ඉන්දීය අග්‍රාමාත්‍ය නරේන්ද්‍ර මෝදිගේ සංචාරය හේතුවෙන් කොළඹ සහ
තදාසන්න ප්‍රදේශ කිහිපයක අද (4) සවස සිට ඉරිදා (6) දක්වා මාර්ග කිහිපයක් වසා තබන බවට පොලිස් මාධ්‍ය කොට්ඨාසය විසින් විශේෂ නිවේදනයක් නිකුත් කර ඇත.
ඉන්දීය අග්‍රාමාත්‍යවරයා අද සවස බණ්ඩාරනායක ජාත්‍යන්තර ගුවන්තොටුපළේදී මෙරටට පැමිණීමට නියමිත අතර ඒ වෙනුවෙන් විශේෂ රථවාහන සහ ආරක්ෂක සැලැස්මක් ක්‍රියාත්මක වන බව පොලිසිය පවසයි.
ඒ අනුව, කොළඹ-කටුනායක අධිවේගී මාර්ගය සහ බේස්ලයින් මාර්ගය අද සවස 6 සිට රාත්‍රී 10 දක්වා වරින් වර වසා දමනු ලබනු ඇත.
මෙම කාලසීමාව තුළ කටුනායක ජාත්‍යන්තර ගුවන්තොටුපොළ වෙත පැමිණෙන්නන්ට, මෙම මාර්ග වසාතැබීම පිළිබඳ අවධානය යොමු කරන ලෙසට පොලීසිය දැනුම් දී සිටියි.
අප්‍රේල් 5 වන දින, ගාලු මුවදොර ප්‍රදේශය, නිදහස් චතුරශ්‍රය අවට සහ බත්තරමුල්ලේ "අපේ ගම" අවට මාර්ග ද කිහිපරක් වසා දැමීමට නියමිතය.
ඒ හේතුවෙන් සිදුවන අපහසුතාවය අවම කර ගැනීම සඳහා විකල්ප මාර්ග වෙත යොමු කිරීමට රථවාහන නිලධාරීන් වෙත උපදෙස් ලබාදී ඇත.
එසේම, අප්‍රේල් 6 වන දින, විශේෂ රථවාහන සැලැස්මක් ක්‍රියාත්මක වන අතර, අනුරාධපුර නගරයේ දුම්රිය ස්ථාන පාර සහ පූජනීය ජය ශ්‍රී මහා බෝධිය අවට ප්‍රදේශ ඇතුළුව පෙ.ව. 7:30 සිට පෙ.ව. 10:30 දක්වා මාර්ග වරින් වර වසා දැමීමට නියමිතයි.
එදින පූජා භූමිය වෙත පැමිණෙන බැතිමතුන්ට අපහසුතාවයකින් තොරව විකල්ප මාර්ග වෙත යොමුකිරීමට රථවාහන හසුරවන නිලධාරින් උපදෙස් දී ඇත.
