දිත්වා සුළි කුණාටුවෙන් විපතට පත් ශ්රී ලංකාවට මානුෂීය ආධාර රැගෙන ඒමට නියමිතව තිබූ පකිස්ථාන ගුවන් යානයකට,
ඉන්දීය ගුවන් කලාපය හරහා පියාසර කිරීමට අවසර ලබා දීම හිතාමතා ප්රමාද කළ බවට පකිස්ථානය එල්ල කළ බරපතල චෝදනාව ඉන්දියාව අද (03) දැඩි ලෙස ප්රතික්ෂේප කළේය.
නවදිල්ලිය මෙම චෝදනාව හැඳින්වූයේ "හාස්යජනක" සහ "සාවද්ය තොරතුරු මත පදනම් වූවක්" ලෙසයි.
මෙම සිද්ධියත් සමඟ දකුණු ආසියාවේ ප්රධාන න්යෂ්ටික බලවතුන් දෙදෙනා අතර පවතින රාජ්ය තාන්ත්රික උණුසුම, ශ්රී ලංකාවේ ආපදා සහන මෙහෙයුම් දක්වා ව්යාප්ත වී ඇති බවක් පෙනෙන්නට තිබේ.
පකිස්ථානයේ චෝදනාව: "පැය 60ක ප්රමාදයක්"
පකිස්ථාන විදේශ කටයුතු අමාත්යාංශය නිකුත් කළ නිවේදනයකට අනුව, ශ්රී ලංකාවට සහන ද්රව්ය රැගෙන යාම සඳහා ඉන්දීය ගුවන් කලාපය (Airspace) භාවිතා කිරීමට කළ ඉල්ලීමට ප්රතිචාර දැක්වීමට ඉන්දියාව අසමත් වීම හේතුවෙන් ඔවුන්ගේ සහන ගුවන් යානයට පැය 60කට වැඩි කාලයක් බලා සිටීමට සිදුවී ඇත.
එමෙන්ම, පසුව ඉන්දියාව ලබා දුන් සීමිත ගුවන් ගමන් අවසරය "මෙහෙයුම් අතින් ප්රායෝගික නොවන" (operationally unfeasible) එකක් බවත්, එය හිතාමතාම බාධා කිරීමක් ලෙස පෙනෙන බවත් ඉස්ලාමාබාද් බලධාරීන් චෝදනා කර තිබුණි.
ඉන්දියාවේ ප්රතිචාරය: "අපි අවසර දුන්නේ පැය 4යි විනාඩි 30න්"
මෙම චෝදනාවලට ප්රතිචාර දක්වමින් ඉන්දීය විදේශ කටයුතු අමාත්යාංශයේ (MEA) ප්රකාශක රන්ධීර් ජයිස්වාල් මාධ්ය හමුවේ ප්රකාශ කළේ පකිස්ථානයේ ප්රකාශයන් පදනම් විරහිත බවයි. ඔහු ඉදිරිපත් කළ කාලරාමුව (Timeline) පහත පරිදි වේ.
- දෙසැම්බර් 01 පස්වරු 1:00: පකිස්ථානයෙන් ගුවන් ගමන් නිෂ්කාශනය (Flight Clearance) සඳහා වන ඉල්ලීම ඉස්ලාමාබාද් හි ඉන්දීය මහ කොමසාරිස් කාර්යාලයට ලැබී ඇත.
- දෙසැම්බර් 01 පස්වරු 5:30: ඉන්දීය රජය අදාළ ක්රියාවලිය කඩිනම් කර පැය 4යි විනාඩි 30ක් වැනි කෙටි කාලයක් තුළ අවසරය ලබා දී ඇත.
රන්ධීර් ජයිස්වාල් අවධාරණය කළේ මෙම අනුමැතිය ලබා දී ඇත්තේ පකිස්ථානය විසින්ම ඉදිරිපත් කරන ලද ගමන් විස්තරයට සහ වේලාවන්ට අනුකූලව බවයි. "ආපදා අවස්ථාවකදී දේශපාලනය කිරීම කණගාටුදායකයි. අපි ශ්රී ලංකාවට උදව් කරන්න කැපවී සිටිනවා. පකිස්ථානයේ මෙම චෝදනා හුදෙක් වැරදි තොරතුරු සමාජගත කිරීමක්," යැයි ඔහු වැඩිදුරටත් පැවසීය.
ෂෙබාස් ෂරීෆ් සහ AKD අතර සාකච්ඡාවක්!
