හදිසි ආපදා තත්ත්වය හේතුවෙන් පීඩාවට පත් වී ඇති ජනතාවට සහන සැලසීමේ කටයුතු
කඩිනම් කිරීම සඳහා මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය විසින් නව අයවැය චක්‍රලේඛයක් (අංක 05/2025) නිකුත් කර තිබේ.
2025 නොවැම්බර් 28 දිනැති මෙම චක්‍රලේඛය මඟින් සියලුම දිස්ත්‍රික් ලේකම්වරුන් සහ ප්‍රාදේශීය ලේකම්වරුන් වෙත උපදෙස් ලබා දී ඇත්තේ:
- රු. මිලියන 50ක කඩිනම් වියදම් බලය: උදා වී ඇති හදිසි තත්ත්වය යටතේ සහන සැපයීමට අදාළ භාණ්ඩ, වැඩ සහ උපදේශන නොවන සේවා ප්‍රසම්පාදන කටයුතු සඳහා ප්‍රාදේශීය ලේකම්වරයෙකුට රුපියල් මිලියන 50ක් (රු. 50,000,000/-) දක්වා වූ සීමාවක් යටතේ කිසිදු බාධාවකින් තොරව කටයුතු කළ හැකි බව ප්‍රසම්පාදන කොමිෂම දැනුම් දී ඇති බැවින්, ඒ අනුව ක්‍රියා කරන ලෙස දන්වා ඇත. මෙම කටයුතු 'ප්‍රසම්පාදන මාර්ගෝපදේශ සංග්‍රහය සහ අත්පොත - 2024' හි 3.1.8 වගන්තියට අනුකූල විය යුතුය.
- මූල්‍ය බලය පැවරීම: මෙම රුපියල් මිලියන 50 දක්වා වැය කිරීමේ මූල්‍ය බලතල ප්‍රාදේශීය ලේකම්වරුන්ට කඩිනමින් ලබා දීමට දිස්ත්‍රික් ලේකම්වරුන් පියවර ගත යුතු වේ.
- අමතර අරමුදල් ඉල්ලීම්: ආපදාවට පත් ජනතාවට සහන සැලසීමට තවදුරටත් දැරිය යුතු වියදම් වේ නම්, දිස්ත්‍රික් ලේකම්වරුන් විසින් රාජ්‍ය පරිපාලන අමාත්‍යාංශයේ ලේකම්වරයා සහ ජාතික අයවැය අධ්‍යක්ෂ ජනරාල්වරයා හරහා මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය වෙත ඇස්තමේන්තු ඉදිරිපත් කළ යුතු වේ.
මෙම පියවර මඟින් ආපදා තත්ත්වය හමුවේ සහන සේවා කටයුතු ඉක්මනින් හා කාර්යක්ෂමව සිදු කිරීමට මූල්‍යමය බාධා ඉවත් කර ඇති බව සඳහන් වේ.
