ඉන්දීය අග්‍රාමාත්‍ය නරේන්ද්‍ර මෝදිගේ සංචාරය හේතුවෙන් අනුරාධපුර නගර සීමාවෙහි සිටින
සියලුම අයාලේ යන සුනඛයන් ඉවත් කිරීමට අනුරාධපුර ආණ්ඩුකාර කාර්යාලය තීරණය කර ඇති බව සත්ව ජනගහන කළමනාකරණය සඳහා වූ පශු වෛද්‍යවරුන්ගේ සංගමය ඊයේ ප්‍රකාශ කළේය.
අප්‍රේල් මස මුල් සතියේ දින තුනක නිල සංචාරයක් සඳහා නරේන්ද්‍ර මෝදි ශ්‍රී ලංකාවට පැමිණීමට නියමිතයි.
ජය ශ්‍රී මහා බෝධිය වැඳ පුදා ගැනීමට මෙන්ම ශ්‍රී ලංකා දුම්රිය දෙපාර්තමේන්තුව යටතේ ඉන්දීය රජය විසින් අනුග්‍රහය දක්වන ව්‍යාපෘති විවෘත කිරීමට සහභාගී වීම වෙනුවෙන් ද ඔහු අනුරාධපුරයට පැමිණීමට නියමිතය.
අනුරාධපුර ආණ්ඩුකාර කාර්යාලය සහ මහ නගර සභා කොමසාරිස්වරයා සමඟ ඒකාබද්ධ සාකච්ඡාවකින් පසුව මෙම තීරණය ගත් බව සංගමයේ උපදේශක වෛද්‍ය චමිත් නානායක්කාර මාධ්‍ය වෙත පවසා තිබේ. අනුරාධපුර මහ නගර සභාව දැන් එම තීරණය ක්‍රියාත්මක කිරීමට සූදානමින් සිටිතැයි වාර්තා වන අතර මෙම නියෝගය වහාම ක්‍රියාත්මක කරන ලෙස නාගරික පශු වෛද්‍ය දෙපාර්තමේන්තුවට උපදෙස් දී ඇත.
අනුරාධපුර මහ නගර සභාවේ සහාය ඇතිව වසර පහක ක්‍රියාකාරී ව්‍යාපෘතියක් දැනට ක්‍රියාත්මක වෙමින් පවතින බවත්, අයාලේ යන සුනඛයින්ගෙන් සියයට 90 කට වඩා එන්නත් කර විෂබීජහරණය කර ඇති බවත් වෛද්‍ය නානායක්කාර පවසයි. ව්‍යාපෘතියේ ප්‍රගතියෙන් පසුව, අනුරාධපුරයේ ජලභීතිකා රෝගයට අදාළ කිසිදු සිද්ධියක් මෙතෙක් වාර්තා වී නොමැත.
ඒ අනුව අනුරාධපුර නගර සීමාව තුළ සිටින සියලුම අයාලේ යන බල්ලන් ඉවත් කිරීමට නියෝග කර ඇති බව ද ඔහු පැවසීය.
මේ පිළිබඳ වැඩිදුර විස්තර සඳහා අනුරාධපුර මහ නගර සභා කොමසාරිස්වරයා සම්බන්ධ කරගත් විට, ඉන්දීය අග්‍රාමාත්‍ය නරේන්ද්‍ර මෝදි ගේ සංචාරය සඳහා වන කටයුතු සම්බන්ධයෙන් මෑතකදී සාකච්ඡාවක් පවත්වා ඇති බව ඔහු තහවුරු කළේය.
"රැස්වීමේදී, අපි මාර්ගවල සැරිසරන අයාලේ යන බල්ලන් සහ ගවයින් පිළිබඳ ගැටළුව සාකච්ඡා කළා. ඉන්දීය අග්‍රාමාත්‍යවරයා අනුරාධපුර නගරයෙන් පිටව යන තුරු දින දෙකක් තම සතුන් නිදහස් නොකරන ලෙස බල්ලන් සහ ගව හිමිකරුවන්ට දැනුම් දීමටත් එහිදී තීරණය කලා"
