ලෝකයේ මිනිස් මැදිහත්වීම් තුළ ඇතිවන යුධමය විනාශයන්, න්‍යෂ්ටික අවි පරිහරණය, ජන ඝාත
න මෙන්ම දේශගුණික විපර්යාස, ස්වභාවික ආපදා, ගිනි, ගංවතුර, භූකම්පන, සුනාමි තත්වයන් ඇතුළු සමස්ත ලෝකයේම මිනිසුන්, සතා සීපාවා, ගහ කොළ, ඇල දොල, ගංගා, සාගර අද මුහුණ දී ඇත්තේ මහත් වූ ඛේදවාචකයන්ටය.
පසුගියදා මියන්මාරයේ සහ තායිලන්තයේ ඇතිවූ භූ කම්පනයේ ඛේදවාචකයේ ගොදුරු ප්‍රමාණයන් තවමත් නිශ්චිත ලෙස කියනොහැකි තරම් ය. ඒ අතරම ජනාපය කේන්ද්‍ර කරගනිමින් ඉදිරියේ සිදුවිය හැකි මහා භූ කම්පනයක් පිළිබඳව විද්‍යාඥයින් අනතුරු ඇඟවීමේ පුරෝකථනයන් සිදු කරමින් තිබේ.
මේ අතර මියන්මාර භූ කම්පනයෙන් බිඳ වැටුණු ගොඩනැඟිලි සුන්බුන් අතර සිරවූවන් මුදා ගැනීමේ මෙහෙයුම් අවසන් අදියරට එළැඹ ඇතැයි විදෙස් මාධ්‍ය වාර්තා කරයි.
භූ කම්පනය සිදුවී දින 4ක් ගතවී ඇති බැවින් ගොඩනැඟිලි සුන්බුන් අතර සිරවූවන්ගේ ජීවිත බේරා ගැනීමේ බලාපොරොත්තු බිඳ වැටී ඇත.
මිලියන 1.5ක ජනතාව ජීවත්වන මැන්ඩලායි නුවර උඩුයටිකුරු කළ භූ කම්පනයෙන් මිය ගිය නිල වශයෙන් ප්‍රකාශිත ගණන ඊයේ වන විට 2,719 දක්වා ඉහළ ගිය බවත්, එය තුන්දහස ඉක්මවනු ඇති බවත් මියන්මාර හමුදා නායක රූපවාහිනිය ඔස්සේ ජාතිය අමතා ප්‍රකාශ කර තිබේ.
තවත් පුද්ගලයන් 441 දෙනකු අතුරුදන්වී ඇති අතර, තුවාලකරුවන්ගේ සංඛ්‍යාව 4,521 දක්වා ඉහළ ගිය බව ද හමුදාපතිවරයා සඳහන් කර තිබේ. භූ කම්පනයෙන් මිය ගිය ජනතාව වෙනුවෙන් එරට රජය ඊයේ මිනිත්තුවක නිහඬ කාලයක් ප්‍රකාශයට පත් කර තිබූ අතර, අවතැන්ව සිටින මැන්ඩලායි ජනතාවට සහන සැලසීමට එක්සත් ජාතීන්ගේ සංවිධානය ඇතුළු ජාත්‍යන්තර රටවල සහනාධාර සහ අරමුදල් එක්රැස් වෙමින් තිබෙන බව ද වාර්තා වේ. නිවාස, ගොඩනැඟිලි, මහමාර්ග සහ පාලම් විශාල සංඛ්‍යාවක් විනාශ වී ඇති බැවින් මැන්ඩලායි නුවර යථා තත්ත්වයට පත් කිරීමට මාස ගණනාවක් ගතවනු ඇතැයි ද වාර්තා වේ.
පසුගිය සිකුරාදා උතුරු මැද මියන්මාරයේ පිහිටි මැන්ඩලයි නුවර කේන්ද්‍ර කරමින් සිදුවූ රිච්ටර් මාපකයේ 7.7ක අගයකින් යුතු එම භූ කම්පනයෙන් මිය ගිය සංඛ්‍යාව දැනට වාර්තා වී ඇති ප්‍රමාණයට වඩා බෙහෙවින් වැඩි විය හැකි බව ද විදෙස් මාධ්‍ය වාර්තා කරයි. අමෙරිකානු භූ විද්‍යා විශේෂඥවරුන් අනුමාන කර ඇත්තේ භූ කම්පනයෙන් මිය ගිය ගණන දසදහස දක්වා ඉහළ යා හැකි බවය.
භූ කම්පනයේ අසල්වාසී තායිලන්තයේ බැංකොක් නුවරට ද සැලකිය යුතු හානි සිදු කර තිබූ අතර, භූ කම්පනයත් සමඟ බැංකොක් නුවර ඉදි කරමින් පැවැති මහල් 30කින් සමන්විත ගොඩනැඟිල්ලක් මුළුමනින්ම පොළොවට සමතලා වීමෙන් මිය ගිය සේවක සංඛ්‍යාව 21 දක්වා ඉහළ ගොස් ඇති අතර, තවත් 70ක පමණ පිරිසක් සුන්බුන් අතර යටවී ඇති බවට තොරතුරු පළවී තිබේ.
