එක්සත් ජාතීන්ගේ මානව හිමිකම් කාර්යාලය සිකුරාදා ප්‍රකාශ කළේ එක්සත් ජනපදය සහ
ඊශ්‍රායලයේ සහාය ලබන ගාසා මානුෂීය පදනම (GHF) විසින් පවත්වාගෙන යනු ලබන ආධාර මධ්‍යස්ථානවල සහ එක්සත් ජාතීන්ගේ සංවිධානය ඇතුළු අනෙකුත් සහන කණ්ඩායම් විසින් මෙහෙයවනු ලබන මානුෂීය රථ පෙළ අසල අවම වශයෙන් ඝාතන 613 ක් සිදුව ඇතැයි වාර්තා කර ඇති බවයි.
ගාසා තීරයට සැපයුම් ලබා ගැනීම සඳහා බොහෝ දුරට එක්සත් ජාතීන්ගේ නායකත්වයෙන් යුත් ක්‍රමවේද මඟ හරිමින්, GHF පුද්ගලික එක්සත් ජනපද ආරක්ෂක සහ සැපයුම් සමාගම් භාවිතා කරන අතර, ඊට හේතු ලෙස ඊශ්‍රායලය පවසන්නේ සටන්කාමීන්ට ආධාර වෙනතකට යොමු කිරීමට එමගින් ඉඩ දුන් බවය.
කෙසේ වුවත් එක්සත් ජාතීන්ගේ සංවිධානය මෙම අමෙරිකාව සහ ඊශ්‍රායලය විසින් සකස් කර ඇති සැලැස්ම "ස්වභාවයෙන්ම අනාරක්ෂිත" බවත් මානුෂීය අපක්ෂපාතී නීති උල්ලංඝනය කිරීමක් ලෙසත් නම් කර ඇත.
"GHF මධ්‍යස්ථානවල සහ මානුෂීය රථ පෙළ අසල ඝාතන 613 ක් අපි වාර්තා කර ඇත්තෙමු - මෙය ජුනි 27 වන විට පමණකි. එතැන් සිට ... තවත් ඝාතන සිදුවීම් සිදුවී ඇත,"
එක්සත් ජාතීන්ගේ මානව හිමිකම් මහ කොමසාරිස් කාර්යාලයේ (OHCHR) ප්‍රකාශිකා රවීනා ෂම්දාසානි ජිනීවාහි වාර්තාකරුවන්ට පැවසීය.
මැයි මස අවසානයේදී ගාසා තීරයේ ආහාර පැකේජ බෙදා හැරීම ආරම්භ කළ අතර එදා සිටම දිගින් දිගටම මෙම වෙඩි තැබීම් සහ බෝම්ඹ ප්‍රහාරයන් සිදු කර තිබේ.
ඒ අනුව මියගිය 613 දෙනාගෙන් 509 දෙනෙකු GHF බෙදාහැරීමේ මධ්‍යස්ථාන අසල මිය ගිය බව OHCHR පවසයි.
රෝහල්, සුසාන භූමි, පවුල්, පලස්තීන සෞඛ්‍ය බලධාරීන්, රාජ්‍ය නොවන සංවිධාන සහ එහි හවුල්කරුවන්ගේ තොරතුරු වැනි මූලාශ්‍ර ගණනාවක් මත පදනම්ව මෙම සංඛ්‍යාලේඛන සකස් කර ඇති බව OHCHR පැවසීය. තවදුරටත් වාර්තා සත්‍යාපනය කරමින් සිටින බවත් ඔවුන් මිය ගිය ස්ථානය පිළිබඳ විස්තර තවමත් ලබා දිය නොහැකි බවත් එය පැවසීය.
සති පහක් තුළ කුසගින්නෙන් පෙළෙන පලස්තීනුවන්ට ආහාර මිලියන 52 කට වඩා ලබා දී ඇති බව GHF මීට පෙර රොයිටර් පුවත් සේවයට පැවසූ අතර අනෙකුත් මානුෂීය කණ්ඩායම් "ඔවුන්ගේ ආධාර සියල්ලම පාහේ කොල්ල කෑ" බව පැවසීය. ඊශ්‍රායලය මැයි 19 වන දින ගාසා තීරයේ සති 11 ක ආධාර අවහිරයක් ඉවත් කළේය.
මානුෂීය කටයුතු සම්බන්ධීකරණය සඳහා වූ එක්සත් ජාතීන්ගේ කාර්යාලය (OCHA) රොයිටර් පුවත් සේවයට පවසා ඇත්තේ ප්‍රචණ්ඩ කොල්ලකෑම් සහ ට්‍රක් රථ රියදුරන්ට පහරදීමේ සමහර අවස්ථා ඇති බවත් එය පිළිගත නොහැකි යැයි විස්තර කළ බවත්ය.
"ආක්‍රමණික බලය ලෙස ඊශ්‍රායලය ගාසා තීරයේ මහජන සාමය සහ ආරක්ෂාව සම්බන්ධයෙන් වගකීම දරයි. මානුෂීය අවශ්‍යතා සපුරාලීම සඳහා බහු හරස් මාර්ග සහ මාර්ග හරහා බොහෝ අත්‍යවශ්‍ය සැපයුම් ලබා දීම ඊට ඇතුළත් විය යුතුය,"
OCHA ප්‍රකාශක එරි කනේකෝ රොයිටර් පුවත් සේවයට ප්‍රකාශයක් නිකුත් කරමින් කියා සිටියේය.
ඊශ්‍රායල හමුදා ආධාර සම්බන්ධීකරණ ආයතනය වන COGAT, අදහස් දැක්වීම සඳහා රොයිටර් සේවයට සම්බන්ධ කරගැනීමට නොහැකි ව තිබේ.
ගාසා තීරයේ ආධාර බෙදා හැරීමේ මධ්‍යස්ථානවල පලස්තීන සිවිල් වැසියන්ට හානි සිදුවී ඇති බව ඊශ්‍රායල හමුදාව පසුගිය සඳුදා පිළිගත්තේය. "උගත් පාඩම්" ලෙස හැඳින්වූ දෙයට අනුව ඊශ්‍රායල හමුදාවන්ට නව උපදෙස් නිකුත් කර ඇති බව ඊශ්‍රායල හමුදාව පවසා ඇත.
කෙසේ වුවද ආධාර පලස්තීන හමාස් සටන්කාමීන් අතට පත්වීම වැළැක්වීම සඳහා තම හමුදා මධ්‍යස්ථාන අසල ක්‍රියාත්මක වන බව ඊශ්‍රායලය නැවත නැවතත් පවසා තිබේ.
ගාසා තීරයේ හමාස් සටන්කාමීන්ට එරෙහිව ඊශ්‍රායලය විසින් වසර දෙකකට ආසන්න කාලයක් ක්‍රියාත්මක කරන ලද හමුදා මෙහෙයුමෙන් පසු ආහාර සහ අනෙකුත් මූලික සැපයුම්වල උග්‍ර හිඟයක් පවතී. එම මෙහෙයුම හේතුවෙන් ගාසා තීරයේ සුන්බුන් ගොඩක් බවට පත් වී ඇත.
