 2.9ක විස්තීරණ ණය මුදල භාවිතා කෙරෙන බව හිටපු මුදල් ඇමති රවී කරුණානායක පවසයි.
ඔහු කියා සිටින්නේ, මෙමගින් අතිරේක ජාත්‍යන්තර මූල්‍ය සහාය උත්පාදනයෙහි ළා තෙආකාරයකින් උපකාරී වනු ඇති බවයි.
ලෝක බැංකුව, ආසියානු සංවර්ධන බැංකුව සහ අනෙකුත් බහුපාර්ශ්වීය අංශයන්ගෙන් ණය ලබාගැනීම සඳහා බොහෝ විට ජාත්‍යන්තර මූල්‍ය අරමුදල සමග’ ඇති කරගන්නා වැඩසටහනක් මූලික අවශ්‍යතාවක් වන බව ඔහු පැහැදිළි කර සිටියේය.
දෙවනුව, ස්ථාවරත්වය වෙනුවෙන් වන වැඩසටහනකදී ජාත්‍යන්තර මූල්‍ය අරමුදල විසින් සංවිධානය කරනු ලබන ආධාර දෙනු ලබන රටවල කණ්ඩායමක් රටේ සහාය සඳහා ඉදිරිපත් වනු ඇති බව ද හෙතෙම කීය. ඒ යටතේ ලැබෙන මූල්‍ය ආධාරවලින් වැඩි ප්‍රමාණයක් එක්වරකදී ලබාදෙන ණය හෝ අඩු පොලියක් යටතේ පිරිනැමෙන දීර්ඝකාලීන ණය වනු ඇත.
තෙවනුව, ජාත්‍යන්තර මූල්‍ය අරමුදල සමග වැඩසටහනකට එළැඹීමෙන් ගොඩනැංවෙන ආර්ථික ප්‍රතිසංස්කරණ පිළිබඳ විශ්වාසනීයත්වය භාවිතයෙන් පෞද්ගලික ප්‍රාග්ධන වෙළෙඳපොලින් තරගකාරී පොලී අනුපාත යටතේ අරමුදල් ලබාගැනීමට හැකිවන බව ද හිටපු මුදල් ඇමතිවරයා පැවසීය.
එමෙන්ම, ජාත්‍යන්තර මූල්‍ය අරමුදලේ ණය මෙරටට විවෘත වීමෙන් පසුව ලැබෙන සුවිශේෂ ප්‍රතිලාභයක් වනු ඇත්තේ, සියුම් ප්‍රතිපත්ති වෙනස්කම් මාලාවක් ක්‍රියාත්මක කිරීම වෙනුවෙන් ආණ්ඩුවට ඉඩකඩ ලැබීම බව ඔහු පෙන්වා දුන්නේය.
ප්‍රතිපත්ති උපදෙස්, හැකියා ගොඩනැංවීමේ ක්‍රියාකාරකම් සහ වෙළෙඳපොල පවතින පොලී අනුපාතවලට වඩා අඩු පොලී අනුපාත යටතේ සහනදායී මූල්‍ය ආධාර ද ජාත්‍යන්තර මූල්‍ය අරමුදල විසින් ලබා දෙයි.
ණය ස්ථාවරත්වය සහ මූල්‍ය හිඩැස් ආවරණය කිරීමට නම්, ශ්‍රී ලංකාවේ ණය නැවත ගෙවීම සඳහා ණය හිමියන්ගෙන් සහන සහ බහුපාර්ශ්වීය හවුල්කරුවන්ගෙන් අතිරේක මූල්‍ය පහසුකම් ද අවශ්‍ය වනු ඇත.
ණය ස්ථාවරත්වය ස්ථාපිත කිරීම සඳහා අවශ්‍ය වන මූල්‍ය සහතික ශ්‍රී ලංකාවේ නිල ණය ලබාදෙන්නන් විසින් ජාත්‍යන්තර මූල්‍ය අරමුදලට ලබාදී ඇති අතර, විස්තීරණ ණය පහසුකම මෙරටට ලැබීමට පෙර පෞද්ගලික ණය ලබාදෙන්නන් සමග සහයෝගීතා එකගත්වයකට ද එළැඹීම වෙනුවෙන් සද්භාවයෙන් යුත් උත්සාහයක් දැරීම තීරණාත්මක වනු ඇත.
