ගෝඨා අතාරින්නේ දිලිත්ද? පී.බී.ද? අරගලය එන්නත් කලින් ආර්ථික අර්බුදය එන්නත් කලින් ‘ගුරුදා විග්‍රහයේ’ පළවූ ලිපියක හෙඩිම ඕකය.
එම ලිපියට පදනම වූයේ ගෝඨාගේ ජනාධිපති ලේකම් පී.බී.ට එරෙහි දිලිත්ගේ ට්විටර් යුද්ධයයි. දිලිත්ගේ මතය වූයේ ගෝඨා ෆේල් වීමට හේතුව පී.බී. නිසා පී.බී. ඉවත් කළ යුතුයි හෝ ඉවත් විය යුතු බවය. අන්තිමේදී ගෝඨා, දිලිත්ව තෝරාගත්තේය. පී.බී.ට ගෙදර යන්න සිදුවිය.
ගෝඨා ජනාධිපති කරන පමණක් නොව ජනාධිපති අපේක්ෂක කරන කැම්පේන් එකත් කළේ දිලිත්ය. ඒ නිසා ගෝඨාට පී.බී.ට වඩා දිලිත්ව වටී. ගෝඨා දිලිත්ව හඳුනා ගැනීමට පෙර දිලිත් සහ වරුණි අමුණුගමගේ ට්‍රයි ඇඩ් කම්පැනිය කැම්පේන් කළේ චන්ද්‍රිකාටය. දිලිත්ගේ කොම්පැනියේ හවුල්කාරිය වූ වරුණි අමුණුගම හිටපු ඇමැති සරත් අමුණුගමගේ දියණියයි. ට්‍රයි ඇඩ් කොම්පැනිය චන්ද්‍රිකාගේ කැම්පේන් කරන්න කලින් චන්ද්‍රිකාගේ කැම්පේන් කළේ මංගලගේ අක්කාගේ ඇඩ්වර්ටයිසින් කොම්පැනියය. ඒත් 2004 මහ ඡන්දයේ කැම්පේන් එක මංගලගේ අක්කාට දෙන්න එවක ජනාධිපති චන්ද්‍රිකා බය වුණේ මංගල සහ ජවිපෙ සමග තියෙන සමීප සම්බන්ධය නිසා මංගලගේ අක්කාගේ කොම්පැනිය ශ්‍රීලනිපය සහ ජවිපෙ එක්ව හදපු එක්සත් ජනතා නිදහස් සන්ධාන කැම්පේන් එකේදී ජවිපෙට වැඩි ප්‍රසිද්ධියක් දෙයි කියාය. එකල මංගල ජවිපෙට ඇලුම් කිරීම චන්ද්‍රිකා රිස්සුවේ නැත. මේ වෙලාවේ චන්ද්‍රිකා මාධ්‍ය කැම්පේන් එක කරන්න මංගලට වඩා බර තැබුවේ මාධ්‍ය ඔස්තාර් කෙනෙක් වූ යූ.ඇන්.පී.යෙන් ශ්‍රී.ල.නි.ප.යට ආ ආචාර්ය සරත් අමුණුගමටය. දිලිත් සහ චන්ද්‍රිකාගේ කොම්පැනිය 2004 මහ මැතිවරණයේදී ‘රට පෙරට’ කැම්පේන් එක කළේ සරත් අමුණුගමගේ මැදිහත් වීමෙනි.
රට පෙරට කැම්පේන් එක හිට් කැම්පේන් එකක් විය. චන්ද්‍රිකා යළි ආණ්ඩුවක් පිහිටුවූවාය. දිලිත්ට සහ වරුණිට ටී.වී., රේඩියෝ චැනල් එකක් ලැබිණි. චන්ද්‍රිකා සහ මංගල අතර නොහොඳ නෝක්කාඩුකම් පටන්ගත්තේ එතැන් සිටය. 2005 ජනාධිපතිවරණයේදී මංගල මහින්ද වෙනුවෙන් පෙනී සිටියේය. සරත් අමුණුගම පෙනී සිටියේ චන්ද්‍රිකා වෙනුවෙන්ය. මහින්දට එරෙහිව යූ.ඇන්.පී. ජනාධිපති අපේක්ෂක රනිල් ළඟට යන්න චන්ද්‍රිකාට හිතවත් ඇමැතිවරු පිරිසක් සූදානම්ව සිටියහ. සරත් අමුණුගමත් ඒ අතර විය. ජනාධිපතිවරණය අවසන් වූවාට පසු ජාතික ආණ්ඩුවක් හදමු කියා රනිල් ඔවුන්ට ජනාධිපතිවරණයට කලින් එන්න එපා කීවේය. රනිල්ට දිනුම ඒ තරම් ෂුවර් විය. අමුණුගම මේ වෙලාවේ දිලිත්ගේ සහ වරුණිගේ කොම්පැනියට රනිල්ගේ කැම්පේන් එකේ කොටසක් ලබාදෙන්න උත්සාහ ගනිමින් සිටියේය.
