මැතිවරණ කොමිෂන් සභාව විසින් මහ මැතිවරණය පැවැත්වීම සඳහා මහා භාණ්ඩාගාරයෙන්
රුපියල් බිලියන 11 ක් ලබා දී ඇති බව ආරංචිමාර්ග පවසයි.
ජනාධිපති අනුර කුමාර දිසානායක විසින් පාර්ලිමේන්තුව විසුරුවා හැරියේ ඡන්ද විමසීමෙන් අනතුරුව නොවැම්බර් 14 වැනි දිනට හදිසි මහ මැතිවරණයක් පවත්වන බව ප්‍රකාශ කරමිනි.
මැතිවරණ කොමිසමේ සභාපති ආර්.එම්.එල්.ඒ රත්නායක පවසා තිබුණේ මැතිවරණය පැවැත්වීම සඳහා වියදම් පියවා ගැනීම වෙනුවෙන් තම කාර්යාලය රුපියල් බිලියන 11ක් ඉල්ලා සිටි බවය. ඒ අනුව ඒ සඳහා භාණ්ඩාගාරයෙන් මුදල් ප්‍රතිපාදන ලබාදීමට ජනාධිපතිවරයාට බලය තිබේ.
පසුගියදා අවසන් වූ ජනාධිපතිවරණය සඳහා රජය රුපියල් බිලියන 10ක් වෙන් කර තිබිණි.
කෙසේ වුවද මහ මැතිවරණය හදිසියේ ප්‍රකාශයට පත් කිරීමත් සමඟ පළාත් පාලන මැතිවරණය පැවැත්වීම තවදුරටත් කල් දැමීමට මැතිවරණ කොමිසමට සිදුව ඇත. එහෙත් ජනාධිපතිවරණය පැවැත්වීමටත් පෙර ශ්‍රේෂ්ඨාධිකරණය ලබාදුන් තීන්දුවක නියෝගය වී ඇත්තේ පළාත් පාලන ඡන්ද විමසීම කඩිනමින් සිදුකළ යුතු බවය.
