ශ්‍රී ලංකාවේ උතුරු පළාතේ ස්ථාන කිහිපයකදී, එල්.ටී.ටී.ඊ. සංවිධානයේ ප්‍රථම කාන්තා සටන්කාමිනිය ලෙස
සටනේදී මියගිය කැප්ටන් මාලතී (පේදුරුපිල්ලේ) සිහිපත් කරමින් සැමරුම් උත්සව පවත්වා ඇති බව උතුරේ ආරක්ෂක අංශ වාර්තා කරයි.
1987 වසරේදී ඉන්දීය හමුදා ප්‍රහාරයකින් මියගිය ඇය සිහි කිරීම, වසර ගණනාවකට පසුව වුවද උතුරු පළාතේ ජනතාව අතර තවමත් සංකේතාත්මකව පවතින බව මෙම වාර්තා මගින් තහවුරු වේ.
(20 වයැස් මාලතී)
උතුරේ සැමරුම්
උතුරේ ආරක්ෂක අංශවලට ලැබී ඇති තොරතුරු අනුව, අඩම්පන් ආන්දන්කුලම් ප්‍රදේශයේ මියගිය කාන්තාවගේ වැඩිමහල් සොහොයුරියගේ නිවසේදීත්, කිලිනොච්චි නගරයේ පිහිටි ඉලංගෙයි තමිල් අරසු කච්චි කාර්යාලයේදීත්, ධර්ම පුරම් උත්සව ශාලාවකදීත් මෙම සැමරුම් සිදු කර ඇත. කිලිනොච්චි සැමරුම කරච්චි ප්‍රාදේශීය සභාවේ සභාපති අරුණාචලම් මහතාගේ ප්‍රධානත්වයෙන් සහ ධර්ම පුරම් සැමරුම ප්‍රාදේශීය සභාවේ හිටපු මන්ත්‍රීවරයෙකුගේ ප්‍රධානත්වයෙන් පැවැත්වීම විශේෂත්වයකි. මෙම සැමරුම්වලදී මාලතීගේ ඡායාරූපයකට මල් මාලා පළඳා, පහන් දල්වමින් ගෞරව දැක්වීම සිදු කර ඇති බව ආරක්ෂක අංශ සඳහන් කරයි.
කැප්ටන් මාලතීගේ සටන්කාමී දිවිය
සහයසීලි පේදුරුපිල්ලේ නොහොත් මාලතී උපත ලැබුවේ 1967 ජනවාරි 04 වන දින මන්නාරමේදීය. ඇය එල්.ටී.ටී.ඊ. සංවිධානය හා සම්බන්ධ වූ මුල්ම කාන්තා සටන්කාමිනියන් අතර ප්‍රමුඛව සිටියාය. ඇගේ මරණය වාර්තා වන්නේ 1987 ඔක්තෝබර් 10 වන දින, යාපනයේ කෝපායි ප්‍රදේශයේදී ඉන්දීය සාම සාධක හමුදාව (IPKF) සමග ඇති වූ දරුණු ගැටුමකදීය. වාර්තා අනුව, ඇය නායකත්වය දුන් කාන්තා ඒකකය සතුරාට ප්‍රබල ප්‍රතිරෝධයක් දැක්වූ අතර, සටනේදී දෙපාදවලට වෙඩි වැදී බරපතළ තුවාල ලැබූ මාලතී, සතුරාට හසු නොවීමට සයනයිඩ් කරලක් ගිල ජීවිතය අත්හැරියාය. මෙම ක්‍රියාව නිසා ඇය එල්.ටී.ටී.ඊ. සංවිධානය විසින් 'පළමු කාන්තා දිවි පිදූ වීරවරිය' ලෙස නම් කරනු ලැබූ අතර, ඇගේ මරණ සංවත්සරය 'කාන්තා පිබිදීමේ දිනය' ලෙස ප්‍රකාශයට පත් කරන ලදී.
එල්.ටී.ටී.ඊ. සංවිධානයේ කාන්තා බලකායන්ගේ නැගීම
කැප්ටන් මාලතීගේ මරණය, එල්.ටී.ටී.ඊ. සංවිධානයේ කාන්තා සටන්කාමීන්ගේ ඉතිහාසයේ වැදගත් සන්ධිස්ථානයක් විය. ඇගේ කැපවීම සහ ආත්ම පරිත්‍යාගය, දහස් ගණනක් කාන්තාවන් එල්.ටී.ටී.ඊ. සංවිධානයට එක්වීමට ප්‍රබල ලෙස බලපෑවේය. මෙම නැගී ඒම හේතුවෙන් එල්.ටී.ටී.ඊ. සංවිධානය තුළ ශක්තිමත් කාන්තා බලකායක් ගොඩනැගුණි.
මුල් අවධියේ කුඩා කණ්ඩායම් ලෙස ආරම්භ වූ කාන්තා අංශය, පසුකාලීනව පූර්ණ හමුදා බළකා බවට පත් විය. මෙම කාන්තා සටන්කාමීන් සාමාන්‍ය සටන් ඒකකවලට අමතරව, සංවිධානයේ ප්‍රභූ ඒකකවලද ප්‍රධාන කාර්යභාරයක් ඉටු කළහ. ඔවුන්ගෙන් බිහි වූ 'මාලතී බළකාය' සහ 'සෝදියා බළකාය' වැනි ඒකක, සංවිධානයේ ප්‍රධාන පෙළේ මෙහෙයුම් සඳහා සහභාගී විය. ඊට අමතරව, කාන්තා සාමාජිකාවන් 'කළු කොටි' (Black Tigers) මරාගෙන මැරෙන බළකාය සහ බුද්ධි අංශය වැනි සංවිධානයේ වඩාත් රහසිගත සහ වැදගත් අංශ නියෝජනය කළහ. මෙම කාන්තා බලකායන්, එල්.ටී.ටී.ඊ. සංවිධානයේ සටන් බලය ඉහළ නැංවීමට මෙන්ම, දේශපාලනික හා සමාජමය කටයුතුවලදී ද ප්‍රධාන මෙහෙවරක් ඉටු කළ බව වාර්තා වේ.
කැප්ටන් මාලතීගේ මතකය උතුරේ විවිධ ස්ථානවල සැමරීම, අවසන් වූ යුද්ධය සම්බන්ධ මතභේදාත්මක කරුණු සහ සංකේතවාදයන් සමාජය තුළ තවමත් ක්‍රියාත්මක වන ආකාරය පෙන්නුම් කරයි. එසේම, ඇගේ මරණයෙන් ආරම්භ වූ එල්.ටී.ටී.ඊ. කාන්තා බලකායේ විකාශනය, ලෝකයේ වෙනත් බෙදුම්වාදී හෝ ගරිල්ලා ව්‍යාපාර අතර කාන්තාවන් සටන් සඳහා දායක වූ ආකාරය පිළිබඳ වැදගත් අධ්‍යයන ක්ෂේත්‍රයක් ද සපයයි.
