මධ්‍යම මියන්මාරයට දැඩි බලපෑමක් ඇති කළ ප්‍රබල භූමිකම්පා දෙකකින් එරට
සෞඛ්‍ය සේවාවන් අඩාල වූ අතර දහස් ගණනකට ජීවිත තර්ජන ගෙන එන තුවාල හා රෝග පැතිරීමේ අවදානමක් ඇති විය.
ඒ අනුව මියන්මාරයට මානුෂීය ආධාර ලබා දෙන ලෙස හිටපු ජනාධිපති රනිල් වික්‍රමසිංහ ඊයේ රජයෙන් ඉල්ලා තිබිණි.
2015 නේපාල භූමිකම්පාවට ශ්‍රී ලංකාව දැක්වූ ප්‍රතිචාරය ගැන සඳහන් කරමින් හිටපු ජනාධිපතිවරයා පැවසුවේ හදිසි මෙහෙයුම් සඳහා ශ්‍රී ලංකාව විසින් හමුදා කණ්ඩායමක් යැවූ අතර එම අවස්ථාවේ ඉන්දියාවෙන් පසු දෙවැනි විශාලතම ආධාර දායකයා බවට ද ශ්‍රී ලංකාව පත්වූ බවයි.
“ශ්‍රී ලංකාව ක්‍රියා කළ යුතුයි. මගේ යෝජනාව වන්නේ මියන්මාරයේ තාවකාලික රෝහලක් පිහිටුවීම සඳහා හමුදා වෛද්‍ය බලකායේ සාමාජිකයන් යෙදවීමයි.”
හිටපු ජනාධිපතිවරයාගේ යෝජනාවට ප්‍රතිචාර දක්වමින් ශ්‍රී ලංකා රජය විසින් මියන්මාරයේ භූ කම්පනයෙන් විපතට පත් පිරිස වෙනුවෙන් අමෙරිකානු ඩොලර් මිලියන 1 ක මානුෂීය ආධාර ලබා දීමට තීරණය කර තිබේ.
මීට අමතරව, විපතටපත් වූ පිරිසට සහාය වීම සඳහා වෛද්‍ය කණ්ඩායම් සහ සෞඛ්‍ය අංශයේ සහාය ලබා දීමට සූදානම් බවද අද නියෝජ්‍ය විදේශ කටයුතු අමාත්‍ය අරුන් හේමචන්ද්‍ර වැඩිදුරටත් පැවසීය.