2005 මහින්ද ජනාධිපති විය. ගෝඨා ආරක්ෂක ලේකම් විය. අමුණුගම ප්‍රබල චරිතයක් නොවීය. යුද්ධය සඳහා ‘අපි වෙනුවෙන් අපි’ කැම්පේන් එක කරන්න දිලිත් මහින්දගේ ආරක්ෂක ලේකම් ගෝඨා එක්ක සෙට් වෙන්නේ මේ කාලයේය. එතැන් සිට දිලිත් ගෝඨාගේ අගසව් වේ. 2010 ජනාධිපතිවරණයේදී මහින්ද දිනවන්න දිලිත් සහ වරුණිගේ ‘දෙරණ’ ජාලය බැහැලා වඩ කළහ. ෆොන්සේකාට එරෙහි සුදු කොඩි නඩුවේ හඬ පට උසාවියට දුන්නේද දෙරණය.
2015 ජනාධිපතිවරණය වන තෙක් දෙරණ ලංකාවේ ප්‍රසිද්ධ චැනලයක් නොවීය. දෙරණ නැග්ගේ 2015 ජනාධිපතිවරණයට පසු ‘මහින්ද සුළඟ’ සජීවීව ප්‍රචාරය කරලාය. අන්තිමේදී දෙරණට මහින්දත්, මහින්දට දෙරණත් නැතිවම බැරි විය. දිලිත් දෙරණ හරහා ගෝඨාව ජනාධිපති අපේක්ෂක කරන්නේ ඒ හයිය පාවිච්චි කරලාය. ගෝඨාගේ ජයග්‍රහණය වෙනුවෙන් දිලිත් සිය මාධ්‍ය ජාලය ඔට්ටුවට තියලා කැලණි ගඟේ නයි නටවලා පෙන්වයි. ගෝඨා දිනයි. ගෝඨා දිනපු විගස ගෝඨාගේ පළමු පත්වීම් ලබන්නන් අතර වරුණිගේ සැමියා රොහාන් ප්‍රනාන්දු ද වෙයි. ඔහු ටෙලිකොම් සභාපති ධුරයට පත්වෙයි.
ටෙලිකොම් සභාපති ධුරය රජුන් තනන්නන්ට සහ රජුගේ අග්‍ර පුරෝහිතයන්ට හිමි වන ධුරයකි. 1994 චන්ද්‍රිකාට අගමැති අපේක්ෂකකම අරන් දෙන්න ලොකුම ගේම ගැහුවේ හේමසිරි ප්‍රනාන්දුය. ඔහු එවක විපක්ෂ නායිකා සහ ශ්‍රීලනිප නායිකා බණ්ඩාරනායක මැතිනියගේ විශ්වාසවන්තයකු විය. මැතිනිගේ ජ්‍යොතිෂ කටයුතු සම්බන්ධීකරණය කරන්නේද ඔහුය. 1994 මැතිනියට බලය ගන්න නම් මැතිනිය චන්ද්‍රිකා ඉස්සරහට දමා පිටුපසට වී සිටිය යුතුය යන ජ්‍යොතිෂ උපදෙස මැතිනියට දෙන්නේ හේමසිරිය. ඒ, ඔහු මැතිනියගේ ජ්‍යොතිෂවේදීන් ලවාය. මැතිනිය චන්ද්‍රිකාට අගමැති අපේක්ෂකත්වය දෙන්න තීරණය කරන්නේ ඉන් පසුවය. චන්ද්‍රිකා දිනලා ආණ්ඩුව පිහිටුවීමෙන් පසු හේමසිරි ඉල්ලන්නේ ටෙලිකොම් සභාපතිකමය.
2001 චන්ද්‍රිකාගේ ආණ්ඩුව වට්ටන්නේ එස්.බී. – ජී.එල්. ඇතුළු චන්ද්‍රිකාගේ ආණ්ඩුවේ ඇමැතිවරු පිරිසකි. එස්.බී., චන්ද්‍රිකාගේ ආණ්ඩුව වට්ටවන්න එක් හේතුවක් වන්නේ ක්‍රිකට් බෝඩ් එකේ සභාපති තිලංග සුමතිපාලට චන්ද්‍රිකා පහර ගැසීමය. ඒ වෙනකොට තිලංග ක්‍රීඩා ඇමැති එස්.බී.ගේ සමීපතම දේශපාලන සගයා විය. 2001 චන්ද්‍රිකාගේ ආණ්ඩුව වට්ටවා රනිල් ආණ්ඩුව පිහිටුවීමෙන් පසු තිලංග රනිල්ගෙන් ඉල්ලන්නේ ටෙලිකොම් සභාපතිකමය.
