2015 වසරේ පොහොර සංස්ථාවේ සේවය කරන සමයේ මුදල් අනිසි ලෙස පරිහරණය කිරීම සම්බන්ධයෙන්
එල්ල වී ඇති චෝදනා සම්බන්ධයෙන් කරුණු දැක්වීමක් සඳහා අවසර ඉල්ලා බලශක්ති අමාත්‍ය කුමාර ජයකොඩි විසින් අල්ලස් හෝ දූෂණ චෝදනා විමර්ශන කොමිෂන් සභාවෙන් (CIABOC) ඉල්ලීමක් කර තිබේ.
ඒ බව එහි ජ්‍යෙෂ්ඨ නිලධාරියෙකු පැවසී යැයි සන්ඩේ ටයිම්ස් පුවත්පත වාර්තා කර ඇත.
මෙම ඉල්ලීම ජනාධිපති නීතිඥවරයෙකු හරහා සිදු කර තිබේ.
කෙසේ වෙතත්, කොමිෂන් සභාව අමාත්‍ය ජයකොඩි ට දැනුම් දී ඇත්තේ, අවශ්‍ය නම්, ඔහුට සිය කරුණු දැක්වීම් ලිඛිතව ඉදිරිපත් කළ හැකි බවයි.
මෙම නව ඉල්ලීම හේතුවෙන් අමාත්‍යවරයාට එරෙහිව නඩු පැවරීමේ ක්‍රියාවලිය තවදුරටත් ප්‍රමාද වීමට ඉඩ ඇති බව සන්ඩේ ටයිම්ස් පුවත්පත තවදුරටත් පවසයි.
මීට පෙර, රුපියල් මිලියන 8ක මුදල් අනිසි ලෙස පරිහරණය කිරීමේ චෝදනා සම්බන්ධයෙන් අමාත්‍යවරයාට සහ තවත් දෙදෙනෙකුට එරෙහිව මහේස්ත්‍රාත් අධිකරණයේ අවශ්‍ය නීතිමය පියවර ගැනීම සඳහා කොමිෂන් සභාවේ අධ්‍යක්ෂ ජනරාල් රංග දිසානායක අවසර ලබා දී තිබුණි. චෝදනාවට ලක් වූ ටෙන්ඩරය පිරිනැමූ ටෙන්ඩර් මණ්ඩලයේ ප්‍රධානියා ලෙස කුමාර ජයකොඩි කටයුතු කර තිබේ.
නඩු පැවරීම ප්‍රමාද වීමේ ළබැඳියාව
කොමිෂන් සභාව විසින් දැනටමත් නඩු පැවරීමට අවසර දී ඇති පසුබිමක, බලශක්ති අමාත්‍යවරයා විසින් රජයේ උසස් තනතුරක් දරන අවස්ථාවක මෙවැනි අවසන් මොහොතේ කරුණු දැක්වීමක් සඳහා ඉල්ලීමක් කිරීම, මෙම නඩුව අධිකරණයට ඉදිරිපත් කිරීමේ ක්‍රියාවලිය කල් දැමීමට දරන උත්සාහයක්ද යන සැකය මතු කරයි.
දෙස් විදෙස් මාධ්‍ය වාර්තා සහ නීතිමය ක්‍රියාදාමයන් නිරීක්ෂණය කිරීමේදී මෙහිදී මතුවන ගැටළු කිහිපයක් තිබේ:
- ක්‍රියාපටිපාටික ප්‍රමාදය: අමාත්‍යවරයාගේ නීතිඥයන් විසින් වාචික හෝ විධිමත් දර්ශනයක් ඉල්ලා සිටීම, එය ලිඛිතව ඉදිරිපත් කරන ලෙස කොමිසම පැවසුවද, මෙම ලිපි හුවමාරුව සහ තීරණ ගැනීමේ කාලය නඩු පැවරීමේ ක්‍රියාවලිය ප්‍රමාද කරයි. දූෂණ විරෝධී පියවරයන් කඩිනම් කිරීමේ පොදු අපේක්ෂාව හමුවේ මෙය ප්‍රබල පසුබෑමකි.
- උසස් තනතුරේ බලපෑම: විත්තිකරුවෙකු ලෙස සිටින පුද්ගලයා රටේ බලශක්ති අමාත්‍යවරයා වීම, මෙම නඩුවේ දේශපාලන සංවේදීතාව වැඩි කරයි. මූලික වශයෙන් මෙම චෝදනා මතු වී ඇත්තේ වසර ගණනාවකට පෙර වුවද, ඔහු වත්මන් රජයේ ඇමතිවරයෙකු වන බැවින්, නඩුව ප්‍රමාද වීමෙන් දේශපාලන බලපෑම් ඇති බවට මහජන මතයක් ගොඩනැගීමේ අවදානමක් පවතී.