ඉහළ තරගකාරිත්වයෙන් යුත් සහ අපනයනය පාදක කොටගත් ආර්ථිකයක් ගොඩනැංවීම සඳහා රජය විසින් මෙම ප්‍රතිපත්ති වෙනස්කම් හැකි ඉක්මනින් ක්‍රියාත්මක කළයුතු යැයි කරුණානායක මහතා අවධාරණය කර සිටියේ, ජනගහනයෙන් වැඩි පිරිසක් ආර්ථික දුෂ්කරතාවන්ට පත්වීම වැලැක්විය යුතු බවට ද අවධාරණය කරමිනි.
ආණ්ඩුව විසින් ජාත්‍යන්තර මූල්‍ය අරමුදලට පොරොන්දු 15ක් ලබා දී ඇති බව පෙන්වා දුන් ඔහු, මූල්‍ය ශක්තිමත්භාවය අරභයා ආණ්ඩුවේ ආදායම් ඉහළ නැංවීම සඳහා ප්‍රධාන බදු ප්‍රතිසංස්කරණ හඳුන්වාදීමට මුදල් අමාත්‍යංශයේ සහ මහබැංකුවේ ඉහළ නිලධාරීන්ට අවස්ථාව එළැඹී ඇති බව ද පැවසීය.
රාජ්‍ය අංශයේ ආයතන නිසා සිදුවන මූල්‍ය අවදානම අවම කරගැනීම සහ එවැනි ආයතන ප්‍රකෘතිමත් කිරීම වෙනුවෙන් ඉන්ධන සහ විදුලිබලය සඳහා වියදම් ප්‍රතිසාධනය පාදක කොටගත් මිළ ගණන් ක්‍රියාත්මක කිරීම ද මෙම පොරොන්දු අතර වේ.
සමාජ සුබසාධන වියදම් ඉහළ නංවා, දුප්පත් හා අවදානමට ලක්ව සිටින පිරිස් වෙනුවෙන් සහාය ලබාදීමේ සමාජ ආරක්ෂණ ජාලයෙහි ආවරණ සීමා පුළුල් කිරීම සහ වැඩිදියුණු කිරීමට ද යෝජනා කොට ඇත.
දත්ත ප්‍රේරක මුදල් ප්‍රතිපත්ති, මූල්‍ය ශක්තිමත්භාවය, මූල්‍යමය යෙදවීම් අදියර කිහිපයක් යටතේ සිදු කිරීම, මිළ ස්ථාවරත්වය ස්ථාපිත කිරීම සඳහා මහබැංකුවේ ශක්තිමත් ස්වාධිපත්‍යය, විදෙස් සංචිත ස්ථාපිත කිරීම වෙනුවෙන් වෙළෙඳපොල විසින් තීරණය කෙරෙන හා නම්‍යශීලී විනිමය අනුපාතික මෙන්ම නම්‍යශීලී උද්ධමන ඉලක්ක තන්ත්‍රයක් ද ආණ්ඩුව විසින් ජාත්‍යන්තර මූල්‍ය අරමුදලට ලබාදුන් පොරොන්දු අතර වෙයි.
එමෙන්ම, යහපත් සහ ප්‍රමාණවත් පරිදි වාසිදායක බැංකු පද්ධතියක් සහතික කරලීම මෙන්ම, නියාමන සම්මතයන් සහ මූල්‍ය අංශයේ සුරක්ෂිතා ජාලය ඉහළ නැංවීම ද සිදුකළ යුතුය.
මූල්‍ය විනිවිදභාවය, රාජ්‍ය මූල්‍ය කළමනාකරණය සහ දූෂණයට ඉඩදෙන තත්ත්ව පහළ හෙලීමේ නීති/ප්‍රතිපත්ති ද ආණ්ඩුව විසින් පිළිගෙන ඇත.
බොහෝ දුරට දූෂණය, අවපාලනය හා තාක්ෂණික අසමත්කම් හේතුවෙන් කාර්ය ඵලය පහත වැටී ඇති රාජ්‍ය ආයතන වානිජකරණය කිරීම අවශ්‍යයෙන්ම සිදු කළ යුතු බව පෙන්වා දුන් ඔහු, එම ආයතන තවදුරටත් රටට බරක් වීමට ඉඩ නොතබා ඒවායේ ප්‍රතිසංස්කරණ ක්‍රියාවලිය වේගවත් කළයුතු බව ද පැවසීය.
@Media Unit
