රාජ්‍ය ආරක්ෂක නියෝජ්‍ය අමාත්‍ය විශ්‍රාමික මේජර් ජනරාල් අරුණ ජයසේකර වහා එම අමාත්‍ය ධුරයෙන්
ඉල්ලා අස්විය යුතුව ඇතැයි කාදිනල් මැල්කම් රංජිත් හිමියන්ගේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමන් සඳහන් කරයි.
අන්තර්ජාල නාලිකාවක් සමඟ සංවාදයකට එක් වෙමින් උන්වහන්සේ පෙන්වා දී ඇත්තේ ඔහු සිය ධුරයෙන් ඉල්ලා අස්වී සිය නිර්දෝෂී භාවය ඔප්පු කළ යුතු බවයි.
පාස්කු ප්‍රහාරය එල්ලවන කාල සීමාවේ මේජර් ජනරාල් අරුණ ජයසේකර නැගෙනහිර ආඥාපතිවරයා ලෙස සේවය කර ඇති බවත්, ඔහු එම තනතුරට පත්කර ඇත්තේ මහින්ද රාජපක්ෂ ඇතුළු පිරිසක් රටේ බලය ඇල්ලීමට උත්සාහ කළ අවස්ථාවේ බවත් පසුගියදා පාර්ලිමේන්තුවේදී හෙළිවිය.
මේ සම්බන්ධයෙන් අදහස් දක්වමින් සමගි ජනබලවේගය පක්ෂයේ පාර්ලිමේන්තු මන්ත්‍රී නිසාම් කාරියප්පර් චෝදනා කලේ පාස්කු ප්‍රහාරයට වළක්වා නොගැනීම සහ එයට අදාළ සාක්ෂි විනාශ කිරීම පිටුපස යුධ හමුදා නිලධාරීන් පිරිසක් සිටි බවට මේ වන විට හෙළිව ඇති පසුබිමක එවකට නැගෙනහිර ආඥාපතිවරයා ලෙස කටයුතු කළ මේජර් ජනරාල් අරුණ ජයසේකර ට එම වගකීමෙන් ගැලවිය නොහැකි බවයි.
