කොළඹ - කොළඹ තුම්මුල්ල ප්‍රදේශයේ ඉදිකිරීමට යෝජිත 'ෆෙන්ටාරා හෝම්ලෑන්ඩ්'
සුපිරි නිවාස ව්‍යාපෘතිය සම්බන්ධයෙන් නාගරික සංවර්ධන නියාමනයන් කඩකිරීමේ චෝදනා එල්ලවීමෙන් පසු උද්ගත වූ තත්ත්වය මේ වන විට ජනාධිපති කාර්යාලය දක්වා ගමන් කර ඇති බව වාර්තා වේ.
අදාළ ව්‍යාපෘතියේ හිමිකරු වන නලින් හේරත් (Home Lands) පසුගිය දිනක ජනාධිපති අනුර කුමාර දිසානායක හමු වී, ව්‍යාපෘතිය නවතා නොදමන ලෙස ඉල්ලීමක් කර ඇතැයි ජනාධිපති කාර්යාල ආරංචිමාර්ග වාර්තා කර ඇත.
අක්‍රමිකතා හේතුවෙන් සභාපති ඉවත් කරයි
මෙම හමුවට පෙර, අලුතින් නාගරික සංවර්ධන අමාත්‍යාංශයේ විෂය භාර අමාත්‍යවරයා ලෙස පත් වූ බිමල් රත්නායක විසින් අදාළ ව්‍යාපෘතියට අනුමැතිය ලබා දීමේදී ඉදිකිරීම් නියාමනයන් උල්ලංඝනය කළ බවට චෝදනා එල්ල වූ නාගරික සංවර්ධන අධිකාරියේ (UDA) සභාපතිවරයාට ධුරයෙන් ඉවත් වන ලෙස දැනුම් දී ඇත. වාර්තා වන පරිදි, නාගරික නියාමනයන් උල්ලංඝනය කරමින්, අනුමත කළ හැකි මහල් ප්‍රමාණයට වඩා තට්ටු තිස් පහක් පමණ වැඩිකරමින්, ව්‍යාජ කරුණු ඉදිරිපත් කර අනුමැතිය ලබා දී ඇති බවට හිටපු සභාපතිවරයාට එරෙහිව චෝදනා එල්ල වී තිබේ.
අමාත්‍ය බිමල් රත්නායක ගේ උපදෙස් පරිදි, අමාත්‍යාංශයේ ලේකම්, ජ්‍යෙෂ්ඨ මහාචාර්ය කපිල සී.කේ. පෙරේරා නාගරික සංවර්ධන අධිකාරියේ වැඩබලන සභාපතිවරයා ලෙස පත්කර ඇති අතර, UDA ආයතනය තුළ පවතින අක්‍රමිකතා සහ දූෂණ සම්බන්ධයෙන් දැඩි පරීක්ෂණයක් ආරම්භ කිරීමට නියමිත බව අමාත්‍යාංශ ආරංචි මාර්ග තහවුරු කරයි.
නීති විරෝධී ඉදිකිරීම් චෝදනාව
'පෙන්ටාරා හෝම්ලෑන්ඩ්' ව්‍යාපෘතියට එල්ල වී ඇති ප්‍රධානතම චෝදනාව වන්නේ, කොළඹ නාගරික ඉදිකිරීම් නියාමනයන් යටතේ අනුමැතිය දිය හැකි සීමාව ඉක්මවා යමින්, තට්ටු 40ක් ඉදිකිරීමට සැලසුම් කර තිබීමයි. නාගරික නියාමනවලට අනුව, මෙවැනි ඉහළ මහල් සීමාවක් සඳහා ගොඩනැගිල්ලට පිවිසෙන මාර්ගයේ පළල ඇතුළු නාගරික කලාපයට අදාළ ප්‍රමිතීන් ද සපුරාලිය යුතු ය.
