සැප්තැම්බර් 6 වන සෙනසුරාදා පැවැත්වෙන එක්සත් ජාතික පක්ෂ වාර්ෂික සම්මේලනයට
විපක්ෂ නායකයින්ට ආරාධනා කර ඇති බව හිටපු ජනාධිපති සහ එජාප නායක රනිල් වික්‍රමසිංහ ප්‍රකාශ කළේ යයි වාර්තා සන්ඩේ ටයිම්ස් කරයි.
අත්අඩංගුවට ගැනීම, රක්ෂිත බන්ධනාගාරගත කිරීම සහ පසුව ඇප මත නිදහස් වීමෙන් පසු රෝහල් ගතව සිට සිය නිවසට පැමිණි රනීල් වික්‍රමසිංහ, ‘සන්ඩේ ටයිම්ස්’ පුවත්පතට අදහස් දක්වමින් කියා ඇත්තේ, ‘විපක්ෂයේ එකමුතුව’ සඳහා පළමු පියවර ලෙස, පක්ෂයෙන් වෙන්ව ගොස් සමගි ජන බලවේගය (සජබ) පිහිටුවා ගත් සියලුම සාමාජිකයින්ට එරෙහිව පනවා තිබූ තහනම ඉවත් කරන බවයි. මෙම පියවරෙන් පසු ඔවුන්ට නැවත පක්ෂ සාමාජිකත්වය ලබා ගත හැකි වනු ඇත.
පසුගිය සති අන්තයේ තාවකාලිකව සිරගත කිරීමෙන් පසු රනිල් වික්‍රමසිංහ ප්‍රථම වරට ප්‍රසිද්ධියේ පෙනී සිටින්නේ මෙම සම්මේලනයේදී වන අතර, එහිදී විශේෂ ප්‍රකාශයක් කිරීමට නියමිත බව එජාප ආරංචි මාර්ග සඳහන් කරයි.
විපක්ෂයේ අනෙකුත් පක්ෂ සාමාජිකයින්ට පහසුවෙන් සහභාගී විය හැකි පරිදි, සම්මේලනයේ ස්ථානය පක්ෂ මූලස්ථානය වන සිරිකොතින් ඉවත් කර මධ්‍යස්ථ ස්ථානයක පැවැත්වීමට ද එක්සත් ජාතික පක්ෂය තීරණය කර ඇත.
2020 දී රනිල් වික්‍රමසිංහ සහ සජිත් ප්‍රේමදාස අතර ඇති වූ අර්බුදයෙන් පසුව සජබ පිහිටුවනු ලැබූ අතර, පසුගිය දින කිහිපය තුළ දෙදෙනා අතර සබඳතා යළි යහපත් වී ඇති බවක් දක්නට ලැබේ.
රනිල් වික්‍රමසිංහ රෝහල්ගතව සිටි අවස්ථාවේදී, සජීත් ප්‍රේමදාස ඇතුළු සජබ සාමාජිකයින් කිහිප දෙනෙක්ම ඔහු බැලීමට බන්ධනාගාර රෝහලට මෙන්ම ජාතික රෝහලටද ගොස් ඇත.
සජබ මහලේකම් රංජිත් මද්දුම බණ්ඩාර පැවසුවේ, එජාප සම්මේලනයට සහභාගී වීම සඳහා ආරාධනාවක් ලැබී ඇති බවත්, සජීත් ප්‍රේමදාස ඇතුළු අනෙකුත් පක්ෂ සාමාජිකයින් සම්මේලනයට සහභාගී වීමට ඉඩ ඇති බවත්ය. අතීතයේ තිබූ මතභේද තිබුණද, දෙපාර්ශ්වයටම එක්ව වැඩ කිරීම සඳහා කිසිදු බාධාවක් නොමැති බවද ඔහු සඳහන් කළේය.
හිටපු ජනාධිපතිවරුන් වන මහින්ද රාජපක්ෂ සහ මෛත්‍රීපාල සිරිසේන ද මෙම සම්මේලනය සඳහා ආරාධනා කර ඇති බව එජාප ආරංචි මාර්ග පවසයි.
