ඊශ්‍රායලයේ සහ හමාස් සංවිධානය අතර ඇති වූ ගැටුම් වලින් වසර දෙකකට වැඩි කාලයක්
වහල්භාවයේ සිටි සියලුම ප්‍රාණ ඇපකරුවන් නිදහස් කිරීම සහ ගාසා සාම ගිවිසුම පිළිබඳව ඉන්දීය අගමැති නරේන්ද්‍ර මෝදි සිය සතුට පළ කර තිබේ.
අගමැති මෝදි සිය X ගිණුමෙහි සටහනක් තබමින් ප්‍රකාශ කර ඇත්තේ, මෙම නිදහස් කිරීම ඔවුන්ගේ පවුල්වල ධෛර්යයට, එක්සත් ජනපද ජනාධිපති ඩොනල්ඩ් ට්‍රම්ප්ගේ "නොසැලෙන සාම උත්සාහයන්ට" සහ ඊශ්‍රායල අගමැති බෙන්ජමින් නෙතන්යාහුගේ "ශක්තිමත් අධිෂ්ඨානයට" කරන ලද උපහාරයක් බවයි.
ඔහු වැඩිදුරටත් සඳහන් කර ඇත්තේ, කලාපයට සාමය ගෙන ඒම සඳහා ජනාධිපති ට්‍රම්ප්ගේ අවංක උත්සාහයන්ට ඉන්දියාව සහාය දෙන බවත්, කලාපයේ කල් පවතින සාමයක් සඳහා වන සියලු උත්සාහයන්ට තම සහයෝගය ලබා දෙන බවත්ය.
මෙම සාම ගිවිසුම "සාකච්ඡා කරන ලද ද්වි-රාජ්‍ය විසඳුමක්" සඳහා ඉන්දියාවේ දීර්ඝකාලීන සහයෝගය සමඟ සමපාත වන බවද ඔහු අවධාරණය කර ඇත.
මේ අතර, ඉන්දීය විදේශ අමාත්‍යංශය නිවේදනයක් නිකුත් කරමින් ප්‍රකාශ කළේ, මෙම සන්ධිස්ථානීය සාම ගිවිසුම අත්සන් කිරීම ඉන්දියාව සාදරයෙන් පිළිගන්නා අතර මෙය කලාපයේ කල් පවතින සාමයක් සඳහා හේතු වනු ඇතැයි බලාපොරොත්තු වන බවයි. එමෙන්ම, මැද පෙරදිග සාමය සහ සංවාදය හා රාජ්‍ය තාන්ත්‍රිකත්වය හරහා ගැටළු විසඳීම සඳහා ඉන්දියාව පෙනී සිටින බවත් විදේශ අමාත්‍යංශය කියා සිටී.
මෙම සාම සැලැස්ම සඵල කර ගැනීමෙහිලා ඊජිප්තුව සහ කටාර් රාජ්‍යය දැක්වූ වටිනා භූමිකාව ඉන්දියාව අගය කරන බවද එහි සඳහන් වේ.
වාර්තා වලට අනුව, මෙම ප්‍රාණ ඇපකරුවන් නිදහස් කිරීම සිදු වූයේ ජනාධිපති ට්‍රම්ප්ගේ ගාසා සාම සැලැස්මේ පළමු අදියරේ කොටසක් ලෙස වන අතර, 2023 ඔක්තෝබර් 7 වන දින හමාස් ප්‍රහාරයෙන් පසු වසර දෙකක පමණ කාලයක් පුරා පැවති ගැටුම් අවසන් කිරීමට මේ හරහා මග පෑදීය.
ප්‍රාණ ඇපකරුවන් නිදහස් කිරීමට අමතරව, ගිවිසුමේ කොටසක් ලෙස ඊශ්‍රායලය පලස්තීන සිරකරුවන් සහ රඳවා සිටි පුද්ගලයන් 2,000කට ආසන්න සංඛ්‍යාවක් නිදහස් කිරීමට නියමිතව තිබේ.
