කොළඹ |
ඉන්දියාව සහ ශ්රී ලංකාව අතර පවතින බොදු සබඳතා තවදුරටත් සවිබල ගන්වමින්, ගුජරාටයේ
දේවිනී මෝරි (Devni Mori) පුරාවිද්යා භූමියෙන් හමුවූ පූජනීය බුද්ධ ධාතූන් වහන්සේලා අද (04) විශේෂ ගුවන් යානයකින් ශ්රී ලංකාවට වැඩම කරවන ලදී.
ඉන්දීය අග්රාමාත්ය නරේන්ද්ර මෝදි සිය අනුරාධපුර සංචාරය අතරතුරදී ලබා දුන් රාජ්ය තාන්ත්රික පොරොන්දුවක් ඉටු කිරීමක් ලෙස මෙම ධාතූන් වහන්සේලා වැඩම කරවීම සැලකේ. ජනාධිපති අනුර කුමාර දිසානායක සහ අටමස්ථානාධිපති අතිපූජ්ය ආචාර්ය පල්ලේගම හේමරතන නායක හිමිපාණන් සමඟ පැවති හමුවකදී මෙම පුණ්ය කටයුත්ත පිළිබඳ එකඟතාවය තහවුරු කෙරිණි.
රාජ්ය ගෞරව සහිත පිළිගැනීම මෙම සුවිශේෂී අවස්ථාව සනිටුහන් කරමින් ඉන්දීය ආරක්ෂක හමුදාවට අයත් විශේෂ ගුවන් යානයකින් ධාතූන් වහන්සේලා දිවයිනට වැඩම කරවූ අතර, ඒ සමඟ ඉහළ පෙළේ ඉන්දීය දූත පිරිසක් ද එක්ව සිටියහ:
-
ගුජරාට් ප්රාන්ත ආණ්ඩුකාරවරයා සහ නියෝජ්ය මහ ඇමතිවරයා.
-
ජාත්යන්තර බෞද්ධ සම්මේලනයේ (IBC) මහලේකම් සහ අධ්යක්ෂ ජනරාල්.
-
වරාණාසි, උසස් ටිබෙට් අධ්යයන මධ්යම ආයතනයේ උපකුලපතිවරයා.
-
පාලි සහ සංස්කෘත සම්ප්රදායන් නියෝජනය කරන මහා සංඝරත්නය.
ජනතා වන්දනාවට අවස්ථාව 'රාජ්ය අමුත්තන්' (State Guest) ලෙස සලකා පූර්ණ රාජ්ය ගෞරව ලබා දී ඇති මෙම ධාතූන් වහන්සේලා, කොළඹ ඓතිහාසික ගංගාරාම විහාරස්ථානයේ තැන්පත් කිරීමට නියමිතය.
ක්රි.ව. 3 හෝ 4 වන සියවසට අයත් යැයි සැලකෙන, අතිශය දුර්ලභ පුරාවිද්යාත්මක වටිනාකමකින් යුත් මෙම ධාතූන් වහන්සේලා වැඳ පුදා ගැනීමට මෙය ශ්රී ලාංකික බෞද්ධ ජනතාවට මහඟු අවස්ථාවක් වනු ඇත.
