මහාරාෂ්ට්ර ප්රාන්ත ආහාර සුරක්ෂිතතා සහ ප්රමිතීන් අධිකාරිය විසින් 'විමල් ඉලයිචි'
දැන්වීම් හරහා වක්රාකාරයෙන් "pan masala" ප්රවර්ධනය කිරීම සම්බන්ධයෙන් බොලිවුඩ් නළුවන් වන ෂාරුක් ඛාන්, අජේ දේව්ගන් සහ ටයිගර් ෂ්රොෆ් වෙත නොතීසි නිකුත් කිරීමේ පුවත මේ වන විට දැඩි අවධානයට ලක්ව තිබේ.
මහාරාෂ්ට්ර ප්රාන්තය තුළ පාන් මසාලා සහ දුම්කොළ සහිත නිෂ්පාදන ගබඩා කිරීම, බෙදා හැරීම සහ විකිණීම සම්පූර්ණයෙන්ම තහනම් කර ඇත. මෙම පූර්ණ තහනම පවතින පසුබිමක, 'විමල්' වෙළෙඳ නාමය යටතේ සූරියකාන්ත/එනසාල් ප්රවර්ධනය කරන මුවාවෙන් වක්රාකාරයෙන් පාන් මසාලා නිෂ්පාදනය පාරිභෝගිකයා වෙත සමීප කරවන බවට චෝදනා එල්ල වී ඇත. නිකුත් කර ඇති පිටු නවයකින් යුත් නොතීසිය මඟින් අදාළ දැන්වීම් අත්හිටුවන ලෙසත්, සමාජ මාධ්ය ගිණුම්වලින් සියලු ප්රවර්ධන අන්තර්ගතයන් ඉවත් කරන ලෙසත් නළුවන්ට දන්වා තිබේ.
ආහාර සුරක්ෂිතතා සහ ප්රමිතීන් පනතට අනුව වෙළෙඳ දැන්වීම් මාර්ගෝපදේශ උල්ලංඝනය කිරීම සම්බන්ධයෙන් අදාළ පාර්ශ්වයන්ට ඉන්දීය රුපියල් ලක්ෂ 10 සිට ලක්ෂ 50 දක්වා දඩ මුදල් නියම වීමේ අවදානමක් පවතී. මීට අමතරව, වරදකරු වුවහොත් වසර 3ක් දක්වා කාලයකට ඕනෑම ආකාරයක වෙළෙඳ දැන්වීම්වල පෙනී සිටීම තහනම් කිරීමට ද නීතිමය ප්රතිපාදන පවතී.
සුරූපී ප්රසිද්ධ පුද්ගලයින් මෙවැනි සෞඛ්යයට අහිතකර නිෂ්පාදන නියෝජනය කිරීම සම්බන්ධයෙන් ඉන්දියාව තුළ කාලයක සිට විශාල මහජන විරෝධයක් ගොඩනැගෙමින් පවතී. මීට පෙර 2022 වසරේදී ජ්යෙෂ්ඨ නළු අක්ෂේ කුමාර් ද මෙම 'විමල්' ප්රචාරණ ව්යාපාරයට එක්වූ අතර, ප්රේක්ෂකයින්ගෙන් එල්ල වූ දැඩි විවේචන සහ විරෝධය හමුවේ ඔහු ප්රසිද්ධියේ සමාව අයදිමින් අදාළ කොන්ත්රාත්තුවෙන් ඉවත් වීමට පියවර ගත්තේය.
