"බෙදා හදා ගැනීමෙන් නොඅඩුවන එකම ධනය ආදරය සහ සතුටයි."
- ඇල්බට් ෂ්වයිට්සර්
මෙම දාර්ශනික වදන ප්‍රායෝගික යථාර්ථයක් බවට පත් කළ අපූරු අවස්ථාවක් පසුගියදා
හෙයියන්තුඩුව ප්‍රදේශයෙන් වාර්තා විය. ඒ, "මෙත් සිසිලෙන් – සුවබර දිවියකට" යන උතුම් තේමාව පෙරදැරිව, පාලි හා සංස්කෘත සංස්කෘතික හුවමාරු මධ්‍යස්ථානය විසින් සංවිධානය කරන ලද අස්වැන්න නෙළීමේ සහ බෙදා දීමේ වැඩසටහනයි.
දේශීය ආහාර සංස්කෘතිය, ස්වයංපෝෂිත ජීවන රටාව සහ වස විසෙන් තොර කාබනික වගාව ප්‍රවර්ධනය කිරීමේ අරමුණින් දියත් කෙරුණු 'මෙත් සිසිල' ව්‍යාපෘතියේ මංගල අස්වැන්න, 2026 ඔක්තෝබර් 17 වනදා හෙයියන්තුඩුව, දේවමිත්ත පෙදෙසේ පිහිටි මධ්‍යස්ථාන පරිශ්‍රයේදී ප්‍රදේශවාසීන් අතර බෙදා දෙන ලදී.
මෙය හුදෙක් එළවළු සහ පළා වර්ග බෙදා දීමකට සීමා නොවූ, තමා සතු දෑ අනෙකා සමඟ හුවමාරු කර ගැනීමේ මානවීය ගුණාංගය සමාජයට පෙන්වා දුන් සැබෑ සමාජ සත්කාරයකි. "මෙත් සිසිලේ අස්වැන්නෙන් - ඔබේ කොටස බෙදාගන්න - අනෙකාටත් තබා යන්න" යන අපූරු සංකල්පය යටතේ මෙම බෙදාදීම සිදුවීම විශේෂත්වයකි.
මෙම අගනා අවස්ථාවට මධ්‍යස්ථානයේ ගරු අධ්‍යක්ෂ (ආගමික, සංස්කෘතික හා සමාජ කටයුතු) පූජ්‍ය බලංගොඩ සීලරතන නායක හිමිපාණන්, ගරු සභාපති ආචාර්ය දමෙන්ද පෝරගේ සහ ගරු ලේඛකාධිකාරී ආචාර්ය ශර්මිලා මිල්රෝයි ඇතුළු කාර්ය මණ්ඩලය සහභාගී වූහ.
මෙහිදී අදහස් දැක්වූ පූජ්‍ය බලංගොඩ සීලරතන හිමියන් පැවසුවේ, මෙය සමාජ සත්කාරයක් පමණක් නොව මෙත් සිතින් පිරිනමන දානයක් ද වන බවයි. එමෙන්ම, මධ්‍යස්ථානය සතු ජාත්‍යන්තර සබඳතා හරහා මෙම ව්‍යාපෘතිය තවදුරටත් පුළුල් කිරීමේ අවශ්‍යතාව ද උන්වහන්සේ අවධාරණය කළහ.
අනතුරුව සභාව ඇමතූ මධ්‍යස්ථානයේ ගරු සභාපති ආචාර්ය දමෙන්ද පෝරගේ, 'නිරෝගීකම පරම ලාභය' යන බුදු වදන සිහිපත් කරමින්, ආයතනය සතු අනෙකුත් ඉඩම්වල ද මෙම වස විසෙන් තොර කාබනික වගාව ව්‍යාප්ත කිරීමට සැලසුම් කර ඇති බව පැවසීය. මෙම ව්‍යාපෘතිය සාර්ථක කර ගැනීමට වෙහෙසෙන සියලුම කාර්ය මණ්ඩලයට එතුමා සිය කෘතඥතාව පළ කළේය.
සංකේතාත්මකව අස්වැන්න ප්‍රදානය කිරීමේ අවස්ථාවට ගරු ලේඛකාධිකාරී ආචාර්ය ශර්මිලා මිල්රෝයි දායක වූ අතර, පැමිණ සිටි සියලු දෙනා සතුටින් තම අස්වැන්න ලබා ගත්හ.
ආගමික හා සංස්කෘතික ආයතනයක් ලෙස පාලි හා සංස්කෘත සංස්කෘතික හුවමාරු මධ්‍යස්ථානය ඉටු කරන මෙම සමාජ මෙහෙවර අතිශය ප්‍රශංසනීයයි. 'මෙත් සිසිල' කාබනික වගා වැඩසටහන අඛණ්ඩව පවත්වාගෙන යමින්, එහි ප්‍රතිලාභ නිරතුරුවම ප්‍රදේශවාසීන්ට ලබා දීම මධ්‍යස්ථානයේ ඉදිරි අපේක්ෂාවයි. සමාජයට යහපත සලසන මෙවැනි ප්‍රජා මූලික වැඩසටහන් තවත් බොහෝ දෙනෙකුට ආදර්ශයක් වනු නිසැකය.
මාධ්‍ය අංශය,
පාලි හා සංස්කෘත සංස්කෘතික හුවමාරු මධ්‍යස්ථානය
(330/7B, දේවමිත්ත පෙදෙස, හෙයියන්තුඩුව)
