එක්සත් ජනපද අභියාචනාධිකරණයක් විසින් හිටපු ජනාධිපති ඩොනල්ඩ් ට්‍රම්ප් විසින්
ඒකපාර්ශ්විකව පනවන ලද තීරුබදු නීති විරෝධී බවට තීරණය කර ඇති අතර, එම තීන්දුව 2025 ඔක්තෝබර් 14 වනදා සිට බලාත්මක වීමට නියමිතයි.
මෙම තීරණය එක්සත් ජනපද ආණ්ඩුක්‍රම ව්‍යවස්ථාවේ මූලධර්ම අවධාරණය කරන නමුත්, ධවල මන්දිර ප්‍රකාශයක් පවසන්නේ "තීරුබදු තවදුරටත් බලාත්මකව පවතින" බවයි.
එක්සත් ජනපද ෆෙඩරල් සර්කිට් සඳහා වන අභියාචනාධිකරණය විසින් සිකුරාදා (29) ලබා දුන් මෙම තීන්දුව ශ්‍රී ලංකාවට දැනටමත් පනවා ඇති තීරුබදුවලට බලපාන්නේ කෙසේද යන්න තවමත් පැහැදිලි නැත. ශ්‍රී ලංකාව මීට පෙර පනවා තිබූ 44% ක තීරුබදු වෙනුවට අගෝස්තු 1 වනදා සිට බලපැවැත්වෙන පරිදි 30% ක අඩු තීරුබදු අනුපාතයක් සාකච්ඡා කර තිබිණි.
අධිකරණය පවසා ඇත්තේ "තීරුබදු වැනි බදු පැනවීමේ බලය ඇත්තේ කොන්ග්‍රසයට පමණක්" බවයි. ආණ්ඩුක්‍රම ව්‍යවස්ථාව මගින් මෙම බලය "ව්‍යවස්ථාදායක ශාඛාවට පමණක්" පවරා ඇත.
ලාභ නොලබන සංවිධානයක් වන Liberty Justice Center සිය ෆේස්බුක් පිටුවේ සඳහන් කර ඇත්තේ ජනාධිපති ඩොනල්ඩ් ට්‍රම්ප්ගේ තීරුබදු "ආණ්ඩුක්‍රම ව්‍යවස්ථාවට පටහැනි" බවයි.
ට්‍රම්ප් පරිපාලනයට මෙම අභියෝගය ශ්‍රේෂ්ඨාධිකරණය වෙත ගෙන යා හැකිය.
මැයි මස අගදී, එක්සත් ජනපද ජාත්‍යන්තර වෙළෙඳ අධිකරණය විසින් ජනාධිපති ට්‍රම්ප්ගේ ජාත්‍යන්තර හදිසි ආර්ථික බලතල පනත භාවිත කරමින් තීරුබදු පැනවීමට ගත් තීරණය ප්‍රතික්ෂේප කර තිබිණි.
