හිටපු ජනාධිපති රනිල් වික්‍රමසිංහ ට එරෙහිව ඇති මහජන මුදල් රුපියල් මිලියන 16.6ක් අවභාවිත කිරීමේ චෝදනාවට අදාළව,
අපරාධ පරීක්ෂණ දෙපාර්තමේන්තුවේ (CID) කණ්ඩායමක් නීතිපති දෙපාර්තමේන්තුවට කිසිවක් නොදන්වාම එක්සත් රාජධානිය (UK) බලා පිටත්ව ගොස් තිබේ.
මෙම විමර්ශනය සඳහා වැය වන මුදල, චෝදනා කරන ලද මුදල වන රුපියල් මිලියන 16.6ට වඩා දෙතුන් ගුණයකින් වැඩි වන බවට ඒ අනුව ඉඟි පළවෙමින් ඇත.
CID නියෝජ්‍ය පොලිස්පතිවරයෙකු ඇතුළු පස් දෙනෙකුගෙන් යුත් මෙම කණ්ඩායමේ UK සංචාරයේ ප්‍රධාන අරමුණ වී ඇත්තේ, හිටපු ජනාධිපතිවරයාට වුල්වරහැම්ප්ටන් විශ්වවිද්‍යාලයෙන් (Wolverhampton University) ලැබුණු බව කියන ආරාධනා පත්‍රයේ සත්‍යතාව තහවුරු කර ගැනීමයි.
මෙම කණ්ඩායම විසින් හෙට (17) දින (සඳුදා) එවකට එක්සත් රාජධානියේ ශ්‍රී ලංකා මහ කොමසාරිස්වරිය ලෙස කටයුතු කළ සරෝජා සිරිසේන ගෙන් ප්‍රකාශයක් සටහන් කර ගැනීමට නියමිත බව සන්ඩේ ටයිම්ස් පුවත්පතේ මාධ්‍යවේදී රංජිත් පද්මසිරි වාර්තා කරයි.
කෙසේ වෙතත්, මෙම ජාත්‍යන්තර විමර්ශනය සහ CID කණ්ඩායම පිටත්ව යාම පිළිබඳව නීතිපති පරින්ද රණසිංහ ඇතුළු නීතිපති දෙපාර්තමේන්තුවේ ඉහළම නිලධාරීන් කිසිවෙකුත් දැනුවත්ව නොසිටීම දෙපාර්තමේන්තුව තුළම පුදුමයට හා අභ්‍යන්තර කතිකාවට හේතුවී ඇත. සාමාන්‍යයෙන් මෙවැනි වැදගත් පරීක්ෂණ සඳහා නීතිපතිවරයාගේ උපදෙස් ලබාගැනීම සම්ප්‍රදායික ක්‍රියා පටිපාටිය වුවද, CIDය මෙහිදී ස්වාධීනව කටයුතු කර තිබේ.
මෙම අධික වියදම් සහිත විමර්ශනය සම්බන්ධයෙන් වික්‍රමසිංහ ගේ පාර්ශ්වයෙන් කලින් සිටම විවේචන එල්ල වී තිබුණි. චෝදනාවේ පදනමක් නොමැති බව අවධාරණය කරන ඔවුන්, CIDයට අවශ්‍ය නම් එරටට ගොස් විමර්ශන සිදුකරමින් නිවාඩුවක් ගත කරන ලෙසට නීතිඥයෙකු හරහා උසාවියේදී උපහාසාත්මක අදහසක් පවා ඉදිරිපත් කර තිබුණි.
කෙසේ වුවද මේ වනවිට මහජන මුදල් අවභාවිතය පිළිබඳව පරීක්ෂණයක් කරමින්, ඊට වඩා විශාල මහජන මුදලක් වියදම් කිරීමේ තාර්කිකත්වය පිළිබඳව දේශපාලන සහ සිවිල් සමාජය තුළ ප්‍රශ්න කිරීම් මතුවෙමින් තිබේ.
