ජනාධිපති ජෝ බයිඩන්ට වඩා, කමලා හැරිස් ඩිමොක්‍රටික් පක්ෂ ජනාධිපති ධුර අපේක්ෂිකාව ලෙස නොවැම්බර් පස් වැනිදා පැවැත්වෙන ජනාධිපතිවරණයට ඉදිරිපත් වන්නේ නම්,
ඇය පරාජය කිරීම තමන්ට පහසුවක් වනු ඇති බව ප්‍රතිවාදී රිපබ්ලිකන් පක්ෂ ජනාධිපති ධුර අපේක්ෂක ඩොනල්ඩ් ට්‍රම්ප් පවසයි.
‘බයිඩන් වගේ නොවෙයි. කමලා හැරිස් පරාජය කිරීම අමාරු වෙන්නේ නැහැ‘
යැයි ට්‍රම්ප් අවධාරණය කර ඇත්තේ සී.එන්.එන්. පුවත් සේවය සමඟ සම්බන්ධ වෙමිනි.
ජනාධිපති ධුර අපේක්ෂකත්වයෙන් ඉවත් වී, උප ජනාධිපතිනී කමලා හැරිස්, ජනාධිපති ධුර අපේක්ෂිකාව ලෙස නම් කිරීමට ජනාධිපති ජෝ පියවර ගැනීමත් සමඟ කමලා හැරිස් අවධාරණය කළේ තමන් කෙසේ හෝ ප්‍රතිවාදී රිපබ්ලිකන් පක්ෂ අපේක්ෂක ඩොනල්ඩ් ට්‍රම්ප් පරාජය කරන බවය. ට්‍රම්ප් ප්‍රතිචාර දැක්වීමක් කළේ කමලා හැරිස්ගේ මෙම ප්‍රකාශයටය.
මේ වනවිට ට්‍රම්ප් සිය සමාජ මාධ්‍ය ගිණුම ඔස්සේ උප ජනාධිපතිනී කමලා හැරිස් විවේචනය කිරීම ආරම්භ කර ඇතැයි ද ඇමෙරිකන් පුවත් සේවා පෙන්වා දෙයි. 2020 වසරේ පැවැති ජනාධිපතිවරණයේ දී, ජෝ බයිඩන්, කමලා හැරිස්, උප ජනාපධිති ධුරයට නම් කරද්දී ද ට්‍රම්ප් දිගින් දිගටම කමලා හැරිස් විවේචනය කළේය.
බයිඩන් විසින් ජනාධිපති ධුර අපේක්ෂකයා ලෙස නම් කළ කමලා හැරිස්ට, ජනාධිපතිවරණයට ඉදිරිපත් වීමට නම්, ඩිමොක්‍රටික් පක්ෂයේ අනුමැතිය හිමිවිය යුතුය. ඉදිරි දින කීපයේ ඒ සඳහා කටයුතු යෙදෙනු ඇතැයි ද පැවැසෙයි.
59 හැවිරිදි කමලා හැරිස්ට, නොවැම්බර් පස් වැනිදා පැවැත්වෙන ඇමෙරිකන් ජනාපධිතිවරණයෙන් ජය ගැනීමට හැකිවුවහොත්, ඇමෙරිකන් ජනාධිපති ධුරයට පත්වන පළමු කාන්තාව ඇය වනු ඇත.
(ඒ.එෆ්.පී.)
lankadeepa
