පසුගියදා භාවිතය අත්හිටුවන ලද Ondansetron (ඔන්ඩැන්සෙට්රෝන්) එන්නත සම්බන්ධයෙන් පැන නැගී ඇති
තත්ත්වය පිළිබඳව එම ඖෂධය නිෂ්පාදනය කරන ඉන්දියාවේ Maan Pharmaceuticals Ltd සමාගම විසින් ලංකාවේ සෞඛ්ය බලධාරීන් වෙත විශේෂ ලිපියක් යොමු කර ඇත.
2025 දෙසැම්බර් 19 වන අද දිනැතිව යොමු කර ඇති මෙම ලිපිය මගින් ඔවුන් ප්රධාන ඉල්ලීම් කිහිපයක් ඉදිරිපත් කර තිබේ.
ශ්රී ලංකාවේ රෝහල් පද්ධතිය තුළ භාවිතය තාවකාලිකව අත්හිටුවන ලද Ondansetron (8mg/4ml) එන්නතෙහි ගුණාත්මකභාවය සම්බන්ධයෙන් පවතින සැකය නිරාකරණය කර ගැනීම සඳහා ජාත්යන්තරව පිළිගත් ස්වාධීන රසායනාගාරයක් හරහා පරීක්ෂණයක් පවත්වන ලෙස එහි නිෂ්පාදක Maan Pharmaceuticals සමාගම සෞඛ්ය බලධාරීන්ගෙන් ඉල්ලා සිටියි.
එම සමාගම විසින් සෞඛ්ය සේවා අධ්යක්ෂ ජෙනරාල්වරයා, ජාතික ඖෂධ නියාමන අධිකාරියේ (NMRA) සභාපති සහ ප්රධාන විධායක නිලධාරීවරයා ඇතුළු ඉහළ සෞඛ්ය බලධාරීන් වෙත මෙම ලිපිය යොමු කර ඇත.
නිෂ්පාදක සමාගම ඉදිරිපත් කරන ප්රධාන කරුණු:
ස්වාධීන පරීක්ෂණ සඳහා සාම්පල මුදා හැරීම: භාවිතය අත්හිටුවන ලද OD24021E, OD25009E, OD25024E, සහ OD25023E යන කාණ්ඩවලට (Batch Numbers) අයත් ඖෂධ සාම්පල ජාත්යන්තරව පිළිගත් රසායනාගාරයක පරීක්ෂා කිරීම සඳහා මුදා හරින ලෙස ඔවුන් ඉල්ලා සිටියි.
පිරිවැය දැරීම: මෙම ස්වාධීන පරීක්ෂණ සඳහා යන පිරිවැය නිෂ්පාදක සමාගම විසින්ම දැරීමට සූදානම් බව ඔවුන් දන්වා ඇත.
නිසි ගබඩාකරණය: පරීක්ෂණ සඳහා ලබාගන්නා සාම්පලවල විශ්වසනීයත්වය රැකගැනීම සඳහා ඒවා නිසි උෂ්ණත්ව සහ ගබඩා කොන්දේසි යටතේ පවත්වාගෙන ගිය ඒවා විය යුතු බව සමාගම අවධාරණය කරයි.
වගකීම සහ විනිවිදභාවය: ඖෂධයේ ගුණාත්මකභාවය සම්බන්ධයෙන් මතු වී ඇති ගැටලු විනිවිදභාවයකින් යුතුව විසඳා ගැනීමටත්, ඒ සඳහා පූර්ණ සහයෝගය ලබා දීමටත් තමන් බැඳී සිටින බව නිෂ්පාදක සමාගම යළිත් තහවුරු කර තිබේ.
අදාළ නිෂ්පාදන සමාගම විසින් මෙම ලිපියේ පිටපත් සෞඛ්ය අමාත්යවරයා සහ සෞඛ්ය අමාත්යාංශයේ ලේකම්වරයා වෙත ද යොමු කර ඇත.
ලෝක සෞඛ්ය සංවිධානයේ (WHO-GMP) සහ ISO 9001-2008 ප්රමිති සහතික ලත් ආයතනයක් ලෙස, තම නිෂ්පාදන පිළිබඳව පවතින මෙම සැකය විද්යාත්මක පදනමක් මත නිරාකරණය කර ගැනීමට හැකි ඉක්මනින් අවස්ථාව ලබා දෙන ලෙස Maan Pharmaceuticals සමාගම සෞඛ්ය බලධාරීන්ගෙන් වැඩිදුරටත් ඉල්ලා සිටියි.