- පූර්වාදර්ශය: අල්ලස් කොමිසම (CIABOC) මෑතකාලීනව දූෂණ නඩු කඩිනම් කිරීමේ වැඩපිළිවෙළක් ක්‍රියාත්මක කරන අතර, අමාත්‍ය ජයකොඩි ගේ නඩු ගොනුව දැනටමත් නඩු පැවරීමට සූදානම්ව ඇති නඩු ලැයිස්තුවකට (69 අතරින් 49 වැන්න ලෙස) ඇතුළත් වී තිබුණි. එවැනි තත්ත්වයක් යටතේ විධිමත් නොවන ප්‍රමාදයන් පිළිගැනීම අල්ලස් කොමිසමේ ස්වාධීනත්වයට සහ විශ්වසනීයත්වයට අභියෝගයක් විය හැකිය.
නීති විශාරදයන් අවධාරණය කරන්නේ, දූෂණ විරෝධී ව්‍යාපාරයේ විශ්වසනීයත්වය තහවුරු කිරීමට නම්, CIABOC විසින් මෙම ඉල්ලීම පිළිබඳව කඩිනමින් තීරණයක් ගෙන, නඩු කටයුතු බාධාවකින් තොරව ඉදිරියට ගෙන යාම අත්‍යවශ්‍ය වන බවයි.
මේ අතර ලංකාවේ නව අගවිනිසුරු ප්‍රීති පද්මන් සූරසේන පවසන්නේ 'විනිසුරුවරයකුගේ වැරැදි තීන්දුවක් නිසා බොහෝ යහපත් දේ විනාශ විය හැකි’ බවත්, ‘කාර්යක්ෂම සහ සාධාරණ මනසක් ඇති බුද්ධිමත් විනිසුරුවරුන් අධිකරණයට ඕනෑ’ බවත්, කෙසේ වුවද ‘අද අධිකරණයේ යුක්තිය පසිඳලීමේ ක්‍රමය අතිශය ප්‍රමාද’ බවත් ය.
''වර්තමානයේ සමාජ සන්දර්භයක් තුළ කිසිවෙකුත් සිතාමතාම කැමැති වෙන්නේ නැහැ, අධිකරණයක නඩුවක් පැවරීමට හෝ නඩුවකට මුහුණ දීමට. එසේ සිදුකිරීමට ඇත්තටම අවශ්‍යතාවක් නොමැති නම්, බොහෝ දෙනකු තමන්ට සිදුවන අසාධාරණකම් නිහඬව විඳදරාගෙන සිටිනවා. එවැනි පුද්ගලයකු නීතිඥයකුගේ මෙහෙයවීමෙන් නීතිමය ක්‍රියාමාර්ග ගත්තද එය ඔහුගේ ජීවිතයට ආලෝකය ලබාදීමක් නොවේ. මේ නිසා කලකිරෙන ඔහුගේ ඊළඟ පරම්පරාව පවා නඩු පැවරීමේ මාවතකට පිවිසෙන්නේ නැහැ. වර්තමානයේ අධිකරණය තුළ යුක්තිය පසිඳලීමේ ක්‍රමය තුළ මෙවැනි ප්‍රමාදයන් ඇතිකරන විට නීතියේ නිසි ආධිපත්‍යයක් පවතින්නේ කෙසේද? නීතියේ පිළිසරණ පතන ජනතාව අධෛර්යවත් කරන සහ අසාධාරණයට නිහඬව ගොදුරු වීමට ඉඩ සලසන නීති ප්‍රමාදයන් පිළිබඳ ගැටලුව විසඳීමට ප්‍රමුඛත්වය ලබාදීමට කටයුතු කළ යුතුයි. මම අගවිනිසුරු ධුරය භාරගැනීමේදී එම ක්‍රියාවලිය සිදුකරන බවට ඔබට පොරොන්දු වුණා…''
දැන් අප සාමාන්‍ය පුරවැසියන් ලෙස විශ්වාසය තැබිය යුත්තේ කුමක් පිළිබඳව ද?
වසර 76ක ලංකාවේ දේශාපලනයේ ක්‍රියාකාරීත්වයේ පැවති වැරදි, දූෂණ-වංචා- අක්‍රමිකතා හේතුකොටගෙන රට පත්ව තිබූ ආර්ථිකමය බිඳවැටීම පමණක් නොව විධායකය,ව්‍යවස්ථාදායකය, අධිකරණය සම්බන්ධයෙන් පැවති විශ්වාසය බිඳ වැටීම් මෙවැනි තීරණ හමුවේ පිළිසකර වේද?
මේ අනුව වත්මන් ආණ්ඩුව බලයට පත්වූයේ කුමක් වෙනුවෙන්ද යන්න දැන් දැන් ඔවුන්ටම අමතක වී ගොස් ඇති බව පෙන්නුම් කෙරේ.
#සමාරා පරණවිතාන
