ලාංකීය සමාජයේ මෙතෙක් පැවති “ප්‍රතිරූප” සහ “ආධිපත්‍ය” පිළිබඳ සම්ප්‍රදායික මතවාදයන් බිඳ දමන පුවතක්
මේ වන විට රට තුළ දැඩි කතාබහට ලක්ව ඇත. අපරාධ පරීක්ෂණ දෙපාර්තමේන්තුව (CID) විසින් රඳවාගෙන ප්‍රශ්න කරන කෙහෙල්බද්දර පද්මේ නැමැති පාතාල නායකයා හා සම්බන්ධ නිළියන් පිරිසක් පිළිබඳව අධිකරණයට වාර්තා වීම මෙම විප්ලවීය තත්ත්වයට හේතුවයි.
CID නිලධාරීන් අධිකරණයට දන්වා ඇත්තේ, පද්මේ සමඟ විදේශ රටවලට ගොස් සබඳතා පැවැත්වූ බවට සැක කෙරෙන රංගන ශිල්පිනියන් පස් දෙනෙකුගෙන් ප්‍රකාශ සටහන් කරගෙන ඇති බවයි. මෙම නිළියන් මත්ද්‍රව්‍ය ජාවාරම්, මුදල් විශුද්ධිකරණය (Money Laundering) හෝ අවි ආයුධ සම්බන්ධ අපරාධවලට යොමු වී ඇත්දැයි වැඩිදුර විමර්ශන සිදුකරන බවද පොලිසිය සඳහන් කර ඇත.
මෙම සිදුවීම ශ්‍රී ලංකාවේ සමාජ ප්‍රතිරූප පිළිබඳ මතවාද කඩා බිඳ දමන "විප්ලවීය" තත්ත්වයක් ලෙස විග්‍රහ කළ හැකිය.
1. බිඳ වැටෙන සමාජ ආධිපත්‍යයන්
සම්ප්‍රදායිකව ශ්‍රී ලංකාවේ වෛද්‍යවරුන්, ඉංජිනේරුවන් සහ නීතිඥවරුන් වැනි වෘත්තිකයන්ට ඉහළම වටිනාකමක් හිමි විය. අනෙක් අතට, නළු නිළියන්, ගායක ගායිකාවන් වැනි කීර්තිමත් පුද්ගලයන්ට (Celebrities) හිමි වූයේ ජනප්‍රිය පිළිගැනීමකි. මෙම කණ්ඩායම් දෙකම මහජන චරිත (Public Figures) වන අතර, ඔවුන් කිසිවෙකුට බලහත්කාරයෙන් බලපෑම් නොකළද, ඔවුන්ගේ සමාජ පිළිගැනීම තුළින් විශාල බලයක් ඔවුන් වෙත ආරෝපණය විය.
මෙයට ප්‍රතිවිරුද්ධව, පාතාලය යනු නීතියට පටහැනි, භයානක සහ සමාජයට පිළිලයක් ලෙස පොදුවේ අර්ථකථනය කළ පිරිසකි.
පැරණි සමාජ මතවාදයට අනුව, මෙම "ඉහළ" මහජන චරිත සහ "පහළ" පාතාලය අතර පැවතියේ යා දෙක නොරත රත තරම් වූ දැඩි සදාචාරමය පරතරයකි. එහෙත් වර්තමානයේ තත්ත්වය සම්පූර්ණයෙන්ම වෙනස් වී තිබේ.
2. කළු මුදලට යටවන වෘත්තිකත්වය
වර්තමාන සමාජයේ වෘත්තිකයන්, කලාකරුවන්, දේශපාලනඥයින් යන සියලු දෙනාම පාහේ වැරදි පරිභෝජන ක්‍රමයක ගොදුරු බවට පත්ව ඇත. එනම්,
- අධික සුඛෝපභෝගී ජීවිතයක් පවත්වාගෙන යෑමට ඇති ආශාව.
- ඉක්මන් මුදල් (Quick Money) පසුපස හඹා යෑම.
