ඉන්දීය අග්‍රාමාත්‍ය නරේන්ද්‍ර මෝදි අප්‍රේල් මාසයේදී ශ්‍රී ලංකාවට පැමිණීමට
ඉඩ තිබෙන බව නවදිල්ලි ආරංචිමාර්ග පවසයි.
ශ්‍රී ලංකා ආරංචි මාර්ගවලට අනුව, මෙම සංචාරය තවමත් තහවුරු වෙමින් පවතින අතර අප්‍රේල් 5 වන දින පමණ එය සිදුවිය හැකි බවත්, දෙරට අතර මිත්‍රත්වය සහ ආර්ථික සබඳතා ඇතුළු කරුණු ගණනාවක් කෙරෙහි මෙහිදී අවධානය යොමු කරනු ඇති බව පැවසේ.
මෙම සංචාරය සඳහා ආරාධනාව සිදුකර ඇත්තේ ශ්‍රී ලංකා ජනාධිපති අනුර කුමාර දිසානායක විසින් 2024 දෙසැම්බර් මැද භාගයේදී නවදිල්ලි නුවරට සිදුකළ දෙදින නිල සංචාරයේදීය. 2024 සැප්තැම්බර් මාසයේදී තේරී පත් වීමෙන් පසු ජනාධිපති දිසානායක ගේ පළමු විදේශ සංචාරය ඉන්දියාවේ සිදුකෙරිනි.
මෙම සංචාරය අතරතුර, ශ්‍රී ලංකාවේ ණය බර ලිහිල් කරමින්, සම්පූර්ණ කරන ලද ණය මාර්ග ව්‍යාපෘති හතක් සඳහා ගෙවීම් වශයෙන් ඩොලර් මිලියන 20 ක් ප්‍රදාන බවට පරිවර්තනය කරන බව ඉන්දීය රජය නිවේදනය කළේය.
2022 දී රට මුහුණ දුන් ආර්ථික අර්බුදය අතරතුර දී ඉන්දියාව විසින් කොළඹට ලබා දුන් ඩොලර් බිලියන 4 ක සහයෝගය මත මෙම නිවේදනය සිදුකර ඇත.
