පවතින විදුලි ගාස්තුව ලබන වසරේ මාස හයක් යනතුරු සංශෝධනය නොකිරීමට
ලංකා විදුලිබල මණ්ඩලය යෝජනා කර ඇතැයි මහජන උපයෝගීතා කොමිසමේ ආයතනික සන්නිවේදන අංශයේ අධ්‍යක්ෂ ජයනාත් හේරත් පවසා ඇත.
එම මාස හයක කාලය තුළ රුපියල් මිලියන 2330ක ලාභයක් ඇස්තමේන්තු කරන බවත් එම ලාභය මත පිහිටා ඉදිරි මිල සංශෝධන කළ හැකි බවත් ලංකා විදුලි බල මණ්ඩලය මහජන උපයෝගීතා කොමිසමට කළ යෝජනාවේ සඳහන් වී ඇතැයි එකී ආරංචිමාර්ග කියයි.
ඒ අනුව එතැන් සිට 2025 වසරේ ජූනි මස අවසානය දක්වා ම පවතින විදුලි ගාස්තුවේ සංශෝධනයක් නොකිරීමට ලංවිම යෝජනා කර ඇත.
ලංකා විදුලිබල මණ්ඩලයේ මෙම යෝජනාව ගැන කරුණු අධ්‍යයනය කර මහජන උපයෝගීතා කොමිසමේ තීන්දුව ලබන ජනවාරි මස 17 වන දා ප්‍රකාශ කරන්නේ යැයි ද ආයතනික සන්නිවේදන අංශය වැඩිදුරටත් පවසයි.
පසුගිය ආණ්ඩුව සමයේ වාර්ෂිකව සිව් වතාවක් විදුලි ගාස්තුව සංශෝධනය කළ යුතු බවට යෝජනා වී තිබූ අතර 2023 වසරේදී තෙවරක් සහ මෙම වර්ෂයේදී දෙවරක් විදුලි ගාස්තු සංශෝධනය කෙරිණි.
මේ අතර, මෙම වසරේ දෙසැම්බර් මස සිට ක්‍රියාත්මක කිරීම සඳහා විදුලි ගාස්තු සංශෝධනය සම්බන්ධයෙන් වන යෝජනාව ලංවිම විසින් පසුගිය ඔක්තෝබරයේදී මහජන උපයෝගීතා කොමිසම වෙත ඉදිරිපත් කරනු ලැබිණි.
එහෙත් එය දෝෂසහගත බව දැක්වූ එම කොමිසම එය නැවත සකස් කර ඉදිරිපත් කිරීමට සති දෙකක කාලයක් ලබා දුන් අතර (දෙසැ. 6) මෙම යෝජනාව ඉදිරිපත් කෙරුණේ ඒ අනුවය.
කෙසේ වෙතත්, මෙසේ දිගින් දිගට ම විදුලි ගාස්තු සංශෝධනය පමා කිරීම මගින් ම විදුලි පාරිභෝගිකයාට අයුක්තියක් සිදුව ඇතැයි විදුලිය පාරිභෝගිකයන්ගේ සංගමයේ සභාපති සංජීව ධම්මික පවසයි.
මේ තත්ත්වයට මහජන උපයෝගීතා කොමිසම පැහැදිලි විසඳුමක් දිය යුතු යැයිද එසේ නොවුවහොත් මෙම ආයතනවලට එරෙහිව රජය මැදිහත්වීමක් කළ යුතු යැයි ද ඔහු අවධාරණය කරයි.
මේ කිසිදු මගකින් විසඳුමක් නොලැබෙන්නේ නම් විදුලි පාරිභෝගිකයන් සිය අයිතිය වෙනුවෙන් ඉදිරියට එනු ඇතැයි ද ඔහු වැඩිදුරටත් සඳහන් කරයි.
කෙසේ වුවද ජාතික ජන බලවේගය සිය මැතිවරණ ව්‍යාපාරයේදී විදුලිය මිල අඩු කිරීම බලයට පැමිණි විගස සිදුකරන බවට දිගින් දිගටම සහතික වී තිබුණි.
