2025 අප්‍රේල් 1 වන දින වැලිකඩ පොලිසිය භාරයේ සිටීයදී මියගිය තරුණයා සම්බන්ධ
පරීක්ෂණ ආරම්භ වී තිබීම ගැන තොරතුරු පලවී තිබුනත්, එම පරීක්ෂණ අවසන් වීමට පෙර හදිසියේම පොලිස් දෙපාර්තුමේන්තු මාධ්‍ය ප්‍රකාශයක් එළි දක්වමින්, එම මරණය සම්බන්ධ වගකීම මියගිය තරුණායටම මාරුකිරීමක් සිදුකොට ඇති බව පෙනෙන්ට තිබේ.
එම මාධ්‍ය ප්‍රකාශයේ අරුත වන්නේ අදාල සිදුවීම සම්බන්ධව කිසිඳු වගකීමක් ගැනීමට පොලිස් නිලධාරීන් සූදානම් නොමැති බවයි.
මෙම බරපතල සැක සහිත මරණය සම්බන්ධව ඔබගේ අමාත්‍යංශයෙන් කිසිඳු පැහැදිලි කිරීමක් සිදු කොට ඇති බවක් පෙනෙන්නට නැත. මෙවන් බරපතල කරුණු සම්බන්ධව ඇමතිවරයා මුණිවත රැකීම, එවැනි සිදුවීම් නැවත නැවත ඇතිවීමට වාතාවරණයක් නිර්මාණය කර දෙන බවට අමුතුවෙන් කිව යුතු නොවේ. රාජ්‍ය ලාංඡනයක සිරැසි යටතේ එළිදැක්වෙන පොලිස් මාධ්‍ය ප්‍රකාශය සම්බන්ධව ඔබගේ පොලිස්පති වරයා සෘජුවත්, ඇමතිවරයා වන ඔබ වක්‍රවත් මහජනතාවට වගකිව යුතු වන අතර අවසාන වශයෙන් විධායකයේ ප්‍රධානී ජනාධිපතිවරයාටත් මෙම වගකීම ව්‍යාප්ත වන බවට කිව යුතු නොවේ.
මේ රටේ ජනතාව දූශිත සහ හිංසාකාරී දේශපාලනය පරාජය කරමින් නව දේශපාලන ව්‍යාපාරයක් බලයට ගෙන ආවේ මෙවැනි අපරාධමය අත්තනෝමතික රාජ්‍ය භීෂණයෙන් මිදී සාධාරණ සමාජයක ජීවත් වීමේ අභිලාෂය ඇතිවය. ඉදින් පොලිසියේ මෙවැනි සාපාරාධී ක්‍රියා හමුවේ මුණිවත රකිමින්, නිලධාරීන්ට විනිර්මුක්තිය ලබා දීම දිගටම සිදුකිරීමට ඔබ සහ ඔබගේ නිලධාරීන් කටයුතු කරමින් සිටිනවානම්, මෙයට පෙර ආණ්ඩු දූශිතවී විනාශ වූවා සේම මෙම ආණ්ඩුවද විනාශ්‍ය කරා ගෙන යාමේ අඩිතාලම වැටෙනු ඇත.
වැලිකඩ පොලිසියේ සිදුවීම සම්බන්ධව වහාම සම්පූර්ණ ස්වාධීන පරීක්ෂණයක් පවත්වා එම මරණය සම්බන්ධව සත්‍යය සොයාගැනීමටත්, අපරාධකරුවන් වෙත්නම් ඔවුන්ට එරෙහි දැඩි ක්‍රියාමාර්ග ගැනීමත් වේගවත්ව සිදුකළ යුතුව ඇත. එසේම හදිසියේ මාධ්‍ය ප්‍රකාශ නිකුත් කරමින්, මලමිනී වරදකරුවන් කිරීමේ පොලිස් සංස්කෘතියද අවසන් කළ යුතුව ඇත.
@ විසාකේස චන්ද්‍රසේකරම්
** ප:ලි: මෙම ලිපිය සමාජ මාධ්‍යයක පළ කරන්නේ, අමාත්‍යාංශ වලට තැපැල් කරන ලිපි වලට අවධානය ලබා ගැනීමත්, ප්‍රතිචාර ලබාගැනීමත් බොහෝවිට හානිකර ලෙස කල්යන බැවිනි.
