කොල්ට්ස් ක්රිකට් සමාජය සිය 150 වැනි සංවත්සරය සමරන වසරේම මෙරට දේශීය ක්රිකට් පිටියේ
ඉහළම ගෞරවය දිනා ගැනීමට සමත් විය. කෙසේ වෙතත්, එම ජයග්රහණයේ සතුටට වඩා දැන් ක්රිකට් ක්ෂේත්රයේ කතාබහට ලක්ව ඇත්තේ ඇන්ජලෝ මැතිව්ස් විසින් එල්ල කළ "බෝම්බයක්" බඳු ආන්දෝලනාත්මක ප්රකාශය සහ ඊට ශ්රී ලංකා ක්රිකට් ආයතනය දක්වන ප්රතිචාරයයි.
බාධක සහ කුමන්ත්රණ පරදා ලැබූ ඓතිහාසික ජයග්රහණය
සියලු දෙනා මවිත කරමින් මෙවර මේජර් ලීග් (Major League) ක්රිකට් ශූරතාවය දිනා ගැනීමට කොල්ට්ස් ක්රිකට් සමාජය (Colts CC) සමත් වූයේ ප්රබල NCC කණ්ඩායම පරාජය කරමිනි. මහනුවර පල්ලෙකැලේ ක්රීඩාංගණයේ පැවැති තීරණාත්මක අවසන් තරගයේදී NCC පිල ලබා දුන් ලකුණු 431ක දැවැන්ත ඉලක්කය හඹා ගිය කොල්ට්ස් පිල ජයග්රහණය කරා රැගෙන ගියේ දිනේෂ් චන්දිමාල් සහ සනෝජ් දර්ශික ය.
බලධාරීන්ගේ විවිධ අසාධාරණකම්වලට ලක්වූ දිනේෂ් චන්දිමාල් ලකුණු 144ක් රැස් කරමින් සිය පිතිකරණයේ අභිමානය පෙන්වූ අතර, ඔහුට අනගි සහයක් දුන් සනෝජ් දර්ශික නොදැවී ලකුණු 100ක් ලබා ගත්තේය. පන්දු යැවීමේදී අකිල ධනංජය කඩුලු 53ක් දවා ගනිමින් තරගාවලියේ දක්ෂතම පන්දු යවන්නා ලෙස කැපී පෙනුණි.
මැතිව්ස්ගේ ප්රකාශය: "අපි සටන් කළේ විරුද්ධ පිල එක්ක විතරක් නෙවෙයි"
ශූරතාවය සැමරීම සඳහා පැවැති උත්සවයේදී අදහස් දැක්වූ හිටපු නායක ඇන්ජලෝ මැතිව්ස්, කාගේත් අවධානය යොමු වූ ප්රකාශයක් කළේය.
"අපි සටන් කළේ සියලු බාධකවලට (Against all odds) එරෙහිවයි. මගේ කණ්ඩායම දන්නවා මම මේ බාධක කියන්නේ මොනවාටද කියලා. ඒක හුදෙක් ප්රතිවාදී කණ්ඩායමට එරෙහිව කළ සටනක් විතරක් නෙවෙයි, තවත් බොහෝ දේ ඒ පිටුපස තිබුණා."
මැතිව්ස්ගේ මෙම ප්රකාශය හරහා ව්යංගයෙන් අදහස් කළේ තරගාවලිය පුරා කොල්ට්ස් කණ්ඩායමට ක්රිකට් පරිපාලනයෙන් හෝ වෙනත් පාර්ශවයන්ගෙන් එල්ල වූ අසාධාරණකම් සහ යටිපෙළ බලපෑම් පිළිබඳවයි.
ක්රිකට් ආයතනයෙන් විනය පරීක්ෂණයක්?
මැතිව්ස්ගේ මෙම ප්රකාශයත් සමඟ ශ්රී ලංකා ක්රිකට් (SLC) ආයතනය දැඩි නොසන්සුන්තාවයකට පත්ව ඇත. ආයතනයේ ජ්යෙෂ්ඨ නිලධාරියෙකු සඳහන් කර ඇත්තේ, ජාතික කණ්ඩායම නියෝජනය කරන ක්රීඩකයෙකු මෙලෙස අපැහැදිලි චෝදනා එල්ල කිරීම ක්රිකට් පාලක මණ්ඩලයේ ප්රතිරූපයට හානියක් බවයි.
වාර්තා වන අන්දමට, මෙම ප්රකාශය සම්බන්ධයෙන් වහාම කරුණු පැහැදිලි කරන ලෙස දන්වමින් ඇන්ජලෝ මැතිව්ස් වෙත "නිදහසට කරුණු දක්වන ලෙස" (Show Cause Notice) ලිපියක් යොමු කිරීමට ක්රිකට් ආයතනය තීරණය කර ඇත. ක්රීඩකයෙකු සහ පාලක මණ්ඩලය අතර පවතින කොන්ත්රාත් කොන්දේසි උල්ලංඝනය වී ඇත්දැයි මෙහිදී විමර්ශනය කෙරෙනු ඇත.
ගැටුමට හේතුව "යාපනය ස්පෝර්ට්ස් සිටි" ද?
ක්රිකට් විචාරකයින් පෙන්වා දෙන්නේ කොල්ට්ස් ක්රිකට් සමාජය සහ ක්රිකට් ආයතනය අතර මෑතකදී හටගත් පරිපාලනමය ගැටලු මෙම ප්රකාශයට හේතු වන්නට ඇති බවයි. විශේෂයෙන්ම ක්රිකට් ආයතනයේ ඇතැම් ව්යාපෘතිවල විනිවිදභාවය ප්රශ්න කරමින් කොල්ට්ස් සමාජය මීට පෙර ලිඛිතව කළ අභියෝග මෙයට සෘජුවම බලපා ඇති බව පෙනේ.
කෙසේ වෙතත්, පිටිය ඇතුළත හා පිටත කුමන බාධක පැමිණියද, ධනංජය ලක්ෂාන්ගේ නායකත්වයෙන් යුත් කොල්ට්ස් කණ්ඩායම මෙවර ශූරතාවය දිනා ගැනීම දේශීය ක්රිකට් ඉතිහාසයේ ලියැවෙන සුවිශේෂී ජයග්රහණයක් වනු නොඅනුමානය.
Mirror Sports ඇසුරිනි.
