ශ්‍රී ලංකාව සහ ඉන්දියාව අතර ඇත්තේ ඓතිහාසික බැඳීමකි.
ශ්‍රී ලංකාවට බුදුදහම ලැබීමටත් පෙර සිටම ශ්‍රී ලංකාව සහ ඉන්දියාව අතර ආගමික හා සංස්කෘතිකමය වශයෙන් සබඳතා පැවති බව ඓතිහාසික මූලාශ්‍රවල සඳහන් වෙයි.
එම බැඳීම් තවත් ශක්තිමත් කරමින් ඉන්දීය අග්‍රාමාත්‍ය ශ්‍රී නරේන්ද්‍ර මෝදි අප්‍රේල් 04 වන දා සිට 06 වන දා දක්වා ශ්‍රී ලංකාවේ සංචාරයක නිරත වෙයි. ඒ ඔහුගේ සිව් වන ශ්‍රී ලංකා සංචාරය යි.
සිය ධූර කාලය තුළ සිව්වරක් ශ්‍රී ලංකාවට පැමිණෙන පළමු ඉන්දීය අග්‍රමාත්‍යවරයා වන්නේ අගමැති මෝදි ය. එමෙන්ම 2019 පාස්කු ප්‍රහාරයෙන් අනතුරුව මෙරටට පැමිණි පළමු විදෙස් රාජ්‍ය තාන්ත්‍රිකයා වන්නේ ද අගමැති මෝදි ය.
සිය තායිලන්ත සංචාරයෙන් අනතුරුව ඉන්දීය අග්‍රාමාත්‍යවරයා ශ්‍රී ලංකාවට පැමිණෙනු ඇත. ඉන්දීය අග්‍රාමාත්‍යවරයා මෙවර තායිලන්තයේ සහ ශ්‍රී ලංකා සංචාරයේ නිරත වන්නේ, ‘පළමුව අසල්වැසියා’ සහ ඉන්දු-පැසිෆික් කලාපයේ දැක්ම කෙරෙහි ඇති සිය කැපවීම නැවත තහවුරු කරන ඉන්දියාවේ ‘Act East’ (ඇක්ට් ඊස්ට්) සහ ‘Mahasagar’ (මහාසාගර්) යන ප්‍රතිපත්තිවලට අනුකූලව ය.
මෙවර ඔහු මෙරට සංචාරය කරන්නේ, ජනාධිපති අනුර කුමාර දිසානායකගේ ආරාධනයකට අනුව ය.
අනුර කුමාර දිසානායක ජනාධිපති ධූරයට පත් වීමෙන් අනතුරුව කළ පළමු විදෙස් සංචාරය වන්නේ ද ඉන්දීය සංචාරයයි.
අප්‍රේල් 04 වන දා පස්වරුවේ දිවයිනට පැමිණෙන ඉන්දීය අග්‍රාමාත්‍යවරයා පිළිගැනීමේ නිල උත්සවය අප්‍රේල් 05 වන දා කොළඹ නිදහස් චතුරශ්‍ර පරිශ්‍රයේදී පැවැත්වෙනු ඇත.
අග්‍රාමාත්‍ය මෝදිගේ සංචාරය අතරතුරදී දෙරට අතර අත්සන් කරන ලද අවබෝධතා ගිවිසුම් ගණනාවක් ද හුවමාරු කර ගැනීමට නියමිත ය.
ඒ අනුව, ඉදිරි දිනවලදී දෙරට අතර ආරක්ෂක සහයෝගීතාව, සෞඛ්‍ය සහයෝගීතාව, ඩිජිටල්කරණ සහයෝගීතාව පිළිබඳ ගිවිසුම්වලට සහ බලශක්ති සහයෝගීතාවට අදාළ ගිවිසුම් දෙකකට අත්සන් කිරීමට නියමිත ය. එමෙන් ම, දෙරට අතර දැනටමත් අත්සන් කර ඇති ණය ප්‍රතිව්‍යුහගතකරණයට අදාළ ගිවිසුම් ද ඉන්දීය අග්‍රාමාත්‍යවරයාගේ සංචාරය අතරතුර හුවමාරු කර ගැනීමට නියමිත ය.
ඉන්දීය රජයේ සහය ඇතිව ශ්‍රී ලංකාවේ ක්‍රියාත්මක කරන ලද ව්‍යාපෘති කිහිපයක් ද ඉන්දීය අග්‍රාමාත්‍යවරයා විසින් විවෘත කරනු ලබනු ඇත.
සාම්පූර්හි ඉදිකෙරෙන සූර්ය බලශක්ති ව්‍යාපෘතියේ ඉදිකිරීම් ආරම්භ කිරීමේ උත්සවයට ඉන්දීය අග්‍රාමාත්‍යවරයා කොළඹ සිට අන්තර්ජාලය ඔස්සේ එක් වනු ඇත.
ශ්‍රී ලංකාවේ රැඳී සිටින කාලය තුළ, ඉන්දීය අග්‍රාමාත්‍යවරයා අනුරාධපුරයට ගොස් ශ්‍රී මහා බෝධිය වැඳ පුදා ගැනීමට නියමිත බව විදේශ කටයුතු අමාත්‍යංශය සඳහන් කළේ ය.
ඉන්දීය අග්‍රාමාත්‍ය ශ්‍රී නරේන්ද්‍ර මෝදි සමග ඉන්දීය විදේශ කටයුතු අමාත්‍යවරයා, ජාතික ආරක්ෂක උපදේශකවරයා, විදේශ කටයුතු ලේකම්වරයා සහ ඉන්දීය රජයේ තවත් ජ්‍යෙෂ්ඨ නිලධාරීන් පිරිසක් මෙම සංචාරයට එක් වනු ඇත.
කළගුණ දත් ජාතියක් වශයෙන් මෝදි පාලන සමය අප හට කළ උපකාර අමතක නොවේ.
කොවිඩ් වසංගත සමයේදී ශ්‍රී ලංකාවට අවශ්‍ය එන්නත් පළමුව ප්‍රධානය කළේ ඉන්දියාවයි.
2022 වසරේ දී ශ්‍රී ලංකාව ඉතිහාසයේ මුහුණ දුන් පෙර නොවූ විරූ ආර්ථික අර්බුදය හමුවේ ඉන්දියාව මෙරටට අවශ්‍ය ඉන්ධන, ඖෂධ හා ආහාර ද්‍රව්‍ය ලබා ගැනීම සඳහා ඩොලර් බිලියන 4කට ආසන්න ආධාර පරිත්‍යාග කළේ ඉන්දියාවයි.
එමෙන්ම මෙරට බෞද්ධ සිද්ධස්ථානවල අභිවෘද්ධිය වෙනුවෙන් ඩොලර් මිලියන 15ක ආධාරයක් ද ඉන්දීය රජයෙන් හිමි විය. නොයෙකුත් ණය සහන ද අප හට පළමුව ලබා දුන්නේ ඉන්දියාවයි. දුෂ්කර අවස්ථා සියල්ලෙහි අප හට කිසිදු යටි අරමුණුකින් තොරව සහයට සිටියේ ඉන්දියාවයි.
එබැවින් ඉන්දු – ලංකා දෙරටෙහි සියවස් ගණනක මිතුදම ඔස්සේ සෞභාග්‍යවත් අනාගතයකට දෙරට ගෙනයාමට මෙම සංචාරය ඉවහල් වේවා යන්න බෞද්ධ සහෝදරත්ව පදනමෙහි පැතුමයි!
@බෞද්ධ සහෝදරත්ව පදනම
