පසුගිය අප්‍රේල් 01 දා වැලිකඩ පොලිසිය විසින් අත්අඩංගුවට ගෙන එදිනම වදහිංසාවට ලක්කර
මරා දැමූ බවට සැක කරන මුතුවාඩිගේ සත්සර නිමේෂ් යන තරුණයාගේ මරණය සම්බන්ධයෙන් ඉක්මන් පරීක්ෂණයක් පවත්වන ලෙස ඉල්ලා සිරකරු අයිතිවාසිකම් සුරැකීමේ කමිටුවෙහි විධායක අධ්‍යක්ෂක නීතීඥ සේනක පෙරේරා පොලිස්පතිවරයා වෙත ලිපියක් යවා තිබේ.
එම ලිපිය පහත දැක්වේ.
2025.04.03,
පොලිස්පතිතුමා ,
පොලිස් මූලස්ථානය,
කොළඹ.
පොලිස්පතිතුමනි,
පසුගිය අප්‍රේල් 01 දා වැලිකඩ පොලිස් ස්ථානය තුළ වදහිංසාවට ලක්වී මියගිය මුතුවාඩිගේ සත්සර නිමේෂ් යන තරුණයාගේ මරණය සම්බන්ධයෙන් ඉක්මන් පරීක්ෂණයක් පවත්වන ලෙස ඉල්ලා සිටිම.
පසුගිය අප්‍රේල් 01 දා දින බදුල්ල මීගහකිවුල පදිංචි මුතුවාඩිගේ සත්සර නිමේෂ් නමැති තරුණයා වැලිකඩ පොලිසිය මගින් සැකපිට අත්අඩංගුවට ගෙන ඇත. අත්අඩංගුවේදී ඔහුට වදහිංසා කර ඇත. පසුව ඔහු මිය ගොස් ඇත. එම තරුණයාගේ මව වන ලේකම්වසම් ලියනගේ සමන්ති යන අය විසින් පසු දින (2025.04.02) වැලිකඩ පොලිස් ස්ථානයට ගොස් සොයා බැලීමේදී එම තරුණයා ඇඳ සිටි ඇඳුම් ඉවත් කර ඇති බවත්, ඔහුගේ කලිසම කුණු කූඩයේ තිබී සොයාගෙන ඇති බවත් ප්‍රකාශ කර සිටියි. එසේම මේ සම්බන්ධයෙන් පොලිසියෙන් විමසීමේදී එම තරුණයා සිය දිවි නසා ගැනීමට උත්සාහ කළ බව මවට පවසා ඇත.
පොලිස් අත්අඩංගුවට පත්වූ සැකකරුවන්ට වදහිංසා කිරීමත් ඔවුන් ඝාතනය කිරීමත් සම්බන්ධයෙන් විරෝධය දක්වමින් එවැනි ක්‍රියා වහාම නවත්වන ලෙසට පොලිස්පතිතුමා ඇතුළු වගකිවයුත්තන්ට අප සංවිධානය විසින් මීට පෙර දන්වා ඇත. එසේම, වැලිකඩ පොලිසිය තුල මීට පෙර රාජ් කුමාරි යන කාන්තාවද මේ ආකාරයට වද හිංසාවට ලක්වී මියගොස් ඇත.
ඒ අනුව පොලිසිය විසින් නීතියට පටහැනිව සිදුකරන මෙවැනි ක්‍රියා නැවැත්වීමට වහාම පියවර ගතයුතු වේ. එසේ නොවුනහොත් නීතියේ පාලනය බිඳවැටි පුද්ගල අයිතිවාසිකම් බිඳවැටීම නොවැළැක්විය හැකි වේ. එබැවින් ඉහත කී මුතුවාඩිගේ සත්සර නිමේෂ් නමැති තරුණයාගේ මියයාම සම්බන්ධයෙන් ඉක්මන් පරීක්ෂණයක් සිදුකර අදාළ වගකිවයුත්තන්ට එරෙහිව නීතිය ක්‍රියාත්මක කරන ලෙස අප සංවිධානය ඉල්ලා සිටිමු.
ස්තූතියි,
නීතීඥ සේනක පෙරේරා,
විධායක අධ්‍යක්ෂක, සිරකරු අයිතිවාසිකම් සුරැකීමේ කමිටුව.
මේ හා සමාන සිදුවීමක් 2023 වසරේ සිදුවූයේද මෙම වැලිකඩ පොලීසියේදී මය.
ප්‍රසිද්ධ කාන්තාවක් වන සුදර්මා නෙත්තිකුමාරගේ නිවසේ සේවය කළ ආර්. රාජ් කුමාරිව වර්ෂ 2023 මැයි 11 වන දා වැලිකඩ පොලිසිය මගින් අත්අඩංගුවට ගෙන අමානුෂික ලෙස පහර දි ඝාතනය කෙරිණ.
වැලිකඩ පොලිසිය මගින් ඇයව අත්අඩංගුවට ගෙන තිබුනේ නෙත්තිකුමාර්ගේ නිවසෙන් මුද්දක් සොරා ගත්තා යැයි කියන සිද්ධියක් සම්බන්ධයෙන් සැකපිටය. අවුරුදු 38 ක් වයසැති රාජ් කුමාරි බදුල්ල දෙමෝදර නාවල වත්තේ පදිංචිකාරීනියක් වන ඇය දෙදරු මවකි.
United Human Rights Organization විසින් වැඩබලන පොලිස්පතිවරයාට ලිපියක් යොමු කරමින් චෝදනා කරන්නේ රාජ් කුමාරි ඝාතකයන්ම සත්සර නිමේෂ්ගේ ඝාතනය සිදුවද්දී එකී මරණයන්ට වගකිව යුතු ස්ථානාධිපති තවමත් වැලිකඩ ස්ථානාධිපති ලෙස ක්‍රියාකරනා බවය.
බටලන්ද ඝාතකයන් ගැන කව් ගී සටන්පාඨ ලියැවෙද්දී අපගේ වර්තමානය තුළ මේ සිදුවන්නේ කුමන ඝාතනයන්ද?
මේ පොලිසියේ මාධ්‍ය කොට්ඨාශයේ කරුණු දැක්වීමේ ලිපියයි. මෙය තවත් සුපුරුදු ආයුධ පෙන්වීමේ නාටකයේ තවත් පැතිකඩකි.
දේශබන්දු තෙන්නකෝන් අත්අඩංගුවේ පසුවුවද දේශබන්දුලාගෙන් ශ්‍රී ලංකාවේ පොලීසියට අඩුපාඩුවක් නැත්තේ ය.
පොලිස් කොමිසමත්, පොලිස් ඇමතිත්, ආණ්ඩුවත්, විපක්ෂයත් මර නින්දේ ය.
@සමාරා
