ලංකා විදුලි බල මණ්ඩලයේ සේවක සේවිකාවන්ට නත්තල් ප්‍රසාද දීමනා ලබාදීම සඳහා
විදුලි සේවක සංගමය විසින් ලබා දුන් කාලය දෙසැම්බර් 10 වන දින අවසන් වෙයි.
මණ්ඩලයේ සභාපතිවරයාට ලිපියක් යොමු කරමින් එම සේවක සංගමය දැනුම් දී තිබුණේ දෙසැම්බර් මස 10 වන දිනට පෙර නත්තල් ප්‍රසාද දීමනා ලබා දීමට කටයුතු කළ යුතු බවයි.
පසුගිය වසර දෙක තුළදීම ප්‍රසාද දීමනාව ලබාදීමට හිටපු පාලනාධිකාරිය කටයුතු නොකළ බවත් ලංකා විදුලි බල මණ්ඩලය තවදුරටත් පාඩු ලබන ආයතනයක් නොවන නිසා මෙම ප්‍රසාද දීමනාව ලබාදිය යුතු බවත් ඔවුන් පෙන්වා දී තිබිණ.
නව රජය යටතේ එම ප්‍රසාද දීමනාව ලබාදෙන ලෙස සභාපතිවරයාගෙන් ඉල්ලීමක් කරන ලද බවද සංගමයේ ප්‍රධාන ලේකම්වරයා පසුගියදා සඳහන් කලේය.
කෙසේ වුවද වත්මන් රජය බලයට පැමිණීමට පෙර පැවසූ බලය ලබාගත් සැනින් ජනතාව මත පටවා ඇති විදුලි බිලෙහි වැඩිවීම අඩුකරන බව කියා සිටියද එය තවත් මාස 06ක් යනතුරු සිදුකළ නොහැකි බව ලංකා විදුලිබල මණ්ඩලය පසුගියදා පැවසුවේය.
විදුලි පාරිභෝගිකයන්ගේ විදුලි බිලෙහි බර ඉවත් කිරීමට අසමත් වන ආයතනයක් සේවකයින්ට ප්‍රසාද දීමනා ලබාදේද යන්න පිළිබඳව විදුලි පාරිභෝගිකයින් විමසිල්ලෙන් පසුවනු ඇත.