- නියාමන උල්ලංඝනය: වාර්තාවලට අනුව, මෙම ව්‍යාපෘතියට අදාළව නීතියෙන් අවශ්‍ය වන මීටර් 40ක පළල සීමාව ව්‍යාපෘති ඉඩම සතු නොවන බවට ප්‍රබල චෝදනා එල්ල වේ. අදාළ නියාමනයන් යටපත් කරමින් සහ යාබද මාර්ග කොටස් පෙන්වමින් නීතියට පටහැනි අයුරින් කෙටි කාලයක් තුළ අනුමැතිය ලබාගෙන ඇති බවට විමර්ශනවලදී අනාවරණය වී ඇත.
- අධිකරණ ක්‍රියාමාර්ග: මේ හේතුවෙන්, අදාළ නීති විරෝධී ඉදිකිරීමට එරෙහිව ප්‍රදේශයේ නේවාසික පදිංචිකරුවන් කිහිප දෙනෙකු විසින් මේ වන විටත් අධිකරණයේ නඩු ගණනාවක් ගොනු කර ඇත.
ව්‍යාපාරිකයා ජනාධිපති හමුවෙයි
මේ අතර, ව්‍යාපෘතියේ ඉදිකිරීම් කටයුතු නතර වීමේ අවදානමක් පවතින පසුබිමක, හෝම්ලෑන්ඩ් හිමිකරු වන නලින් හේරත් ජනාධිපති අනුර කුමාර දිසානායක හමුවී ඇති බව ජනාධිපති කාර්යාලය ආශ්‍රිත ආරංචි මාර්ග තහවුරු කරයි.
නලිත් හේරත් විසින් ජනාධිපතිවරයා හමුවේ තර්ක කර ඇත්තේ, දේශීය ආයෝජකයින් සංවර්ධන කටයුතු කරද්දී ඊට දිරි දිය යුතු බවත්, සංවර්ධන කටයුතු නවත්වනවාට වඩා නිවැරදි විසඳුම් සෙවිය යුතු බවත්ය.
කෙසේ වෙතත්, ජනාධිපති දිසානායක මෙම ව්‍යාපෘතිය දැනටමත් අධිකරණයේ විභාග වෙමින් පවතින බැවින්, මෙම අදියරේදී ඊට මැදිහත් වීමට නොහැකි බවට ප්‍රකාශ කර ඇතැයි වාර්තා වේ.
දේශපාලන විචාරකයන් පෙන්වා දෙන්නේ, මෙම ගැටලුව නීතිමය විනිවිදභාවය සහ නිවැරදි නියාමන ක්‍රියාත්මක කිරීමේ අවශ්‍යතාව අවධාරණය කරන බවයි.
ආයෝජකයින්ගේ විශ්වාසය රැකීමට නම්, සියලු ව්‍යාපෘති නීතියට අනුකූලව ක්‍රියාත්මක විය යුතු බවට මතයක් පවතී.
අමාත්‍ය බිමල් රත්නායක විසින් මෙම අක්‍රමිකතා සම්බන්ධයෙන් ස්වාධීන හා නිදහස් පරීක්ෂණයක් පවත්වා, නීතියට අනුව කටයුතු කිරීමට ඉඩ දිය යුතු බවට දේශපාලන හා ප්‍රජා මට්ටමින් දැඩි ඉල්ලීමක් මතුව ඇත.
කෙසේ වෙතත් මැතිවරණ සමයන්හි විවිධ පාර්ශවවලින් මූල්‍යමය සහයෝග ලබාදුන්නද, පාලන කාර්යය තුළදී සමස්ත රටේ නීතිය හැම අයෙකු වෙනුවෙන්ම සමානව ඉටුකළ යුතුය යන පූර්වාදර්ශය වත්මන් ආණ්ඩුවට දීමට සිදුවීම අනිවාර්යයකි. වත්මන් ආණ්ඩුවේ දේශපාලන අභියෝගය එයය.
