මේ විඩියෝ පටයේ දෙරණ හවුල් හිමිකාරිත්වයේ එක් පාර්ශවයක් ඇත්තටම කියන්නෙ මාධ්‍යකරණය යනු ජාවාරම්කාරයින්ගේ තීන්දු අනුව කෙරෙන
විකාශනයක් කියන කතාවයි.
මේ මාධ්‍යකරණය ගැන කෙරෙන පැහැදිලි කිරීම අතිශය විකෘති, ජාතිවාදී මතයක්. ඒක වැරදියි කියන්න පුළුවන් මාධ්‍යවේදීන් නැහැ.
කොතැන හිටියත් අද මාධ්‍යවේදීන් කියන්නේ ඒ කොන්තරාත් එක කරගහ ගෙන වීරයෝ වෙන්න හදන බාල පිරිසක්.
මොන ආයතනයක හිටියත් මොන පාටින් කතා කළත් මාධ්‍යවේදීන් කියන්නෙ එක්කො අන්තයට පිරිහුණු දේශපාලකයින්ට කඩේ යන, නැත්තං අන්ත දූෂිත ජාවාරම්කාරයින්ට කඩේ යන, තමන් සතු විශේෂ බලයක් ඇතැයි සිතාගෙන කටයුතු කරන පිරිසක්.
මේ අතර ඒවාට අකමැති නමුත් රැකියාව නිසා හැකි තරම් පරිස්සමින් තමන්ගෙ වැඩ කරන අයත් ඉන්නවා. පොලිසියෙත් රජයේ කන්තෝරු වලත් එහෙම වැදගත් නිලධාරීන් ඉන්නවා.
නමුත් මාධ්‍ය භාවිතය හැදිලා තියෙන්නෙ ඒ ඉතා සුළු පිරිසගෙන් නෙවෙයි. මාධ්‍ය භාවිතය හැදිලා තියෙන්නෙත් ඒ භාවිතය තව තවත් පිරිහෙන්නෙත් ලැජ්ජා නැතිව කාට හරි කඩේ යන බහුතරයගෙන්.
මේ අය නොදන්නා සහ දැන ගැනීමට උනන්දුවක් නැති ඉතාම වැදගත් කාරණාව තමයි,
01. මාධ්‍යවේදීන් කියන්නෙ මේ රටේ කම්කරුවන් තරම්වත් නිදහසක් ඇති පිරිසක් නෙවෙයි
පෞද්ගලික මාධ්‍ය ආයතන සියල්ලෙහිම ඉන්නා මාධ්‍යවේදීන්, ආණ්ඩුක්‍රම ව්‍යවස්ථාවෙන් සහතික කර ඇති 14(1) යටතේ ඇති සහ ශ්‍රී ලංකාණ්ඩුව බැඳී ඉන්නා ILO සම්මුතීන් 87 හා 98 මගින් සහතික කෙරුණු මේ රටේ සියලු සේවක සේවිකාවන්ට හිමි මූලික අයිතිවාසිකම් කිසිවකට මාධ්‍යවේදීන් හිමිකම් නොලබන බව.
වරායේ, රේල්ලුවේ, නිදහස් වෙළඳ කලාපවල කම්කරුවන් සතු වෘත්තිය සමිතියක් හැදීමේ අයිතිය, වෘ.ස. සාමාජිකත්වය ලබා ගැනීමේ අයිතිය, සාමුහිකව කේවල් කීරීම් අයිතිය, මහ ඉහළින් වැජඹෙන්නට යන මාධ්‍යවේදීන්ට නැති බව.
ඒ නිසා මාධ්‍යවේදීන් කියන්නෙ මේ රටේ කම්කරුවන් තරම්වත් නිදහසක් ඇති පිරිසක් නෙවෙයි. ඔවුන් කරන්නේ සත්‍ය වාර්තා කිරීම නොවේ. ඔවුන් කරන්නේ ඔවුන්ගේ අයිතිකාරයා කියන දේ පමණයි. ඒ නිසා මාධ්‍යවේදීන් නිවටයි. කිසිම මාධ්‍ය ආයතනයක නිදහස් වෙළඳ කලාපවල සේවක සේවිකාවන් මෙන් මාධ්‍යවේදීන් තමන්ගේ මූලික අයිතීන් ඉල්ලා උද්ඝෝෂණ කරනවා දකින්න නැත්තේ, අහන්න නැත්තෙ ඒකයි.
02. මාධ්‍යවේදීන් සතු සම්මුති ගැසිය නොහැකි වගකීම
විද්‍යුත් මාධ්‍ය යනු ජනතාව සතු සංඛ්‍යාත (frequencies) භාවිතයෙන් තොරව ලොව කොහේවත් පැවතිය නොහැකි මාධ්‍යයක්. ඒ නිසා විද්‍යුත් මාධ්‍ය අනිවාර්යෙන් පළමුව සමාජයට වගකිව යුතු, සමාජයට නිවැරදි කරුණු වාර්තා කළ යුතු මාධ්‍යයක්. මාධ්‍යවේදීන් සතු සම්මුති ගැසිය නොහැකි වගකීම එයයි.
ඒ වෙනුවට අයිතිකාරයාගේ න්‍යාය පත්‍රයට මාධ්‍යකරණයේ යෙදෙන්නන් දේශප්‍රේමීන් නොව, දේශද්‍රෝහීන් ය.
දෙරණ අයිතිකාරිය මේ විඩියෝවේ නොකියා කියන්නේ කිසිදු මූලික අයිතියක් ගැන නොදන්නා ඔවුන්ගේ ආයතනයේ මාධ්‍යවේදීන් දේශද්‍රෝහීන් යැයි කියලා.
ඒ නිසා තමන් කොන්දක් ඇති ස්වාධින මාධ්‍යවේදීන් යැයි දැන් මාධ්‍යවේදීන්ට කිව හැක්කේ ඇයගේ මාධ්‍යකරණය ගැන කතාවට එරෙහිව සමාජ කතිකාවක් පටන් ගැනීමෙන් පමණයි.
මේ, ඒ වෙනුවෙන් කෙරෙන අභියෝගයක්.
@Theleader.lk