මේ අතර අද ජනාධිපති අනුර දිසානායක වෙත දුරකථන ඇමතුමක් ලබාදෙමින් පකිස්ථාන අගමැති ෂෙබාස් ෂරීෆ් ශ්රී ලංකාවේ දිට්වා සුළි කුණාටුවෙන් සිදු වූ ඛේදජනක ජීවිත හා දේපළ හානි සම්බන්ධයෙන් සිය බලවත් ශෝකය මීට මොහොතකට පෙර පළ කර තිබේ.
ශ්රී ලංකා ජනාධිපති අනුර කුමාර දිසානායක සමග දුරකථන ඇමතුමකින් පසුව යැවූ පණිවිඩයක, අගමැති ෂරීෆ් විපතට පත් පවුල්වලට හෘදයාංගම ශෝකය පළ කළ අතර අතිශය අභියෝගාත්මක තත්වයන් යටතේ ශ්රී ලංකා බලධාරීන්ගේ සහ ගලවා ගැනීමේ කණ්ඩායම්වල කඩිනම් සහ නිර්භීත ප්රතිචාරයට ප්රශංසා කළේය.
"අසල්වැසියෙකු සහ සහෝදර රටක් ලෙස, විශේෂයෙන් ශෝකජනක අවස්ථාවන්හිදී, පාකිස්තානය සැමවිටම ශ්රී ලංකාව සමඟ පූර්ණ සහයෝගීතාවයෙන් සිට ඇත," යනුවෙන් අගමැතිවරයා පවසයි.
ශ්රී ලාංකික ජනතාවට සහාය වීම සඳහා පාකිස්තානය වහාම අවශ්ය මානුෂීය ආධාර යවන බවත්, ජාතිය ව්යසනයෙන් යථා තත්ත්වයට පත්වන විට හැකි සෑම ආධාරයක්ම ලබා දෙන බවත් ඔහු පවසයි.
භූ-දේශපාලනික පසුබිම සහ ශ්රී ලංකාව
සාමාන්යයෙන් ඉන්දියාව සහ පකිස්ථානය අතර පවතින ආරක්ෂක සහ දේශපාලන එදිරිවාදිකම් නිසා, පකිස්ථාන හමුදා හෝ රාජ්ය ගුවන් යානාවලට ඉන්දීය ගුවන් සීමාව හරහා පියාසර කිරීම සීමා කර ඇත. කෙසේ වෙතත්, ස්වභාවික විපත් සහ මානුෂීය ආධාර බෙදා හැරීම්වලදී මෙම නීති ලිහිල් කිරීම සාමාන්ය සම්ප්රදායයි.
පකිස්ථානය ශ්රී ලංකාව සමඟ සමීප ආරක්ෂක සහ මිත්ර සබඳතා පවත්වන අතර, දිත්වා සුළි කුණාටුවෙන් පසුව ආධාර ලබා දීමට ඔවුන් ස්වේච්ඡාවෙන් ඉදිරිපත් විය.
කෙසේ වෙතත්, මේ වන විටත් ඉන්දියාව "ඔපරේෂන් සාගර් බන්ධු" (Operation Sagar Bandhu) යටතේ නාවික සහ ගුවන් හමුදා යොදවමින් ශ්රී ලංකාවේ සහන කටයුතුවල ප්රධානම හවුල්කරුවා බවට පත්ව සිටී. INS වික්රාන්ත් නෞකාව ද කොළඹ වරායේ සිට මෙම මෙහෙයුම්වලට දායකත්වය ලබා දෙයි.
දේශපාලන විචාරකයින් පෙන්වා දෙන්නේ, ශ්රී ලංකාව තුළ සිය බලපෑම සහ "ප්රථම ප්රතිචාර දක්වන්නා" (First Responder) ලෙස ඇති ප්රතිරූපය ආරක්ෂා කර ගැනීමට ඉන්දියාව උත්සාහ කරන අතරතුර, පකිස්ථානය ද කලාපීය සහයෝගීතාවය පෙන්වීමට උත්සාහ කරන බවයි. මෙම සිද්ධිය එම තරඟකාරීත්වයේ ප්රතිඵලයක් ලෙසද ඇතැමුන් හුවා දක්වයි.
කෙසේ වෙතත්, මෙම රාජ්ය තාන්ත්රික ගැටුම මැද ශ්රී ලංකාවට ලැබිය යුතු ආධාර ප්රමාද නොවීම වැදගත් බව කොළඹ බලධාරීන්ගේ අදහසයි.