- ප්‍රතිරූපය (Image) පවත්වා ගැනීමට ඇති අවශ්‍යතාවය.
මෙම අතිරික්ත පරිභෝජනය සාක්ෂාත් කර ගැනීම සඳහා, ඔවුන් පාතාලය හා බැඳුණු කළු මුදල් උපයා ගැනීමට හෝ එම මුදල් සුදු කිරීමේ ක්‍රියාවලියට (Money Laundering) සෘජුව හෝ වක්‍රව සම්බන්ධ වීමට පෙළඹී සිටිති. මෙහිදී සිදුවන්නේ ඔවුන්ගේ වෘත්තිකත්වය, කීර්තිය සහ සමාජ බලය මුදල් වෙනුවෙන් පාවා දීමයි.
කෙහෙල්බද්දර පද්මේ හා නිළියන් අතර පවතින සබඳතා පිළිබඳ විමර්ශනය, මෙම කලාපයේ පවතින සදාචාරාත්මක හා දෘෂ්ටිවාදී බිඳවැටීම මනාවට පෙන්නුම් කරයි. සමාජයේ ගෞරවනීයම යැයි සැලකෙන කලාකරුවන් පවා පාතාලයේ අඳුරු පැත්තට යොමු වී ඇත්නම්, සමාජයේ මුලික සාරධර්මයන් බිඳ වැටෙමින් පවතින බව පැහැදිලිය.
3. ප්‍රතිරූප කඩා බිඳ දමන විප්ලවීය තත්ත්වය
මෙම සිදුවීම එක්තරා ආකාරයක වෘත්තික දෘෂ්ටිවාදයන් කඩාගෙන වැටෙනා විප්ලවීය තත්ත්වයක් ලෙස දැකිය හැකිය.
සාමාන්‍යයෙන් භීතියට පත්ව සිටින පාතාලය, සෙලෙබ්‍රිටි තත්ත්වයට ළඟා වීමට රංගන ශිල්පීන් සමඟ සබඳතා පවත්වයි. මෙය ඔවුන්ගේ අපරාධ ජාලය සමාජය තුළට විහිදුවීමට මෙන්ම, නීති විරෝධී මුදල් සුදු කිරීමට ඇති පහසුම මාර්ගයයි. එසේම මෙතෙක් කාලයක් උත්කර්ෂයට නැංවූ මහජන චරිතවල සැබෑ මුහුණුවර සමාජය හමුවේ හෙළි වේ. එය මහජනතාව තුළ කලාකරුවන් සහ වෘත්තිකයන් කෙරෙහි ඇති විශ්වාසය බිඳවැටීමට හේතු විය හැකිය.
මෙම සිදුවීම් හරහා හෙළිදරව් වන්නේ කළු මුදල් හමුවේ දේශපාලනඥයන්, කලාකරුවන් මෙන්ම ඇතැම් වෘත්තිකයන් ද තමන්ගේ නීතිමය හෝ සදාචාරාත්මක සීමාවන් ඉක්මවා යන ආකාරයයි.
පද්මේගේ සිද්ධිය, හුදෙක් අපරාධ පුවතක් පමණක් නොව, එය මුදල් සහ බලය විසින් ශ්‍රී ලාංකීය සමාජයේ මෙතෙක් පැවති ගෞරවනීය සහ පිළිගත් ප්‍රතිරූපයන් කෙසේ විනාශ කරමින් සිටීද යන්නට කදිම නිදසුනකි. සත්‍යය යටපත් කරමින් නිර්මාණය කරගත් ප්‍රතිරූප පවත්වාගෙන යෑමට අවශ්‍ය මුදල් වෙනුවෙන්, කීර්තිමත් පුද්ගලයන් පාතාලය සමඟ ගනුදෙනු කිරීම, අපගේ සමාජය ඉතා භයානක අගාධයක් වෙත ඇද වැටෙමින් පවතින බවට දෙන ප්‍රබල අනතුරු ඇඟවීමකි.
#ඩිල්