2005 ජනාධිපතිවරණය ජය ගෙන මහින්ද ටෙලිකොම් සභාපතිකම දෙන්නේ මහින්ද වෙනුවෙන් පෙනී සිටි ‘දිවයින’ පුවත්පතේ හිමිකරු නිමල් වෙල්ගමටය. ඒ, වෙල්ගමගේ ඉල්ලීමක් මතය.
2015 ජනාධිපතිවරණය දිනා මෛත්‍රීපාල ටෙලිකොම් මංගල යටතට පත් කළත්, ටෙලිකොම් සභාපති කරන්නේ ඔහුගේ සොහොයුරු කුමාරසිංහ සිරිසේනවය. මෛත්‍රීපාල සහ මංගල අතර ගැටුම පටන්ගන්නේත් එය මෛත්‍රීපාල සහ රනිල් අතර ගැටුමක් බවට පත්වන්නේත් මේ ටෙලිකොම් සභාපති ධුරය මංගලගේ මිත්‍රයකුට නොදීම නිසාය.
2019 ජනාධිපතිවරණය දිනලා ගෝඨා ටෙලිකොම් සභාපති ධුරය දෙන්නේ දිලිත් සහ වරුණි නියෝජනය කරන වරුණිගේ සැමියාටය. වරුණිගේ සැමියා රොහාන් ප්‍රනාන්දු, ගෝඨාගේ ‘වියත් මඟ’ තුළද වැඩ කළ අයෙකි. ගෝඨා ජනාධිපතිකමෙන් පලාගොස් රනිල් ජනාධිපති වූ විට හැමෝම හිතුවේ දිලිත් නිසා රනිල් රොහාන්ව ටෙලිකොම් සභාපති ධුරයේ තබාගනීය කියාය.
දිලිත් රනිල්ට හොඳටම සෙට් වෙන්නේ 2015 රනිල් අගමැති වූවාට පසු රනිල්ගේ සොහොයුරාගේ දුව වන ඉෂිනි වික්‍රමසිංහ හරහාය. 2005 සිට 2015 තෙක් රාජපක්ෂලා වෙනුවෙන් පෙනී සිටි මෛත්‍රී-රනිල් ආණ්ඩුවේ ප්‍රහාරයට ලක්වීම වළක්වා ගන්න දිලිත් වරුණිගේ සමීප මිතුරියක වන ඉෂිනි වික්‍රමසිංහ හරහා රනිල්ට සෙට් වෙද්දී වරුණි, මෛත්‍රී-රනිල් ආණ්ඩුවේ ඇමැතිවරයකු වන ඇයගේ පියා සරත් අමුණුගමගේ සහාය ලබාගනී. දිලිත්, රනිල් සහ ගෝඨා අතර සම්බන්ධය හදන්නේ මේ කාලයේය. 2019 අගෝස්තු 12 කලම්බු ටෙලිග්‍රාෆ් වාර්තා කරන්නේ ගෝඨා ජනාධිපති වුවහොත් රනිල් අගැමැති කරන්න ගෝඨා සහ රනිල් අතර සාකච්ඡාවල අතරමැදියකු ලෙස දිලිත් කටයුතු කරන බවය. ඒ සඳහා සජිත්ව පරාජය කරන්න රනිල් දිලිත් හරහා ඩීල් එකක් දමා ඇති බවය.
අන්තිමේදී රනිල් ගෝඨා යටතේ අගමැති විය. පසුව ජනාධිපති විය. රනිල් ජනාධිපති වී අයි.එම්.එෆ්. ගිවිසුම ගසා ටෙලිකොම් පුද්ගලිකකරණය කරන්න යද්දී ටෙලිකොම් සභාපති රොහාන් ප්‍රනාන්දු එයට එරෙහි විය. ටෙලිකොම් විකිණීම ලෙහෙසි නැත. තායිලන්තයේ විශාල මහජන වරමකින් ඇමැති වූ තක්ෂින් ෂිනවත්‍රාට රට දමා පැන යන්න සිද්ධ වූයේ තායි ටෙලිකොම් සිංගප්පූරුවට විකුණන්න ගිහින්ය. තායි රජු සහ හමුදාව තායි ටෙලිකොම් සිංගප්පූරුවට විකිණීම හැඳින්වූයේ රාජද්‍රෝහී ක්‍රියාවක් ලෙසය.
හැමෝම හිතුවේ රනිල්, දිලිත් නිසා රොහාන්ට අත තියන එකක් නැහැ කියාය. හැබැයි රනිල් දිලිත්ව අතහැර ටෙලිකොම් තෝරාගත්තේය.
‘ඒ කියන්නේ රනිල්ට දැන් දිලිත්ව වලංගු කාසියක් නෙවෙයිද…?’
කියන්න දන්නේ නැත. මේ තෝරාගැනීම හරිද වැරැදිද කියලා බලන්න තවම කල් වැඩිය.
@උපුල් ජෝශප් ප්‍රනාන්දුගේ ගුරුදා විග්‍රහයෙනි .
Mawrata
