හමාස් සංවිධානය නිරායුධ විය යුතු බව අමෙරිකානු ජනපති ඩොනල්ඩ් ට්‍රම්ප් තරයේ පවසා තිබෙනවා.
එසේ නොමැති නම් ඔවුන් බලහත්කාරයෙන් නිරායුධ කිරීමට සිදුවනු ඇතැයි ඔහු අනතුරු අඟවා ඇති බව විදෙස් මාධ්‍ය සඳහන් කරයි.
ආර්ජන්ටිනාවේ ජනාධිපති ජේවියර් මිලෙයි සමඟ ධවල මන්දිරයේ පැවති හමුවකදී අදහස් දක්වමින් ජනපති ට්‍රම්ප් මෙසේ පැවසුවේ, "ඔවුන් නිරායුධ නොවන්නේ නම්, අපි ඔවුන් නිරායුධ කරන්නෙමු. එය ඉක්මනින් සහ සමහරවිට ප්‍රචණ්ඩකාරී ලෙස සිදුවනු ඇත." යනුවෙනි. ඔහු තවදුරටත් සඳහන් කළේ මෙම කරුණ හමාස් සංවිධානය වෙත දන්වා ඇති බවත්, ඔවුන් ඊට එකඟ වී ඇති බවත්ය.
ට්‍රම්ප් ගේ මැදිහත්වීමෙන් සම්මුතිගත කර ගත් සටන් විරාම ගිවිසුම යටතේ, පෙරේදා (ඔක්තෝබර් 13) හමාස් සංවිධානය ගාසා තීරයේ සිටි ඉතිරි ඊශ්‍රායල ප්‍රාණ ඇපකරුවන් නිදහස් කළ අතර, ඊශ්‍රායලයද පලස්තීන සිරකරුවන් පිරිසක් නැවත නිවෙස් වෙත පිටත් කර හැරියේය. මෙම සටන් විරාම ගිවිසුමේ ප්‍රධාන අංගයක් වන්නේ හමාස් සංවිධානය නිරායුධ කිරීම සහ ගාසා තීරයේ පාලනය නව තාවකාලික පලස්තීන පාලන ව්‍යුහයක් වෙත පැවරීමයි.
කෙසේ වෙතත්, ට්‍රම්ප් ගේ මෙම ප්‍රකාශයන් මධ්‍යයේ වුවද, හමාස් සංවිධානය තමන් ප්‍රසිද්ධියේ සිය ආයුධ බිම තැබීමට මෙතෙක් නිල වශයෙන් එකඟ වී නොමැති බව විදෙස් මාධ්‍ය වාර්තා කරයි. හමාස් නායකයෝ ප්‍රකාශ කර ඇත්තේ තමන්ට ස්වයං-ආරක්ෂාව සඳහා අයිතියක් ඇති බවත්, නිරායුධ කිරීම සඳහා කැමැත්තෙන් කටයුතු නොකරන බවත්ය.
ට්‍රම්ප් ගේ මෙම සටන් විරාම යෝජනාව සහ සාම සැලැස්ම පිළිබඳව කලාපයේ පවතින විවිධ මතවාදයන් පිළිබඳවද අල්-ජසීරා ඇතුළු මාධ්‍ය වාර්තා කර ඇත. ඇතැම් විශ්ලේෂකයන් පෙන්වා දෙන්නේ හමාස් සංවිධානය නිරායුධ කිරීමේ ඉල්ලීම, ගැටුමට විසඳුම් සෙවීමේ සැබෑ ප්‍රයත්නයන්ගෙන් අවධානය වෙනතකට යොමු කිරීමක් විය හැකි බවයි.
ජනපති ට්‍රම්ප්ගේ ප්‍රකාශයත්, හමාස් සංවිධානය නිරායුධ කිරීමට අමෙරිකාවට සහ ඊශ්‍රායලයට ඇති බලවත් අවශ්‍යතාවයත්, කලාපයේ පවතින සටන් විරාමයේ අනාගතය පිළිබඳව ගැඹුරු ප්‍රශ්න මතු කර ඇති බව විදෙස් මාධ්‍යවල අවධානයට ලක්ව තිබේ.
