ශ්රී ලංකාව තුළ දැඩි ආන්දෝලනයකට සහ නෛතික ප්රශ්න කිරීම් රැසකට ලක්වූ පාස්ටර්
ජෙරම් ප්රනාන්දුගේ 'The Glorious Church' එක්සත් රාජධානියේ පුණ්යායතන කොමිසමේ නිල වශයෙන් ලියාපදිංචි වූ ප්රථම ශ්රී ලාංකික පදනමින් යුත් දේවස්ථානය බවට පත්ව තිබේ.
ඩේලි මිරර් වාර්තා කර ඇති පරිදි, පාස්ටර් ජෙරම් ප්රනාන්දුගේ කාර්යාලය විසින් නිකුත් කළ නිවේදනයකට අනුව ඔවුන් ලන්ඩන් නුවර බකිංහැම් මාලිගා වීදියේ නව මූලස්ථානයක් විවෘත කරමින් තම යුරෝපා මෙහෙයුම් මෙලෙස පුළුල් කර ඇත.
ශ්රී ලංකාව තුළ බරපතල මූල්ය විශුද්ධිකරණ චෝදනා සහ අපරාධ විමර්ශනවලට ලක්ව සිටින පසුබිමක, මෙම ජාත්යන්තර පියවර හුදු ආගමික ව්යාප්තියකට එහා ගිය සූක්ෂම මූල්ය සහ නෛතික උපායමාර්ගයක් බව විමර්ශන වාර්තා සහ දත්ත ඇසුරින් තහවුරු වේ.
එක්සත් රාජධානියේ නෛතික ආවරණය සහ මූල්ය සුරක්ෂිතභාවය
එක්සත් රාජධානියේ නීතියට අනුව "ආගම ප්රවර්ධනය කිරීම" පුණ්යාර්ථයක් ලෙස සලකනු ලබයි. ජෙරම් ප්රනාන්දුගේ ආයතනය මෙම ලියාපදිංචිය ලබා ගැනීම හරහා දැවැන්ත මූල්යමය වරප්රසාද සහ නීතිමය ආවරණයක් හිමිකර ගනී. රාජ්ය ලේඛන සහ මාධ්ය වාර්තා පෙන්වා දෙන පරිදි මෙම ප්රතිලාභ ක්රම කිහිපයක් ඔස්සේ ඔවුන් වෙත හිමි වේ.
ප්රධාන වශයෙන්ම Gift Aid (පරිත්යාග ආධාර) ක්රමය යටතේ, පුද්ගලයෙකු විසින් කරනු ලබන සෑම පවුම් 1 ක පරිත්යාගයක් සඳහාම බදු අධිකාරියෙන් පෙන්ස් 25 ක් ආපසු ලබා ගැනීමට මෙම ආයතනයට හිමිකම් ලැබේ. මෙය ආයතනික අරමුදල් වර්ධනය කරගැනීමට ලැබෙන සෘජු රාජ්ය අනුග්රහයකි.
එසේම, බදු නිදහස් කිරීම් යටතේ ආදායම් බදු, සංස්ථාපිත බදු සහ ප්රාග්ධන ලාභ බදු වලින් ආයතනය සම්පූර්ණයෙන්ම නිදහස් වන අතර, ඔවුන් වෙත ලැබෙන පරිත්යාග ද බදුවලින් තොරව පවත්වාගත හැකිය.
මීට අමතරව ආයතනය පවත්වාගෙන යන වාණිජ දේපළ සඳහා අනිවාර්යයෙන්ම 80% ක ව්යාපාරික අනුපාත සහනයක් හිමිවේ. මෙය මෙහෙයුම් පිරිවැය අවම කරගනිමින් මහා පරිමාණ ගොඩනැගිලි නඩත්තු කිරීමට ලබාදෙන විශාල සහනයකි.
අනෙක් අතට, ලියාපදිංචි අංකයක් හිමිවීම සහ මහජන ලේඛනයේ තොරතුරු ප්රදර්ශනය වීම හරහා විධිමත් බැංකු ක්රම හරහා මුදල් හුවමාරු කිරීමට සහ ජාත්යන්තර අරමුදල් වෙත ප්රවේශ වීමට ද ඔවුන්ට නීත්යානුකූල පිළිගැනීමක් හිමිවේ. දේශීය නීතිය යටතේ මූල්ය ගනුදෙනු දැඩි නියාමනයකට ලක්ව ඇති මොහොතක, එක්සත් රාජධානියේ මෙම ලියාපදිංචිය ජාත්යන්තරව අරමුදල් රැස්කිරීම සඳහා ලබාගත් කදිම නෛතික පලිහකි.
රුපියල් බිලියන 3.3ක අභිරහස සහ මුදල් විශුද්ධිකරණ චෝදනා
පාස්ටර් ජෙරම්ට එරෙහිව ශ්රී ලංකාව තුළ මතුව ඇති බරපතලම මූල්යමය චෝදනාව වන්නේ කටුනායක ප්රදේශයේ ඉදි කර ඇති ආසන 5,000 කින් සමන්විත 'Miracle Dome' දේවස්ථානයයි.
මෙය ඉදිකිරීම සඳහා වැය කර ඇති රුපියල් බිලියන 3.3 ක මුදල සම්බන්ධයෙන් මුදල් විශුද්ධිකරණය වැළැක්වීමේ පනත යටතේ අපරාධ පරීක්ෂණ දෙපාර්තමේන්තුව පුළුල් විමර්ශනයක් පවත්වන බව නීතිපතිවරයා විසින් අභියාචනාධිකරණයට දැනුම් දී තිබුණි. මෙතරම් විශාල ධනයක් විදේශයන්හි සිට ගලා ආවේ කෙසේද යන්නත්, එම අරමුදල්වල මූලාශ්ර පිළිබඳවත් නීතිමය පරීක්ෂණ ක්රියාත්මක වෙමින් පවතී.
