එක්සත් අරාබි එමීර් රාජ්‍යය ඊයේ නිවේදනය කළේ ශ්‍රී ලංකාව සමඟ ඇති දිගුකාලීන සබඳතා
තවදුරටත් ශක්තිමත් කරමින් බලශක්ති, සංචාරක, විදේශ ආයෝජන සහ විදේශ රැකියා අංශ ප්‍රවර්ධනය කිරීමට ප්‍රමුඛත්වය දීමට කැපවී සිටින බවයි.
එක්සත් අරාබි එමීර් රාජ්‍යයේ නියෝජ්‍ය අගමැති සහ විදේශ කටයුතු අමාත්‍ය ෂෙයික් අබ්දුල්ලා බින් සයිඩ් අල් නහියන් සහ ජනාධිපති අනුර කුමාර දිසානායක අතර ඊයේ (22) ජනාධිපති ලේකම් කාර්යාලයේ පැවති නිල හමුවකින් අනතුරුව මෙම නිවේදනය නිකුත් කර තිබේ.
එක්සත් අරාබි එමීර් රාජ්‍යයේ ඉහළ පෙළේ දූත පිරිසක් සමඟ ශ්‍රී ලංකාවේ නිල සංචාරයක නිරතව සිටින ෂෙයික් අබ්දුල්ලා, දෙරට අතර ශක්තිමත් ද්විපාර්ශ්වික සබඳතා පුළුල් කිරීමට සහ ගැඹුරු කිරීමට තම රටේ අභිප්‍රාය නැවත තහවුරු කළේය. මෙම සංචාරයේ අරමුණ දෙරටේම යහපත සඳහා අන්‍යෝන්‍ය ආර්ථික සහයෝගීතාව වැඩි දියුණු කිරීමයි.
එක්සත් අරාබි එමීර් රාජ්‍ය රජය සහ එහි ජනතාව වෙනුවෙන් ශ්‍රී ලංකාවේ නව පරිපාලනයට සුබ පැතුම් එක් කළ නියෝජ්‍ය අග්‍රාමාත්‍යවරයා, නව රජයේ සංවර්ධන න්‍යාය පත්‍රයට එක්සත් අරාබි එමීර් රාජ්‍යයේ පූර්ණ සහයෝගය ලබා දෙන බවට පොරොන්දු විය. ශ්‍රී ලංකාව නැවත ගොඩනැගීම සහ එක්සත් අරාබි එමීර් රාජ්‍යය සමඟ ධනාත්මක සබඳතා වර්ධනය කිරීම සඳහා ජනාධිපති දිසානායක ගේ නායකත්වය, කැපවීම සහ ක්‍රියාකාරී ප්‍රවේශය ද ඔහු අගය කළේය.
ඊට ප්‍රතිචාර වශයෙන්, ශ්‍රී ලංකාව දැන් ස්ථාවර සහ ආයෝජන හිතකාමී පරිසරයක් ස්ථාපිත කර ඇති බවත්, ආයෝජකයින් අධෛර්යමත් කළ අතීතයේ අස්ථාවර තත්ත්වයන්ට රට නැවත නොයන බවත් ජනාධිපති දිසානායක මෙහිදී අවධාරණය කළේය. ආයෝජන ආරක්ෂා කිරීම සඳහා ශක්තිමත් නීති රාමු ක්‍රියාත්මක කිරීම ඔහු අවධාරණය කළේය.
රජයේ අඛණ්ඩ ණය ප්‍රතිව්‍යුහගත කිරීමේ මුලපිරීම් සහ ආර්ථික ස්ථාවරත්වය ළඟා කර ගැනීම සඳහා දරන උත්සාහයන් පිළිබඳව ද ජනාධිපතිවරයා විසින් නියෝජිත පිරිස දැනුවත් කළේය. එහිදී වරාය පර්යන්ත සංවර්ධනය, කොළඹ වරාය නගර ව්‍යාපෘතිය, සංචාරක ව්‍යාපාරය, බලශක්තිය සහ ප්‍රවාහනය ඇතුළු ප්‍රධාන අංශවල පවතින ආයෝජන අවස්ථා රාශියක් ඔහු ගෙනහැර දැක්වීය.
කලාපයේ ප්‍රමුඛතම ආයෝජන මධ්‍යස්ථානය සහ ප්‍රමුඛතම සංචාරක ගමනාන්තය ලෙස ශ්‍රී ලංකාව ස්ථානගත කිරීම රජයේ ඉලක්කය බව ද ජනාධිපති දිසානායක වැඩිදුරටත් පැවසීය.
එක්සත් අරාබි එමීර් රාජ්‍යයේ නියෝජිත පිරිසගේ සංචාරය දෙරට අතර ආර්ථික හා රාජ්‍ය තාන්ත්‍රික සබඳතා ශක්තිමත් කිරීමේ වැදගත් පියවරක් සනිටුහන් කරයි.
@dailymirror
