"දහම් නැණින් හික්මුණු දරුවෙක්; සාමකාමී, සදාචාර සම්පන්න හෙට දවසක්" යන
තේමාව පෙරදැරි කර ගනිමින් 'සදහම් පාලම' (Dhamma Bridge) ව්යාපෘතිය යටතේ ක්රියාත්මක 'දම්සක් දරුවෝ' වැඩසටහන 2026 සැප්තැම්බර් 13 වන දින හෙයියන්තුඩුව පාලි හා සංස්කෘත සංස්කෘතික හුවමාරු මධ්යස්ථාන පරිශ්රයේදී අති උත්කර්ෂවත් අන්දමින් පැවැත්විණි.
මෙම උත්සවයේ සුවිශේෂීම අවස්ථාව වූයේ පාලි හා සංස්කෘත සංස්කෘතික හුවමාරු මධ්යස්ථානය විසින් සම්පාදනය කරන ලද 'දම්සක් පැවතුම් සූත්රය' මංගල පුස්තකය එළි දැක්වීමයි. බුදුරජාණන් වහන්සේගේ ප්රථම ධර්ම දේශනාවේ පරම සත්යය බාල පරපුර වෙත සමීප කරවීමේ අරමුණින් මෙම කෘතිය දිවයින පුරා සිටින දම්සක් දරුවන් ලක්ෂයක් (100,000) වෙත පිරිනැමීමේ දීපව්යාප්ත සදහම් යාත්රාවක් දියත් කිරීම මෙහි ප්රධාන අරමුණ වේ.
මෙම ඓතිහාසික අවස්ථාව සඳහා ප්රධාන ආරාධිත අමුත්තා ලෙස ශ්රී ලංකාවේ ඉන්දීය නියෝජ්ය මහ කොමසාරිස් ශ්රී මෛත්රී කුල්කර්ණී සහභාගී විය. සිය අදහස් දක්වමින් ඔහු ප්රකාශ කළේ, ඉන්දීය අගමැතිතුමන්ගේ අදහසකට අනුව ඉන්දියාව සහ ශ්රී ලංකාව යනු 'ශිෂ්ටාචාරමය නිවුන් සහෝදරයන්' (Civilizational Twins) බවයි. එසේම භෞතිකව ගොඩනඟන පාලම් දහස් ගණනකට වඩා මෙවැනි 'සදහම් පාලමක්' දෙරට අතර ශක්තිමත් පදනමක් තබන බවද ඔහු වැඩිදුරටත් අවධාරණය කළේය.
විශේෂ ආරාධිතයෙකු ලෙස එක්වූ ගම්පහ දිස්ත්රික් පාර්ලිමේන්තු මන්ත්රී අශෝක සපුමල් රංවල සඳහන් කළේ ඉන්දියාව අපගේ සමීපතම කල්යාණ මිතුරා බවත්, මෙම 'සදහම් පාලම' මගින් දෙරටේ සබඳතා මෙන්ම ප්රදේශයේ ගම්මාන ද මධ්යස්ථානය සමග සමීපව යා කෙරෙන බවත්ය.
ජාත්යන්තර බෞද්ධ මහා සමිති සම්මේලනයේ (IBC) නියෝජ්ය මහ ලේකම් සහ පාලි හා සංස්කෘත සංස්කෘතික හුවමාරු මධ්යස්ථානයේ සභාපති ආචාර්ය දමෙන්ද පොරගේ විසින් "The Importance of Pali & Sanskrit Cultural Education" යන මාතෘකාව යටතේ මෙහිදී විශේෂ දේශනයක් සිදු කරන ලදි. පාලි භාෂාව 'ශ්රේෂ්ඨ සම්භාව්ය භාෂාවක්' (Classical Language) ලෙස ප්රකාශයට පත් කිරීම සම්බන්ධයෙන් ඔහු එහිදී ඉන්දීය රජයට සිය කෘතවේදීත්වය පළ කළේය.
ආගමික වතාවත්වලට මුල්තැන දෙමින් ආරම්භ වූ වැඩසටහනේ පිළිගැනීමේ කතාව සහ අරමුණු පැහැදිලි කිරීම මධ්යස්ථානයේ ආගමික, සංස්කෘතික හා සමාජ කටයුතු අධ්යක්ෂ පූජ්ය බලංගොඩ සීලරතන ස්වාමීන් වහන්සේ විසින් සිදු කෙරිණි.
මෙම වැඩසටහනේ අනෙකුත් සුවිශේෂී අංග පහත පරිදි විය.
- ගෞරවනීය මහා සංඝරත්නය සහ දම්සක් දරුවන් එක්ව 'ධම්මචක්කප්පවත්තන සූත්ර' ශබ්ද පූජාව සිදු කරමින් වැඩසටහන ආරම්භ කිරීම.
- මධ්යස්ථානයේ ලේඛකාධිකාරී ආචාර්ය ශර්මිලා මිල්රොයි මහත්මිය විසින් ධම්මචක්කප්පවත්තන සූත්රයේ අන්තර්ගතය නූතන තාරුණ්යයට ගළපාගන්නා ආකාරය පිළිබඳව දූ දරුවන් වෙනුවෙන් විශේෂ දහම් අධ්යාපනික සාකච්ඡාවක් මෙහෙයවීම.
- එළිදක්වන ලද 'දම්සක් පැවතුම් සූත්රය' මංගල කෘතියේ ප්රථම පිටපත ආචාර්ය ශර්මිලා මිල්රොයි විසින් ඉන්දීය නියෝජ්ය මහ කොමසාරිස් ශ්රී මෛත්රී කුල්කර්ණී වෙත පිළිගැන්වීම.
- වැඩසටහනට සහභාගී වූ දම්සක් දරුවන් වෙත සම්භාවනීය අමුත්තන්ගේ සුරතින් සහතික පත්ර ප්රදානය කිරීම.
- බියගම සහ සපුගස්කන්ද පොලිස් ස්ථානාධිපතිවරුන් ඇතුළු සම්භාවනීය පිරිසක් ද මෙම අවස්ථාවට එක්වීම.
ලොව ප්රථම හා එකම පාලි හා සංස්කෘත සංස්කෘතික හුවමාරු මධ්යස්ථානය ලෙස, ථේරවාද පාලි සහ නාලන්දා සංස්කෘත සම්ප්රදායන් දෙක අතර පාලමක් තනමින් ආරම්භ කළ මෙම 'දම්සක් දරුවෝ' වැඩසටහන, අනාගත පරපුර උදෙසා අඛණ්ඩව ක්රියාත්මක වන සදහම් පාලමක් ලෙස දිවයින පුරා ව්යාප්ත කිරීම පාලි හා සංස්කෘත සංස්කෘතික හුවමාරු මධ්යස්ථානයේ ප්රධාන අපේක්ෂාවයි.
මාධ්ය අංශය
පාලි හා සංස්කෘත සංස්කෘතික හුවමාරු මධ්යස්ථානය