'ගෝල්ඩ් මාෆියා' සෙවනැල්ල සහ ජාත්යන්තර ජාලය
මෙම මූල්ය ජාලයේ ජාත්යන්තර සබඳතා තවදුරටත් පුළුල් වන්නේ ජෙරම් ප්රනාන්දුගේ "ආධ්යාත්මික පියා" ලෙස සැලකෙන යූබට් ඒන්ජල් (Uebert Angel) හරහාය. සිම්බාබ්වේ සම්භවයක් සහිත බ්රිතාන්ය ජාතිකයෙකු වන ඔහු 'Good News Church' හි නිර්මාතෘවරයාය.
2023 මාර්තු මාසයේදී අල් ජසීරා රූපවාහිනී ජාලය විසින් විකාශය කරන ලද 'Gold Mafia' වාර්තාමය වැඩසටහන හරහා සිම්බාබ්වේ රාජ්යය කේන්ද්ර කරගත් ජාත්යන්තර රත්රන් ජාවාරම් සහ මුදල් විශුද්ධිකරණ ජාලයක ප්රධාන චරිතයක් ලෙස යූබට් ඒන්ජල්ව හෙළිදරව් කෙරිණි. මේ වන විට යූබට් ඒන්ජල්ගේ පුත්රයා වන යූබට් මුඩ්සානිරේ ජූනියර් සහ ජෙරම් ප්රනාන්දුගේ දියණිය මිකේලා ප්රනාන්දු අතර විවාහ ගිවිස ගැනීමක් ද සිදුව ඇති අතර, මෙය හුදු ආගමික ව්යාපාරයක් නොව, පවුල් සබඳතා මතින් ශක්තිමත් වූ ජාත්යන්තර මූල්ය සහ ව්යාපාරික කතිපයාධිකාරයක් බව විමර්ශන වාර්තා පෙන්වා දෙයි.
කතෝලික සභාවේ ප්රතික්ෂේප කිරීම සහ ආයතනික බලපෑම
2023 මැයි මාසයේදී බුදුරජාණන් වහන්සේට සහ වෙනත් ආගම්වලට අපහාස කිරීමේ චෝදනාව මත ජාත්යන්තර සිවිල් හා දේශපාලන අයිතිවාසිකම් පිළිබඳ සම්මුති පනත (ICCPR) යටතේ අත්අඩංගුවට පත්ව රක්ෂිත බන්ධනාගාරගත වීමට ද පාස්ටර් ජෙරම්ට සිදුවිය. මෙම සමයේදී ශ්රී ලංකා කතෝලික සභාව සිය ස්ථාවරය පැහැදිලි කරමින් ගරු සිරිල් ගාමිණී ප්රනාන්දු පියතුමා හරහා නිල වශයෙන් නිවේදනය කළේ ජෙරම් ප්රනාන්දු යනු කතෝලික පූජකවරයෙකු නොවන බවත්, ඔහුගේ සංවිධානය සමග කතෝලික සභාවට කිසිදු සබඳතාවක් නොමැති බවත්ය.
මීට අමතරව, සමාජයේ විවිධ ආයතන වෙත මෙම කණ්ඩායමේ බලපෑම විහිදී ඇති බවට ද තොරතුරු වාර්තා විය. ඩේලි මිරර් වාර්තා කළ පරිදි, ඕස්ට්රේලියාවේ පැවති විස්සයි-20 ලෝක කුසලාන තරගාවලියෙන් පසු ශ්රී ලංකා ජාතික ක්රිකට් කණ්ඩායමේ කටයුතු සම්බන්ධයෙන් සොයා බැලීමට පත් කළ විශේෂ කමිටු වාර්තාවේ ද 'බෝන් අගේන්' නිකායේ බලපෑම පිළිබඳව විශේෂ අවධානයක් යොමු කර තිබුණි. තම ක්රීඩා අනාගතයට සිදුවිය හැකි හානිය පිළිබඳ බිය හේතුවෙන් ක්රීඩකයින් මේ පිළිබඳව විවෘතව සාක්ෂි දීමෙන් වැළකී සිටීම මෙම ජාලයේ සැඟවුණු බලපෑම සහ ආයතනික ආධිපත්යය මනාව පෙන්නුම් කරන්නකි.
මේ පිළිබඳව එල්ල වූ චෝදනා සම්බන්ධයෙන් ඩේලි මිරර් වෙත අදහස් දක්වමින් පාස්ටර් ජෙරම් ප්රනාන්දු සඳහන් කර තිබුණේ, තමන්ට හෝ තම 'The Glorious Church' ආයතනයට ශ්රී ලංකා ක්රිකට් ආයතනය සමග කිසිදු නිල හෝ නොනිල සබඳතාවක් නොමැති බවත්, ශ්රී ලංකා ක්රිකට් කණ්ඩායමේ කිසිදු ක්රීඩකයෙකු තමන්ගෙන් ආධ්යාත්මික සහයක් ඉල්ලා පැමිණ නොමැති බවත්ය.
දේශීය නීතියට කොටු කරගත නොහැකි වන සේ ජාත්යන්තර මූල්ය නියාමනයන් සහ පුණ්යායතන නීති උපයෝගී කරගනිමින්, නව ආගමික ව්යාපාර තම ආධිපත්යය පතුරුවන ආකාරය "බෝනගේන් රාජ්යයේ" මෙම නවතම බ්රිතාන්ය මෙහෙයුමෙන් මනාව තහවුරු වේ.
