වත්මන් ආණ්ඩුව පොරොන්දු කඩකර ඇති බවත්, ජනතාව නොමඟ යවා ඇති බවත්
එක්සත් ජනරජ පෙරමුණේ නායක හිටපු අමාත්‍ය පාඨලි චම්පික රණවක පවසයි.
විශේෂයෙන්ම, සහල් සහ ආහාර බදු පිළිබඳ ජනාධිපතිවරයාගේ පොරොන්දුව කඩකර ඇති බවත්, විදුලි බිල අඩු කිරීමේ පොරොන්දුව ඉටු නොකළ බවත් ඔහු චෝදනා කළේය.
“හාල් ඇටයක්වත් පිටරටින් ගේන්නේ නෑ මම ගොවි පුතෙක් තඹුත්තේගම. කඩවෙලා ඉවරයි. දෙවෙනි එක කිසිම ආහාරයකට මම බද්දක් ගහන්නේ නෑ කියලා. හාල් සේරුවකට 65 ක් ගහනවා. හාල්මැස්සෝ 100 ක් ගහනවා. ඒ වගේම පාන්පිටි කිලෝවකට 44 ක් ගහනවා. කිරිපිටි කිලෝවට 150 ක් ගහනවා. සීනි වලට රුපියල් 49 ක් ගහනවා.”
විදුලිය තුනෙන් එකකින් අඩු කරන බවට අනුර දිසානායක විසින් දෙන ලද පොරොන්දුව ඉටු නොකළ බවත්, සූර්ය බලශක්තිය කපා දමා ඩීසල් සහ ගල් අඟුරු භාවිතා කිරීම නිසා විදුලිබල මණ්ඩලය පාඩු ලබන බවත් ඔහු පෙන්වා දුන්නේ ය.
වත්මන් ආණ්ඩුව හොරු අල්ලන බවට ප්‍රකාශ කළ ද, සැබෑ හොරුන් අල්ලා ගැනීමට අපොහොසත් වී ඇති බවත්, දේශපාලන පළිගැනීම් සිදුකරන බවත් ඔහු පෙන්වා දුන්නේ ය. බටලන්ද වධකාගාරය පිළිබඳ පරීක්ෂණයක් පවත්වා රනිල් වික්‍රමසිංහ ට නඩු පවරන ලෙස ද, ඔහු අනුර දිසානායක ජනාධිපතිවරයාට අභියෝග කළේය.එමෙන්ම, ඉදිරි පළාත් පාලන මැතිවරණයේ දී එක්සත් ජනරජ පෙරමුණට ඡන්දය ලබාදෙන ලෙසත්, කෝට්ටේ නගර සභාවේ ගැටලු විසඳීමට තම පක්ෂයට හැකියාව ඇති බවත් ඔහු පැවසීය.
“අපිට දෙන්න කෝට්ටේ නගර සභාව. යාචක ප්‍රශ්නේ, සුනඛ ප්‍රශ්න, ඒ වගේම පිරිසිදුකමේ ප්‍රශ්න, කසළ ප්‍රශ්න ප්‍රායෝගිකව විසඳන මං පෙතක් අපි ඉදිරිපත් කරනවා. අලුත් ආදායම් උපදවන හැටි ගැන කියනවා. ඒ සඳහා වැදගත් පිරිසක් අපි මේ සභාවට යවමු.”
ශ්‍රී ජයවර්ධනපුර කෝට්ටේ මහ නගර සභා මැතිවරණය පැවැත්වීමට නියමිත බවත්, 2018 පැවති මැතිවරණ ක්‍රමයම ක්‍රියාත්මක වන බවත් පාඨලී චම්පික රණවක සඳහන් කළ අතර, මැතිවරණය මුලින්ම 2023 මාර්තු මාසයේ පැවැත්වීමට නියමිතව තිබුණ ද, එවකට පැවැති ආණ්ඩුව මුදල් නොමැති බව පවසා එය කල් දැමූ බවත්, නමුත් ශ්‍රේෂ්ඨාධිකරණ තීරණය අනුව මැතිවරණය පැවැත්වීමට සිදුවූ බවත් ඔහු පෙන්වා දුන්නේ ය.
2019 සහරාන්ගේ ප්‍රහාරයෙන් පසු ජාතිය සහ ආගම බේරා ගැනීමට වීරයෙකු අවශ්‍ය බව පවසා ජනතාව නොමග ගිය බවත්, එහි ප්‍රතිඵලයක් ලෙස රට බංකොලොත් වූ බවත් ප්‍රකාශ කල පාඨලී 2022 දී ජනතාව පාරට බැස ජනාධිපතිවරයාට ඉල්ලා අස්වන ලෙස බල කල බව ද සිහිපත් කළේ ය.
ශ්‍රී ලංකාව තවමත් බංකොලොත් භාවයෙන් මිදී නොමැති බවත්, ණය ගෙවීමේ කාලය 2042 දක්වා කල් දමා ඇති බවත්, 2028 සිට නැවත ණය ගෙවීමට සිදුවන බවත් ඔහු වැඩිදුරටත් පෙන්වා දුන්නේ ය. ජනතාව පැරණි දේශපාලඥයන්ට එපා යැයි පවසා නන්නාඳුනන පුද්ගලයන් 150 කට ආසන්න පිරිසක් පාර්ලිමේන්තුවට යැවූ බවත්, නමුත් ඔවුන් බොරුකාරයන් බව දැන් ජනතාවට වැටහී ඇති බවත් ඔහු පැවසීය.
එක්සත් ජනරජ පෙරමුණ විසින් කොළඹ දිස්ත්‍රික්කයේ කෝට්ටේ මහ නගර සභාව වෙනුවෙන් ඉදිරි පළාත් පාලන මැතිවරණය සඳහා පවත්වනු ලැබූ පළමු ජන හමුවේදී මෙම අදහස් පළ කරන ලද අතර, රාජගිරිය හේවාවිතාරණ විද්‍යාලය අසල දී කෝට්ටේ මහ නගර සභා අපේක්ෂක දුතාංග සෙනවිරත්න ගේ සංවිධානයෙන්, එක්සත් ජනරජ පෙරමුණේ නායක පාඨලී චම්පික රණවක ගේ ප්‍රධානත්වයෙන් ජන හමුව පැවැත්විණ.
@මාධ්‍ය ඒකකය
